السلام عليكم

اقتباس

رح نقدف هالسؤال لساحة السنة الثانية بما إنهم آخدين حيوية تازة....

والله مخي مسكر ... بس ما بتذكر أنو مذكور إذا داخل خلوي أو خارج خلوي

ــــــــــــــــــــــــــــــــــــــــــــــــــــــــــــــ

عندي كم سؤال لو سمحتو ...

ممكن أنو أكليل الجبل (كونو بيزيد التروية بمنطقة الرأس) ... يزيد من سوء حالة الاحتقان وتوسع الأوعية بالأنف (الناتج عن التحسس الموسمي) ؟؟؟

ما بعرف إذا هالشي الو أساس علمي ... بس بما أنو هاد وقت التحسس (ووقت الفحص) وما في شي عم يحسنو    ... فالأفضل نعرف الأشياء اللي ممكن تزيد الوضع سوء ونبعد عنها

وبهاد الخصوص ليش بخاخات الأنف الموضعية إذا كانت مضيقة وعائية ما منقدر نستخدمها لأكتر من أسبوع ... وبعد أسبوع ممكن نرجعلها ...

مرة سمعت أنها بتعمل التهاب ... ومرة سمعت أنها بتعمل اعتياد فمنضطر نزيد الجرعة

وإذا كان في أعتياد عليها ... ممكن تزيد الوضع سوء لما نتركها؟؟؟

وهل البخاخات المضادة للهستامين ممكن تعمل نتيجة أفضل من الحبوب ؟؟؟

بعتذر على الأسئلة الكتيرة ... 

السلام عليكم:

اقتباس

ليش بخاخات الأنف الموضعية إذا كانت مضيقة وعائية ما منقدر نستخدمها لأكتر من أسبوع ... وبعد أسبوع ممكن نرجعلها ... مرة سمعت أنها بتعمل التهاب ... ومرة سمعت أنها بتعمل اعتياد فمنضطر نزيد الجرعة وإذا كان في أعتياد عليها ... ممكن تزيد الوضع سوء لما نتركها؟؟؟

مضادات الاحتقان الموضعية ما بيجوز استخدامها أكتر من 5-7 أيام لأنها بتعمل "احتقان أنف ارتدادي" أو بيسموه "التهاب أنف دوائي" ناجم عن تلقيم راجع سلبي (يعني إشارة تطمين من الدواء أنو موجود كفاية من المقلد الودي فلا داعي يعذب الجسم حاله وينتجه داخلياً) وبالتالي بيسيطر نظير الودي (الموسع للأوعية) وبيرجع الاحتقان والذي ما بيخف إلا بمضاد الاحتقان الموضعي السابق......

اقتباس

وهل البخاخات المضادة للهستامين ممكن تعمل نتيجة أفضل من الحبوب ؟؟؟ بعتذر على الأسئلة الكتيرة ...

بخاخات مضادة للهيستامين متل شو؟؟

قصدك البخاخات الموضعية الأنفية المضادة للاحتقان؟
هلأ هي بعتقد بيمشي حالها إذا كان التحسس أنفي فقط ......وخاصة للأشخاص يللي مضاد الهيستامين الجهازي مضاد استطباب لهم (احتباس بولي - غلوكوما-ويمكن حوامل)
أما لما يترافق مع تحسسات عينية أو غيرها فالحبوب أفضل



والله أعلم

السلام عليكم

شكراً كتير نسرين عالإجابة   

اقتباس

بخاخات مضادة للهيستامين متل شو؟؟

قصدك البخاخات الموضعية الأنفية المضادة للاحتقان؟

لما سألت الصيدلي عن بخاخ مضاد احتقان لحالة التحسس قلي في بخاخات: مضاد احتقان (مقبض وعائي "بس مقلد ودي") - أو مضاد تحسس (مضاد هستامين)  - أو مضاد احتقان وتحسس 

اقتباس

أما لما يترافق مع تحسسات عينية أو غيرها فالحبوب أفضل

تقريباً هاد العارض الوحيد اللي خففت منو الحبوب  ... أما باقي الأعراض ما حسنتها أبداً 

