ههههههه والله موتيني ضحك بسمة الحزن لازم ضيفه لمجموعتي " طرائف من السرفيس "

ذكرتيني بموقف صار معي فظييييييييييع :

مرة طلعت انا ورفيقتي بالميكرو كنت تعبانة كتير ومو نايمة بالليل وكان نهاري طويل بالجامعة وعملي للساعة 8 هاد غير الاخبار السيئة يلي رافقتني يومها ..... بالمختصر كان يوم متعب بشكل

ركبت جنب الشباك .. وعمو الشوفير الله يخليه ما ترك مطب الا وعمل من فوقه قفز حواجز وماترك اشارة الا وضرب فريم عليها ... لما وصلنا صارت النجوم الملونة تفتل براسي 

نزلت رفيقتي قدامي وصارت تحت بس انا وصلت لعند الباب بدي انزل والناس ركضت بدها تركب وانا مو متحملة ولا قادرة اسند طولي وحاسة اني ممكن اوقع بأي لحظة .. قلت لحالي يا بنت اقعدي لبين ما الناس الاكابر يطلعو . ..

مو طلع ما في كرسي بالاساس ورحت سباحة بأرض الميكرو .. انا كنت واقفة عند الباب ومفكرة في كرسي هاد المتحرك وطلع مافيي ووقعت ... النهفة بقى اني ما كنت دايخة الا شوي ووقت وقعت عملت حالي دايخة قدام الناس مشان ما يضحكو عليي وكملت الدور ..وصارو يقولو للشوفير على مهلك معلم طول بالك ..

رفيقتي دارت ما لقتني ومو عرفانة انو الناس انعجقت بسببي ... لما لمحتني من الشباك صارت تولول ودحشت لوصلتلي ومسكتني ونزلتني  على اساس انا دايخة وصارو يقولولي على مهلك على مهلك

النهفة التانية انو انا حابسة الضحكة ورفيقتي ماسكتني ومرعوبة عليي وصار وجها اصفر وكانت هي رح تدوخ مو انا ......... أول ما بعدنا عن الميكرو قلبت من الضحك لوقت ما نزلو دموعي والبنت يا حرام مو فهمانة شو صرلي  ........ فجأة قلبت معي صرت اضحك على حالي ولما فهمت القصة صارت تضحك معي وماعاد فرقت معنا انو واقفين بالشارع

موقف ما بعده موقف .. ...انا والله ما كنت دايخة بس اضطريت اعمل هيك حتى ما الناس تتمسخر عليي ......

تحيــــــــ الرومانتيكيــــــــــــة ــــــــــــــــــاتي.....

مرة صارت معي قصة كنت بالامتحان واجت المراقبة بدها تاخد اسمي وتوقيعي بس على قد ما كنت منسجمة بالحل سالتني شو اسمك فاتطلعت على البطاقة بعدين جاوبتها قام قالتلي شو مابتعرفي اسمك عم تنقلي من البطاقة وقتها اتطلعت حولي لقيت كل رفقاتي عم يضحكو

 أنا ما قلت هي العبارة لأنو وقتها اعتبرت هاد الموقف شي طريف فيني أرويه لولادي

.بالبكلوريا.............

بأحد حصص الجغرافية

سألت طالبة الأنسة عن اسبانيا لأنو كانت بدها تزور خالها هونيك

وطال الحديث لحد ما سألت الأنسة عن عاصمة اسبانيا وأنا اجيت لقول مدريد أم قلت ريال مدريد

مع العلم أني مو شايفتو للفريق بحياتي 

فرط الصف والأنسة علي

فعلا كان موقف محرج وغير متوقع من طالبة جدية متلي

السلام عليكم 

فعلا مواقف محرجه جدا ومضحكه 

بس كلن بكفه وقصتك يارغد بكفه 

فعلا انا لو عواضك بعود بالبيت ومعت ورجي وشي لحدا 

انا اول مرة بشارك
كتير عجبني الموضوع


كنا بالدورة الاستثنائية عم نقدم امتحان وكان في شب صديقي عم ينقلني 
النكتة انو نقلني حل مسألة كاملة
قام حسيت انو حله غلط بدل مايضرب قسم
وقلتله قام الزلمة ما اقتنع وصار يناقشني على اي ولأ وبيصير وما بيصير
ووقت ما عصب مني 
علي صوته كتير وماحس ع حالوا
وفجأة قام وقف قدام القاعة كلها وقلي بصوت عالي
إذا مفكرة حالك هالقد زكية ليش لتتنقلي مني
طبعا بلمح البصر لقيت المراقب فوق راسنا سحب وراقنا وما خلانا نكمل
بس قدرنا نقنعه ما يبلغ علينا
وطلعنا انا وياه فارطين من الضحك
والاحلى انو رفعنا المادة       

السلام عليكم ورحمة الله وبركاته

كنت اليوم قاعدين بالصف )7a at American Languge Centre( وتشاطر الاستاذ وسئلنا شو هي اكتر مهنة ما بتحبها ............قمت انا تفالحت وقلتلو .........حتما وبجدارة ساحقا .....طبيب الاسنان ....

