أهلين فيــــــــــــــــــــك - هلا بطلاب السنة الاولى

مشاركة : 37

Mr.RAP

جامعـي مبـدعـ

مسجل منذ: 27-09-2009
عدد المشاركات: 237
تقييمات العضو: 31
المتابعون: 3

غير موجود
اشــترك بالتحديثات
رسالة مستعجلة

فهرس بالدكاترة والمواد

13-02-2010 12:16 AM

مقدمة:
1.الموضوع بيجنن بس رح أعمل شوية update مو أكتر
2.بماإنو هاد الموضوع كبير كنت ناوي نزلو لحالو بس قلت هلق مابيثبتولي ياه و بيروح
مع الريح خصوصي إنو في كم مشرف دايق خلقون مني
3.بتمنى من أجيال السنة الأولى القادمة إنو كمان يحدثو الموضوع لحتى يصير موديل سنتو ((طبعا بالإذن من شريكي عمر بس بعرف إنو ما بيمانع ))
4.يجب أن تقرأ هذا الموضوع على دفعات مشان ما تمل
5.صحي إنو الموضوع كبير بس أنا حطيت فيه شوية ملطفات للجو مشان ما تملو
...............................................................................
رح بلش إحكي عن الدكاترة بكل مادة وعن المحاضرات بشكل عام للفصل الأول بس ومشان
ما ينحذف الموضوع أو يختفي فجأة (( متل العادة)) رح قلكم من هلق أنا مالي حاكي عن الدكاترة أي شي خارج نطاق الأدب و الاحترام

الميكانيك الهندسي:
القسم النظري:
1.الدكتور فؤاد تلتلو :عطانا أربع محاضرات عن أول فصل بالكتاب يمكن أنا وقتها كنت جديد فايت على الكلية مشان هيك مافهمت شي منون ويمكن لإني كنت نايم المهم أنت حاول تفهمون بتلاقيون مو كتير (صعبين )
2.الدكتور هشام المما:متل ما قالو فعلا هو بيعتبر سعرك بسعرو وخاصة لما وقف المحاضرة هداك اليوم وسأل الطلاب عن حل المسألة الصراحة أنا ما جربت إفهم منو لأني كنت نعسان متل العادة بس محاضراتو ما فيها شي سهلة حل مسائل بيشبه العملي شوي وماعد كتير قال كلمة زميل ما بعرف ليش
3.الدكتور شاهين غلاييني :عطانا جوائز شبكية و احتكاك بالجوائز افهمت عليه بس بالاحتكاك كنت مغمض العينين متل العادة ونتيجة لذلك تعذبت وأنا عم حاول إفهمون بس بالنهاية لقيت الاحتكاك سهل وقابل للهضم بس بدك شوية كولا
القسم العملي :
1.الانسة صقر :حبابة و عفوية ونصيحة ركز تفهم معها و ما تخاف تسأل لإنو إذا ما فهمت رح تتعذب لما تحاول تفهمون لحالك علاماتها العملي كتير عاليين كانو فوق ماتصورت أنا و كتير من رفقاتي وتصليحها عادل جدا جدا
2.الانسة قصار:ما درستني بس صرت سمعان من أكتر من واحد إنو علاماتها العملي بتبكي
3.رضا زيادة:ما عندي كتير معلومات عنها بس لما قريت محاضراتها حسيت إنو فهمانة
ملاحظة:يجب عليك جلب ألة حاسبة عند امتحان العملي ((كتير من رفقاتي نسيو يجيبوها))
الرياضيات :
القسم النظري:
1.الدكتور اسماعيل حمدان: درسنا الجبر فيني قول إنو هو الدكتور الباحث عن الكمال يعني ماعندو مانع يمحي التعريف 10 مرات بس مشان يكون أكتر دقة, مشكلتو إنو خطو مو حلو كتير أول خمس محاضرات ممكن تدرسون لحالك لأني حسيتون معلومات عامة عن المصفوفات وغيرها هاد إذ كنت دارس الباكالوريا بسورية أخر المحاضرات بالجبر هنن أهم شي أنا من ناحيتي لقيت الجبر سهلة وأسئلة الدكتور واقعية بس لازم تدرب على سرعة الحل
إذا ماكنت فاضي مو شرط تحضرون أنا احضرت كل المحاضرات و بالأخير متلي متل يلي عم يقرأون بالبيت لأول مرة بس ما واجهت صعوبة كتير