يمكن مضادات الهستامين لازم تتاخد كوقاية قبل ما يبلش التحسس لتفيد شوي ... أما كعلاج بعد ما يكون الهستامين تحرر فما بتفيد 

مع أنو في بمنهاج الاصطناع الدوائي بحث مضادات الهستامين ... بس ما محطوط غير عن الأدوية والبنية والجرعة والأعراض 

السلام عليكم:

اقتباس

يمكن مضادات الهستامين لازم تتاخد كوقاية قبل ما يبلش التحسس لتفيد شوي ... أما كعلاج بعد ما يكون الهستامين تحرر فما بتفيد

مضادات الهيستامين ما بتأثر على تحرر الهيستامين، بس بتخفف الأعراض الناتجة عنه  فهي بتمنع ارتباط الهيستامين بمستقبلاته.

يعني بتعالج العرض وليس المرض

السلام عليكم

هلأ إذا عم تعاني بشكل مستمر من التحسس الموسمي

فالأفضل تحددي شو هو العامل المسبب

وإذا لقيتي صعوبة فممكن تعتمدي على مضادات الهستامين الجيل الثاني التي لا تسبب تركين وطويلة التأثير مثل الديزلوراتادين أو الفاموتيدين
بتذكر أنو حبة وحدة باليوم
وجربتها بنفسي ولقيت مفعولها ممتاز لضبط التحسس كامل اليوم

وفيكي تستخدمي كروموغليكات لأنو مثبت لخلايا ماست والأسسات وبتمنع اطلاق الهيستامين من البداية
بس بذكر أنو بتستخدم بعدة جرعات باليوم


نشالله يا رب نخلص من حالات التحسس والاحتقان الصايرة وين ما كان

السلام عليكم

اقتباس

مضادات الهيستامين ما بتأثر على تحرر الهيستامين، بس بتخفف الأعراض الناتجة عنه  فهي بتمنع ارتباط الهيستامين بمستقبلاته.

يعني بتعالج العرض وليس المرض

رفيقتي قلها الدكتور أنو هي ما للعلاج متل ما قلتي ... بس قلها إذا أخدت دوا "ما بعرف شو كان بيقصد في ... بس بدو يكون مانع لتحرر الهيستامين" بشهر شباط - آذار (قبل ما يبلش موسم التحسس) فما بيصير معها هالشي هلأ

مع أنو ما قلي هالشي الدكتور ... بس اقتنعت بأنو ممكن يساعد أكتر من اللي منحاول ناخدو هلأ

اقتباس

فالأفضل تحددي شو هو العامل المسبب

متل الكل هالفترة ... السبب غبار الطلع اللي بيدوم تأثيره تقريباً من شهر 5 لآخر هالشهر

الدكتور وصفلي دوا ... خلصت العلبة وما تغير أي عرض غير التحسس العيني 

اقتباس

فممكن تعتمدي على مضادات الهستامين الجيل الثاني التي لا تسبب تركين وطويلة التأثير مثل الديزلوراتادين أو الفاموتيدين

اللي جربتو أول مرة هو "فسكوفينادين" وهاد اللي ما استفدت منو أبداً ... ورفيقتي نفس حالتي وما استفادت كمان

ومن فترة الصيدلية وصفتلي "سوبراناز" بيفيد للاحتقان والتحسس ... ما بيسبب النعاس ومديد التأثير ... المادة الفعالة فيه "لوراتادين" ... وجرعته حبة كل 12 ساعة

يمكن هو  من نفس زمرة اللي اقترحتهم ... وهو فعلاً أفضل من اللي قبلو ... خفف شوي بس ما زال الأعراض نهائياً

الغريب أنو مكتوب أنو هو لا يسبب النعاس ... بس إذا تجاوزنا الجرعة فبيسبب النعاس ... هو إذا ما بيسبب النعاس فيفترض أنو هو طبيعتو ما بينحل بالدسم وما بيعبر الـCNS ... فكيف ممكن يعبرو بزيادة الجرعة ؟؟ (معلوماتي على قدها    ... والا ما يكون في تفسير "ممكن ما يكون الو علاقة بطبيعتو" بس حسب اللي أخدنا ما بعرف شو التفسير)

اقتباس

وفيكي تستخدمي كروموغليكات لأنو مثبت لخلايا ماست والأسسات وبتمنع اطلاق الهيستامين من البداية

معناها يمكن هاد اللي ممكن يستخدم قبل ما يبلش التحسس 

ــــــــــــــــــــــــــــــــــــــــــــــــــــــــــــــ

شكراً جزيلاً إلكم عالمساعدة ... 

