هلا بطلاب السنة الاولى - منتدى جامعة دمشق

.هلا بطلاب السنة الاولى

OMAR.SCH

عضو ذهبي

مسجل منذ: 12-08-2009
عدد المشاركات: 2095
تقييمات العضو: 57
المتابعون: 14

غير موجود
اشــترك بالتحديثات
رسالة مستعجلة

هلا بطلاب السنة الاولى

30-08-2009 10:20 PM

اهلا بطلاب السنة الاولى

السلام عليكم و رحمة الله و بركاته

هي نتائج القبول الجامعي تبينت و كل واحد عرف بالنهاية شو طلعلوا و يلي بهمني بالدرجة الاولى هم الطلاب يلي طلعلون هندسة مدنية
اول شي بحب هني كل طالب تم قبوله بكلية الهندسة المدنية و انشا الله بتكونوا (( و نحن ايضا )) من الناجحين بحياتكم
يلي بحب قولوا الكم يا زملائي بالسنة الاولى هي كم نصيحة و انتم حرين بتقبلها او لا ؟؟
اول شي حابب قلكم انو كلية الهندسة المدنية (( و هاد بنظري )) احلى كلية بكل جامعات العالم و بدون مبالغة رح تسالوني ليش طبعا و حسب خبرتي البسيطة لانوا تقريبا نهتم بدراسة كل الامور التي تهتم بالحياة

بالنسبة للنظام الدراسي رح حطكم بالصورة للمواد يلي رح تاخدوها بالسنة الاولى وشرح بسيط لكل مادة :

عدد المواد يلي رح تاخدوها بالسنة الاولى هي 15 مادة و طبعا علامة النجاح بالمادة 60 و في مواد لها امتحانين عملي و نظري و في الغالب العملي من 30 و النظري من 70 اهم شي تحصر عملي مشان تاخد علامة ويجب ان تكون حوالي 20 وطالع (( حسب اجتهادك و حظك )) .

المواد هي بالفصل الاول :

اولا : الهندسة الوصفية :

المادة لها قسمين الهندسة الوصفية يعطيها الدكتور جمال معماري بمحاضرات النظري و اهم شغلة تحضرها و ما تقطعها لانوا الدكتور له اسلوبه في اعطائها لذلك نصيحة احضروها بالنظري مشان تفهموها و القسم الثاني هو الرسم الهندسي و فيها بتاخدوا المناظير الايزومترية واستنتاج الواجهات و المساقط و المقطع منها
و بعدين بتصير العملية اصعب شوي فبتاخدوا مسقط وواجهة لتستنتجوا المنظور (( الشكل الفراغي للمبنى )) و هاد السؤال يلي رح يجيكم بالامتحان و هاد الشي يلي رح تشتغلوا في بالعملي .
لازم اهم شي قلم رصاص بنصكم نوعية rotring و بريات من النوع نفسه و مثلث وصفية و محاية و مسطرة دوائر ومسطرة القطوع و انتبها اذا ما كانت rotring فلازم يكون فيها القطع 60 و مسطرة منحنيات و دفتر رسم canson

ثانيا الميكانيك الهندسي :

احضروا العملي اهم من النظري مشان المسائل لانو بالعملي تحل نسبة جيدة من المسائل يعني اكتر من النظري .
علم يدرس توازن الاجسام يعني كيف بتحسبوا ردود الفعل و قوى الاحتكاك و العزوم و اهم شي تجيبوا الة حاسبة علمية و انا من جهتي بنصحكم تجيبوها ماركة Casio fx 991 es وحط خطين تحت Es من الحلبوني لانو اغلبية المكتبات امام الكلية يبيعونها بسعر 1000 او 1200 ليرة و هي بالحلبوني سعرها بالكتير 800 ليرة .
و الامتحان النظري للمادة عبارة عن ثلاث او اربع مسائل مسالة قوى و مسالة اطارات و مسالة جوائز شبكية و مسالة احتكاك .