2.الدكتور طالب عمران:أنا بقول إنو مستواه المعرفي 1000 ضعف مستوانا وهنا تكمن المشكلة شلون بدك تفهم على واحد بمتل علمو أنا الصراحة كنت متل الأطرش بالزفة أو إذا بدكم متل الأجدب بالحفلة بس بعدين قريت المحاضرات على رواق بالبيت وزبطت أموري بالاستعانة شوي صغيرة بالعملي المهم تعطي كل محاضرة وقتها الكافي للفهم
أسئلة الدورات مفيدة بالنسبة لقسم الدكتور عمران
أنا إلي ذكريات مع الدكتور عمران لأنو أول قصيدة نشرتها بهل المنتدى كانت فيها شوية حكي عنو
هي الرابط إذا بدكم تشوفوها:
http://civ.jamaa.net/art250477.html
ملاحظة:لاحظتو إني كنت اكتب الردود المحرزة على شكل قصائد
وهي رابط تاني لتعرفو أكتر عن الدكتور طالب عمران:
http://civ.jamaa.net/art249705.html
القسم العملي:
1.الاستاذ عطائي:معليش يا جماعة ماحدا يحاول يدايقوه مشان ما تنزعجو وبقية المعلومات بتعرفوها من يلي كانو يحضرو عندو أنا ما كنت عندو
2.الانسة سبع:حاول تفهم بالحصة معها وهي كتير بتهتم إنو الواحد يفهم معها بقى حاول جهدك تفهم لأنو مو حلوة لما يجيك الدور ما تعرف تحل ((خزوة))

الوصفية:
القسم النظري:
الدكتور جمال معماري :محاضراتو خفيفة مقارنة مع يلي بيعطوه أساتذة العملي و ما بيختلف كتير بس أهم شي إذا بدك تحضر لازم تفهم مسائل الوصفية ولا تنسى تشتري النوطة تبعو مازال يستعمل كلمة ياطالب وفي كلمة جديدة هي موش إذا لم تفهم الكلمة إقرأ المثال التالي:
هاد المستقيم لا يوازي المحاور إذا هاد المستقيم موش أكسانومتري
القسم العملي :
1.الانسة جزماتي:يلي بعرفو عنها إنو فحصها العملي صعب والوقت مابيكفي حسب ما سمعت من الطلاب
2.الاستاذ مغربي :استاذ رايق كتير وحباب المهم تشغل مخك معو مشانك مو مشانو وياريت تسأل عن أي شي ما بتعرفوه لأنو المادة رح تكون جديدة عليك
........
وعلى فكرة أنا كنت متعقد من الوصفية وحاسس إني رح إحملها 4 سنين والسبب حكي العالم عليها بس إجت الأسئلة سهلة عكس ما كنت بتوقع
وقتها قريت أسئلة الدورات وألفت موضوع عليها هي الرابط مشان تتسلو شوي:
http://civ.jamaa.net/art250572.html
بقى لا تأخذ أي فكرة مسبقة عن أي مادة مشان ماتتعذب بدراستها و تذكر إنو نظرتك للأمور مو شرط تكون هي الواقع فمثلا يمكن تكون عم تشوف الموضوع بسنة 2011 ولمجرد إنك عضو جديد رح تفكر إنو الموضوع جديد لأ يا حبيبي صرلي سنة كاتبوه!!!
وهي كم حكمة أخدتها من الفصل الأول:
1.مافي شي ما بينفهم أنت بس دور على طريقة مناسبة للفهم
2. لا تبخل على حدا بمعلومة بتعرفها لأنك أنت رح تحتاج لمعلومة حدا تاني بيعرفها
كنتم مع برنامج ((حكم الحياة من Mr.RAP)) برامجنا لهذا اليوم :
برنامج إذا علق الخط بتربح-فترة إعلانات-برنامج اتصل يا مسكين و اخسر الملايين- فترة إعلانات-برنامج إحكي عن حبك وقول يلي بقلبك وبطريقك عبر عن رأيك -ثم فترة إعلانات تستمر إلى أن ينتهي البث
.......
المعلوماتية:
القسم النظري:
الدكتور عبد السلام زيدان:محاضرتو حلوة و قريب من الطلاب بيهمو إنك تحضر و بعض أسئلتو بتجي من المحاضرات و يلي ماحضر مابيحلها حتى لو كان عندو المحاضرة تبع الموقع تبعو وبيهمو كمان إنك تشغل مخك وما تبصم
ما بعرف يمكن يكون هلق عم يشوف الموضوع الله أعلم
الدكتور طلال شهابي:عطانا محاضرتين بالخوارزميات وأنا افهمت عليه و هو ماقصر بالشرح أو الاجابة على أسئلة الطلاب بس بالفحص كان مستوى الخوارزميات أصعب من يلي عطانا ياهم
الدكتور وليد العوض :عطانا محاضرة عن AutoCAD كانت سريعة بس لازم تركزو فيها منيح لأنو على الأغلب رح يجي سؤال بشي 10 علامات منها اكتبو مع الدكتور وافهمو لأنو بيجوز ما يلتقى بسنتكم واحد متل عمر ينزللكم المحاضرة بالمكتبة
القسم العملي:
هاد القسم بشكل عام كانت عم تدرسه أنسات بقى كل واحد لازم يسأل الانسة مشان يعرف شو بدو يجي بفحص العملي مو المفروض إنك تواجه مشكلة كبيرة بالعملي وحاول تجيب علامة عالية مشان تدعمك بالفحص النظري, بالنسبة لإلي هلق العلامة ممكن تحملني المعلوماتية أو تخليني رفعها لسه ما طلعت العلامات بقى الله يستر