وبلشو هلطلاب كلهن على سرد قصص وحكايا ومغامرات وموقف عن زياراتهن ......

حتى بالاخر الاستاذ اطلع على طالب (يلي قاعد جنبي ) وسئلو عن رئيو باستغراب شديد انو بس هلزلمة لهلق ما فتح تمو .........حتى وهو عم يسئلو عم يقلو ....انو انت واحد من تنين يا صاير معك فلم رعب عن دكتور السنان ومو حابب تنكش الماضي يا اما لهلق ما فتت على عيادة

قام الزلمة  اتطلع بالاستاذ واتطلع في ........بغل و غضب مكبوت وحرقة قلب ......وقال انا طبيب اسنان ....وان شاء الله تكوني فشيتي قلبك هلق

هههههههه جد كان شعور غريب ......لانو حكى بطريقة انو نفسو يقوم يسفقني شي كف يخربطلي واجهتي ....وانا صار وشي احمر وطبعا بالبريك ما فرجيتو وشي ههههه

بس والله معي حق يعني مو روحة لعند دكتور السنان

هاد يا أحبابي يا كرام صار معي موقف فظيع و ما بنساه    ئال مر كنا رايحين نحن والانسة تبع المعهد مشوار على بيت جن وشو طاير عئلي لبست وتزوءت وما حدا ادي وبس وصلنا شفتلك هالنهر عم يخدق خدق ءام عملت دء رجولة وشجاعة ورحت نازلة بهالنهر ئال شو بدي أرجع لأيام الطفولة وما لاءي حالي غير هالمي اخدتني وما حدا سمى علي وبعد جهد جهيد طلعت وربكم سترها علي بسسسس مابتكمل مع حدا طلعت والمي عم تنئط نئط مني ولحتى تكمل معي  طلعت كما يقال حافية القدمين  كندرتي للأسف كانت الضحية( والمشكلة أنو كانت جديدة وما لحئت اتهنا فيها ) بس الشهادة لله طلع الزلمة صاحب المحل مزوء وعطاني كندرة ستو(الجدة)الله لايحرمنا من كنادرها لء وبعدكل هالخزوة والمرمطة أدام العالم رجعت وكان عم يستناني نصيبي  من البهدلة بالبيت طبعا أنا وفايتة ومقلوب شكلي رأسا على عقب     
                                                                                          سلام

lovelyface ^_^

where were you?

it has been a very long time, sis

hope not to miss you again

By the way, I hate dentists too

الموضوع كتير حلو صارلي ساعتين قاعدة عم أفرط ضحك لحالي وأهلي عم يقولوا لحالون شو صار للبنت جنت؟!!


الموقف ماصار معي بس كان موقف كتير بيضحك وكل ما أتذكروا وانا ورفقاتي بنفرط ضحك

كان عنا حصة تاريخ والأستاذ على غير العادة قرر أن يشرح الدرس وهو عم يفتل بين المقاعد ( مع أنه بالعادة بيقعد على الكرسي وبيشتغل رمي الطبشور من شان أعادة ضبط إيقاع الصف متل ما بتعرفوا)
المهم وبلا طول سيرة الأستاذ عم يشرح الدرس وأيديه عم تروح يمين ويسار  وحدة من البنات كان الدرس مو عاجبها وعلى قد مو نعسانة  فتحت تمها لتتاوب وإذ بأيد الأستاذ بتفوت بتمها


لحظة ما خلصت القصة البنت من الرعبة عضت أيد الأستاذ فيها وما فيها  بهديك اللحظة ما عد في حدا قادر يمسك حالو وفرط الصف كلو ضحك والأستاذ نسي الوجع وفرط معنا بالضحك وكل ما هدينا شوي بيرجع حدا بتذكر الموقف نرجع من أول وجديد ونضحك
هيك شي نص ساعة وما اخدنا الدرس