سلام

(((بس معقول يعني ام تجيب ابنها عالصيدلية وما نعرف نقلها انو ابنك شو معو..؟؟ )))

 

اي معقول .. ليش مو معقول! ... نحنا مو أطباء .. ومشان صيدلة المجتمع .. يعني رشح إسهال إمساك كريب حرق لدغة حشرة إلخ وممكن نكاف أو جدري بس كمان ما بذكر انو كانو من الOTC أو ذكروني إذا كنت غلطانة!!! .. بس والله صدفية اكزيما حمى قرمزية حصبة ألمانية مالطية تيفوئيد .. لأ أكيد هدول معلش مو شغلتنا ... بلا ما يكون المريض بشي ويصير بشي ..

من كتر ما قلنا مو مستاهلة الصيادلة صارو عم يوزعو ما يسمى ب"ظرف التهااب!!!" كيف ما كان ... وغيره كتييير

مشان صيدلة المجتمع .. مظبوط في شي اسمه أدوية الOTC وبالمناسبة لحد هلأ بتقرا بالمراجع انو في كتير اختلاف على أدوية فيما إذا كانت OTC أو لأ ..!

 

زيد

100 % موافقة عكلامك

 

"غولدن بل"

تمااام .. وأنا طرحت الفكرة لحتى أكد الكلام يلي ذكرتيه

بس خلونا نراجع حالات الOTC قبل ما نطرح حالات سريرية لحتى ما نتخربط ..

____________________________________________________________

 

scorpion05

 

أنا رح جرب حظي بأول اتنين

1- كلافوكسيل 600 ملغ فيال السعد (أموكسيسللين 500 ملغ + كلافولانيك أسيد 100 ملغ) أنتي بيوتيك ابرة بالعضل مرتين (عدد 2)

2- دي - فوميت 8 ملغ أمبول السعد (أونداستيرون) حاجب لمستقبلات 5HT ومضاد للإقياء والغثيان. تلات ارباع الابرة بالعضل مرتين (عدد 2) !!!؟؟؟؟

هلأ مو غلط نتطلع على أعراض الأمراض المعصلجة كمان .....مو لنعطي عليها دوا بس كمان العلم حلو وكلو ممكن يمر عالواحد وممكن ننصح المريض لما نشوف حالة "حمى قرمزية" أنو يستشير طبيب اختصاص معين دون آخر......يعني لما نتوقع شو الحالة فينا نوجه المريض "مو نعالجو"

وما مننسى أنو هيك استشارة ممكن تجي عالصيدلية أو بأي مكان من الغريب والقريب كوننا صيادلة والمتوقع إما نعالج أو نوجه المريض شو يعمل ولوين يروح

افرضي حدا وصفلك اعراض التهاب زائدة دودية فهون أبسط ما يمكن نصحو أنو ما ياخد مسكنات لبينما يزور الطبيب وأنو ما يهمل الألم أبداً


بالنسبة للـOTC فهي بتلاقيها بمحاضرات صيدلة المجتمع وبكتب خاصة بتعنى بعلاج حالات ضمن الصيدلية والأورانج بوك بتذكر كمان كان مصنفها

حلو كتير وكلام بعبي الراس ..

الخلاصة منتعلم كل شي ومنوجه وما منشخص ومنداوي على أساس تشخيصنا بهيك أمراض ..

والله هاد الكتاب البرتقالي لازم نعمل عليه جولة بحث :P

***************************************************

الدوا التالت بالوصفة اممم بعتقد

ديستاكلور 250 ملغ شراب ألفا (سيفاكلور ج2 سيفالورسبورينات) ملعقة كبيرة مرتين يومياً

السلام عليكم:

يعني بعد كل هاد الجدل والردود .. أنا ما كنت حابة احكي شي لأنو ما بدي أعمل حساسيات بيني وبين أي حدا بالمنتدى مع إني مابعرفكم بشكل شخصي

بس حسيت انو صار لازم وضح وجهة نظري

أنا بتدرب بصيدلية كل الناس يلي بالمنطقة بيجو عليها لحتى الدكتور الصيدلاني يوصفلهن دوا .. والكل بيوثق فيه ثقة تامة وهو فعلاً أهل لهي الثقة