ثالثا الفيزياء :

قسم العملي تقريبا ما لو علاقة بالنظري بدكم دفتر فيزياء عملي و الة حاسبة و ديروا بالكم على اول محاضرة عملي اكيد بيجي منها سؤال بالامتحان العملي و التجارب يلي بتاخدوها يعني حلوة بس المهم كل تجربة اكتبوها على الدفتر مشان علامة العملي .
النظري بيعطي الدكتور محمد علي الحجي (( على الاغلب )) و الدكتور كتير جنتل و بيبخل بالعلامات بالفحص النظري لذلك لا تخافوا منه و بيعطي قسمين الاول قوانين نيوتن و السوائل و الضوء و الثاني كهرباء مثل قوانين اوم و الحقل الكهربائي و الحقل المغناطيسي و النظائر

ملاحظة سمعت انو الدكتور رح ينزل كتاب جديد و بس لشوفوا ممكن حطلكم الشغلات الهامة فيه

رابعا : الرياضيات :

لها قسمين عملي و نظري و كمان النظري من 70 و العملي 30
بالنظري بيعطي الدكتور طالب عمران و يلي بيعطي بالنظري هو التحليل من تكامل و تفاضل و سلاسل و نشر و نهايات التوابع بتنحل عليه مسائل بالعملي
بالنظري بيعطي الدكتور معن الازهري و اذا عطى هي السنة فبتكونوا كتير محظوظين لانوا الدكتور كتير فهمان و يلي بيحضر بيفهم المحاضرة على الاكيد لانو الو اسلوب رائع بسرد الموضوع و شرح الافكار و هو بيعطي الجبر من كثيرات الحدود و اصفار كثير الحدود و كيفية ايجادها و بعدين بيعطيكم المحددات يلي اخدتوها بالبكلوريا بس هون المحدد من الدرجة و ليس من الدرجة الثالثة كما في البكالوريا و اكيد بيجيب منو سؤال بالامتحان و بعدين بيعطي المصفوفات و كيفية ايجاد المقلوب لمصفوفة مهما كانت درجتها و قسمه ما بينعطى بالعملي بس على الاغلب تكونوا مطالبين فيه بالامتحان العملي .
ملاحظة صغيرة انا حسب سمعت عن الدكتور معن انو هي السنة بدو يعطي بجامعة خاصة و قدم طلب اجازة بلا راتب (( مدري مع راتب مو مهم )) مشان يعطي بجامعة خاصة قولوا ان شاالله تكون الخبرية يلي سمعتها كذبة .

خامسا : اللغة الاجنبية :

سهلة كتير على يلي كان فهمان باللغة بالبكلوريا لانو بتعتمد على جميع النكشات يلي كانت تواجهنا بالبكلوريا متل الافعال يلي ما بتقبل الاستمرارية ....... الخ و بالنسبة للكتاب ما بدكون ياه انا من جهتي رفعت المادة بالدورة الاولى بدون حضور و بدون كتاب 92 لذلك لا تخافوا طبعا الحكي للغة الانكليزية و يلي كان شاطر بالانكليزي بالبكلوريا .
فالكتاب و الحصور غير هامين لترفيع المادة (( على ايامنا و ايام السنة الماضية ))

سادسا : الثقافة :

بتجيبوا الكتاب و بتنسخوا بذاكرتكم لترفعوها بس ما فيها ظلم و اكتر من هيك ما بحسن انفعكم .

سابعا : المعلوماتية :

المحاضرة الاولى هي نظري و بيجي منها بالامتحان سؤال تعاريف و نظري و بعدين بتاخدوا انظمية العد العشرية و الثنائية الثمانية و الست العشرية و كيفية التحويل من نظام الى اخر و بعدين الانترنت و تطبيقاتو كمان نظري و بيجي منه بعض التعاريف و بعدين اهم شي بالمعلوماتية الخوارزميات و اكيد جاية منها سؤال بالامتحان لا يقل 15 الى 20 علامة و بعدين قواعد المعطيات و كيفية انشاء الجداول و بيجي عليها سؤال بشي 10 علامات و اهم شي زملاء انو بالامتحان تحلوا الخوارزميات مشان ما يكسر علامتكن بالفحص اوكي ؟؟؟

وانشا الله قريبا رح نزللكم بعض المحاضرات يلي ممكن ناخدوها
و نصيحة اخوية جيبوا و بعيدا عن الدعاية و التجارة اهم شي و اهم من الحصور و اهم من كل شي تجيبوا اسئلة الدورات المحلولة من مكتبة ركن الهندسة

يالله انشا الله الف مبروك مرة تانية و منحكي بها لموضوع غير يوم انشا الله
بس لاتنسوا تدعولي شي دعوة حلوة متلكم !!!!
موفقييييييييييييييين

« عرض آخر مواضيع العضو »

الضمير

راحـــــــــة البال

مخافــــــــــــــــــــــة الله

أنت غير مسجل لدينا.. يمكنك التسجيل الآن.