الفيزياء:
الدكتور محمد علي الحجي:أنا درست محاضراتو وفهمتون مو معو لحالي بالبيت وهو قال إنو مابيجيب نظري من خارج المحاضرات وفعلا ماكذب خبر محاضراتو للأسف بتنعس خصوصي إذا ما كان جاية على بالك حبيبي ((مدري ليش اتذكرت اليسا)) تحضر
ماكنت إفهم محاضراتو بس بعدين شغلت المفاعلات النووية تبع مخي مشان إقدر استوعب
ما بعرف حسيتو بيحب الجنس اللطيف أكتر منا نحنا الجنس الخشن يمكن لأنو نحنا خشنين
مسائل الفيزياء هي عبارة عن عالم تاني ورح تتعذب فيون شوي متل ما أنا .......... شوي
الدكتورة كلثوم بالعالية:عطتتنا أخر 3 أبحاث بالفيزياء, يعني القراءة من جهاز الاسقاط ممكن أي واحد يعملها بس ببيتو ومن الكتاب وعلى راحتو ومع قهوتو و قطتو و سمكتو
القسم العملي:
حسب الاستاذ المشرف ((مدري ليش كلمة المشرف عم تعملي عقدة نفسية)) بتعمل تجارب حلوة وبتخبص مع رفقاتك أنا كنت أحيانا شوف نتائج التجربة عند شي زمرة تانية مشان أخد فكرة
بس انتبهو أسئلة فحص العملي قسم كبير منها بيجي من أول 3 محاضرات نظري بالمخبر, بالنسبة لإلي إجت الأسئلة كلها من أول 3محاضرات ما عدا قياس الاطوال تبع ((قدم قنوية و دوارة لولبية )) يمكن كانت رابع محاضرة , نمط الاسئلة بيكون إنك تقرب كم عدد وترسم شي خط بياني ومسألة ارتياب و أحيانا كم سؤال عن التجارب ((انا كنت عند الاستاذ غسان بس ماعطانا أسئلة عن التجارب بقية الاساتذة على الأغلب بيجيبو أسئلة من التجارب ))

اللغة:
الانسة سماح:هي بتقول إنو أنا بضمن ليلي ((للذي)) بيحضر عندي إنو يرفع المادة و بمعدل بس انا ما اقتنعت بهل الكلام كانت تاخود((تأخذ)) أسماء تفقد وعلى أساس إنو بتعطي لجهاز الأتمتة نسبة حضور 20% بس كمان أنا ما اقتنعت كتير بهل الكلام((هلق عرفت ليش بيقولو القناعة كنز لا يفنى)) الصراحة ماحسيت حالي استفدتت من الحضور و كتير من رفقاتي رفعوها تمانينات من غير حضور طبعا أسئلة هي الانسة صعبة و فيها سؤال ((وين الغلط بالجملة خيارات a or b or c or d )) و إذا صح اختار e هاد عليه شي 30 علامة إذا ماخاب ظني
- نسبة النجاح على أيامنا 45% على ايامكم مابعرف إذا رح تضل هيك ((النسبة مو الانسة))

الثقافة:
الدكتور محمد ابراهيم وردة:دكتور محترم كتير وفعلا إذا بتحضر محاضراتو بترفع الثقافة وبمعدل لخص الكتاب كلو وركزلنا على الشي المهم ما إجى شي من خارج حكيو وانتبه كلشي بيقول عليه إنو هام فهو هام وكتير ممكن يجي بالفحص

ملاحظات:
1.إن هذا الموضوع رأيي الشخصي الناتج عن تجربتي الشخصية و خبرتي الشخصية مو شرط يعبر عن الحقيقة طبعا أنا حاولت صيب الواقع بنسبة كبيرة بس بالنهاية كل واحد إلو تجربتو الخاصة
2.مابدي تشكروني على الموضوع بس بدي تدعولي إذا استفتدو منو وبدي ما تدعو عليي إذا ما استفتدو منو

سلاااااام ياحلوين

« عرض آخر مواضيع العضو »

ملتقى طلاب جامعة دمشق

أنت غير مسجل لدينا.. يمكنك التسجيل الآن.