وأنا صرت حب هاد الاتجاه  من نظرة الناس للصيدلاني واحترامهن إلو فصرت حب إقرأ عن الحالات يلي ممكن نواجهها بالصيدلية أو ننسئل عنها من أهلنا

فصرت كل ما إقرأ عن حالة احتفظ بالصور المتعلقة فيها عندي عالكومبيوتر وبعدين قلت لحالي ليش لحتى ما فيد غيري فيها مشان هيك صرت حطهن بهي الساحة

وبالنسبة للحمى القرمزية على سبيل المثال .. أنا كان عندي الصور من كذا شهر بعدين انسأل سؤال عنها بالماتش الصيدلاني فقلت لحالي بحط الصور لحتى يلي بيعرف الحالة بس بالاسم يصير يعرفها بالشكل كمان .. وممكن كتير حدا بالصيدلية يسألكن عليها وهو مفكرها حصبة أو حساسية ... بس انتو كصيادلة رح تميزوها من اللسان يلي ما بتظهر عليه الأعراض بحالة الحصبة لأنو اللي بميز الحصبة هو بقع كوبليك البيضاء يلي بتظهر بباطن الخد

وأنا ما حطيت ولا حالة مو مارقة معنا بالكلية باستثناء العد الوردي
يلي كمان ما حطيت الصور تبعو الا بعد ما كنا عم نحكي عنو بهي الساحة

وفعلاً في كتير ناس ما معهن ياخدو ولادهن عالدكتور فبيلجؤوا للصيدلاني

وفي ناس بروحوا عالدكتور ومع هاد الشي الصيدلاني بضل إلو دور

مرة مثلاً إجت عالصيدلية أم ومعها ابنها شب عم يتلوّا من الوجع وعطتنا راشيتا من المشفى فيها أدوية لالتهاب أمعاء

الصيدلاني سأل الأم هي الراشيتة لإلو ... قالتلو إي
قلها التهاب الأمعاء ما بيعمل كل هاد الوجع ( طبعاً هيي هلق لسا طالعة من المشفى)

كتبلها اسم مخبر بيعطي نتائج التحليل مباشرة وكتبلها عالتحاليل اللازمة لالتهاب الزائدة وقلها بتروحي فوراً على هاد المخبر وحاكيني شو بصير معك لأنو إذا كان التهاب الزائدة بدو عملية فوراً

وفعلاً عملت متل ما قلها ... والشب عمل العملية بنفس اليوم لأنو كانت ما بتتأجل أبداً

مع انو هو ماراح يتداوى بالصيدلية راح عالمشفى

أما مثلاً حالة نكاف وجاية لعندك حدا فقير وما معو يروح يدفع معاينة
والنكاف مابدو غير مسكنات وخافضات حرارة
فشو فيها إذا عطيتو الدوا أذا كنت متأكد من الحالة
يعني النكاف أي حدا عامي بيعرف يشخصو هو والجدري والحصبة
يعني بدها كل هالحكي
ومن اليوم ورايح ماعاد ازعجكن بصور ما بتهمكن

روقي روقي ... أنا بعتذر إذا حسيتي انو في أي إساءة لالك شخصياً .. مع انو أنا كنت عم بحكي بشكل عام .. مشان ما نكمل لادام بحالات أعقد وما بتتعالج بOTC بس طبعاً كل كلمة قلتيها بآخر رد معك حق فيها ... وخصوصاً

إذا متأكد من الحالة وكان علاجها بسيط وما بدو معاينة طبيب ..

وبعتذر مرة تانية

السلام عليكم:

وأنا كمان بعتذر إذا أزعجت أي حدا

بس الله بيشهد انو ما كان بدي غير إني فيد غيري مثل ما أنا عم أستفاد من هي القصة لأنو بلّشت لاقي نتائجها بحياتي العملية

من حوالي أسبوع مثلاً ورجاني أخي إيد بنتو الصغيرة عمرها أربع شهور

عليها حب صغير أحمر وقلي كل جسما هيك وهو كان مفكر انو جدري (مع انو ما بيشبه الجدري أبداً بس لأنو كان في حدا بالعيلة صاير معو جدري)

أنا من أول نظرة قلتلو عم تعطوها أدوية جديدة...؟

قلي اي .. قلتلو شو هنن .. قلي دوا مضاد حيوي وتحاميل خافض حرارة

قلتلو الله أعلم من المضاد الحيوي .. ورجاني المضاد الحيوي طلعت تركيبتو سيفبودوكسيم ( يلي فعلاً ممكن يعمل حساسية)
قلتلو ليش شو صاير معها
قلي كان مرتفعة حرارتها أخدناها ع الدكتور قال عطوها هاد الدوا أذا في شي التهاب بروح...!!!!!