اقتباس

نشالله يا رب نخلص من حالات التحسس والاحتقان الصايرة وين ما كان

إن شاء الله... 

السلام عليكم


الكروموغليكات هو مثبط لإفراز الهستامين
فممكن تجربيه

بالنسبة أنو ما أعطى نتيجة الفيكسوفينادين فممكن

لأنو الاستجابة بتختلف من فرد للتاني

جربي دوا تاني من نفس الزمرة

وتأكدي من أخد الدوا بالجرعة والتكرار المناسب


حتى لو كان قليل الانحلالية بالدسم
بالجرعات العالية ممكن يوصل للـCNS
لأنو الدوا بيتوزع بكامل الجسم
لكن ممكن يتركز بمنطقة أكثر من التانية
فمافي مادة غير منحلة بالدسم بالمرة

السلام عليكم:

اقتباس

بالنسبة أنو ما أعطى نتيجة الفيكسوفينادين فممكن لأنو الاستجابة بتختلف من فرد للتاني جربي دوا تاني

من فترة قرأت مقالة عن أدوية التحسس ومشاكل فعاليتها، وبعض النصائح مثل أخذها قبل النوم ....... ولما يتم تبديل الدواء ينتظروا أسبوعين لحتى يحكمو على فعاليته..........


http://www.healthcentral.com/allergy/c/3387/139019/allergy-medicine/?ic=6101

لقلك حسب خبرتي بين أكتر من حدا بعرفه بيعاني من التحسس........

بإحدى السنوات عانيت من تحسس فظيع بالربيع (ووقت الفحص بشكل خاص) وكمان كنت متعرضة لمواد مخرشة بالكلية فزادت الطين بلة......فما ارتحت إلا على "كلاريناز" = لوراتيدين +مضاد احتقان......بس للأسف كان يعالج الأعراض بس ويسببلي نعاس -مع أنو المفروض ما ينعّس- بس لأني ما أتحسن إلا عليه، فأضطر آخده كل ما راح تأثير الحبة السابقة وأشرب قهوة تقيلة تصحيني لأعرف أدرس

- إذا وصلت الحالة لربو تحسسي يعني مع مشاكل قصبية وسعال فهون يمكن الدكتور يوصف مشتقات كورتيزون استنشاقي متل (كلينيل) لفترة زمنية بعدين بيتم إيقافه بالتدريج

- وفي ناس بتزيد عندهم الحالة سوء إذا كان عندهم انحراف وتيرة ولما يعملوا عملية بيتحسنوا

- وفي ناس حالتهم بتكون شبه خطيرة ومزمنة ميؤوس منها......هدول بيروحوا عند دكتور مختص بالتحسس وبيجرب عليهم اختبارات حساسية جلدية لشي 20 مادة وبيشوف أي مواد بتحسسهم وهون بيطلبلهم لقاح بيتاخد على فترة شي سنتين كل 3 أو 6 شهور وهالحل هو أكتر واحد فعال لأنو بيقضي على المرض من جذره (المواد المحسسة) بس بكلف كتير يعني جمعاً يكن شي 75 ألف


-- بس بشكل عام ما عدت تحسست لما جربت وصفة شعبية طول السنة:
اطحني بالبيت حبة بركة وحطيها بكمية كبيرة بقطرميز عسل لحتى يصير مر شديد...وكل يوم الصبح خذي معلقة منها......هي بتقوي المناعة بشكل عام



معافاية 

السلام عليكم


عنجد شكرا لكل مين شارك رجعتونا شوي لجو الصيدلة يلي نسينا من ورا الدمويات والصناعية... وشكرا لحساسية أسيل يلي فتحت الموضوع...

بس golden pill

شو هاد ماشاء الله صايرة صيدلانية وعطار بنفس الوقت....

عنجد يلي عندو حالة مثل هيك يطرحها وخلونا نتناقش فيها....