قلتلو عندكم دوا " فينستيل"
قلي لأ ما بعرفو .. قلتلو على كل حال خلي الدكتور يشوفها أنا ما رح حطها برقبتي

أخدها على غير دكتور طلع عندها حساسية من الدوا ووصفلها فينستيل

وقلهم الدوا يلي واصفلها ياه هداك الدكتور كتير تقيل ما بينعطا غير كآخر احتمال
وهيي أصلاً ما عندها التهاب أبداً

بقى شو رأيكم بهالحكي

أنا بتشكركن كتير  كلكن على هالنقاش المثري

وبتشكر بالأخص xyz  على هالصور والحالات اللي عم تفيد فيها الجميع

طبعا أنا رأيي انو الصيدلاني كما تعلمنا هو العالم اللي بياخد من كل بستان زهرة ومابيمنع انو تكون لديه معلومات طبية يفيد بها مرضاه بل هذه المعلومات قد تكون ضرورية أحيانا   لكن يجب أن لا تكون هذه المعلومات على حساب تخصصه في عالم الدواء يعني يجب أن يركز على الدواء و بنفس الوقت يجب أن يكون لديه ثقافة طبية كافية للتعامل المناسب مع أي حالة ضمن حدوده كصيدلاني وليس كطبيب

السلام عليكم:

اقتباس

طبعا أنا رأيي انو الصيدلاني كما تعلمنا هو العالم اللي بياخد من كل بستان زهرة ومابيمنع انو تكون لديه معلومات طبية يفيد بها مرضاه بل هذه المعلومات قد تكون ضرورية أحيانا  لكن يجب أن لا تكون هذه المعلومات على حساب تخصصه في عالم الدواء يعني يجب أن يركز على الدواء و بنفس الوقت يجب أن يكون لديه ثقافة طبية كافية للتعامل المناسب مع أي حالة ضمن حدوده كصيدلاني وليس كطبيب

صح... والله بعرف انو مية بالمية صح

بس مثل مانكم شايفين

نحنا بالكلية على إحاطة جيدة جداً بالدواء من الناحية الكيميائية

أما من بقية النواحي بدنا نتعب على حالنا كتير

يعني حتى الأسماء التجارية للأدوية ... يلي ما عندو اجتهاد شخصي بيطلع من الكلية ما بيعرف أي دوا وما بيقدر يشتغل بصيدلية غير ليكون هو متدرب كتير وتعبان على حالو ... بس بيقدر يتخرج ويشتغل مباشرة بمعمل أدوية لأنو صار عنا دراية جيدة بهاد المجال... أصلاً مشان هيك انعملت هي الساحة
" تعوا نلازم كلنا سوا"

وبرجع بكرر اعتذاري من أي حدا زعجتو بكلامي وعن جد أنا ما كنت بقصد

خلونا نضل إخوة مثل ما اتعودنا

كلامك مزبوط .......وهي معاناة نتمنى زوالها قريبا

ولافي ازعاج ولا شي ....ومافي داعي للاعتذار هون نحنا عم نتناقش وطبيعي الاختلافات البسيطة في الأراء

وشكرا لك على حرصك الدؤوب على اتقان مهنتك  ....

xyz

عندي سؤال للنقاش :
قلتي في الحالة السابقة حول الحساسية اللي صابت الطفل من جراء تناول السيفبودوكسيم قال الطبيب انو هالدوا تقيل

هل برأيك  اذا بدلناه بالأموكسيسللين يمكن أن تخف الحساسية تجاه الدوا ولا بالعكس تزيد ؟؟؟؟