مرحبا يا شطورين ,,,

قبل ما بكرا اتداومو ,,, حبيت قلكن وين بدكن تحضرو محاضرات العملي ,,,

بسم الله نبدأ

تشريح الرأس و العنق ,,, بمشرحة الطب البشري ,,, بتروحو على الطب البشري و بتحضرو هل المحاضرة العملية ,,,,

الفيزياء الطبية و الكيمياء الطبية ,,, و علم الخلية ,,, بمخابر علوم الحياة بالطابق الأرضي ,,,

بقيان تشريح الأسنان ,,, بعتزر و الله الظاهر انسيت ,,, بس أظن بالطابق الرابع ,,, و لا يهمكن هلأ شي واحد من طالب التانية بقلكن ,,,,

و بخصوص الدوام حاولو دائماً إنكم تتواجدو قبل بوقت  ,,, نص ساعة تقريباً ,,,

طبعا المحاضرات النظرية ,,, بالمدرج الأول ,,, كمان بالطابق الأرضي ,,,

و اي استفسار آخر لا تتردو ,,, بالتوفيق للجميع

سلامي 

مرحباً شباب و صبايا الأولى 

ما شاء الله اليوم شفت تدفق طلابي كبير على المدرج الأول  ,,, و الكل متحمس لمحاضرة التشريح  ,,, أكيد استمتعتو بالجمجمة   ,,,, بس على فكرة وصلنا خبر انو أعطاكن بحدود ال 38 صفحة بس  ,,, يعني مراعيكن على المزبوط  ,,, نحنا أول محاضرة تشريح انسفقنا 79 صفحة  ,,, يعني هل السنة باين دعم على المزبوط ,,,,
على فكرة الدكتور يوسف مخلوف ,,, روعة و روح رياضية و لا أحلى من هيك  ,,, يعني ناقشوه و اسئلوه ما بيحكي شي ,,, و حاولو تنبسطو و انتو عم تاخدو المحاضرة ,,,,

و احكولنا شلون الوضع اليوم ,,, انبسطتو ؟؟؟,,, في شي مكان ما اعرفتوه ,,, على أساس أنا بعرف الكلية كلها ,,, متاااااهة ,,,

يلا موفقين و شو ما تحتاجو نحنا جاهزين  , , , , ,

سلامي الحارة للجميع

هلا أختي بيان ,,,,
بسيطة بخصوص أنو المحاضرة طويلة و ممكن اتكون ناعوسية على المزبوط ,,,
بس بدك نصيحة لوجه الله تعالى ,,, حضري المحاضرة قبل ما اتروحي ,,, و جيبي اطلس و حاولي اتشوفي الاشياء اللي بدو يعطيكن ياهن قبل المحاضرة ,,, هيك وعد علي ما رح اتنامي ,,, لانو كل كلمة رح يقولها رح اتضلي متزكرة مكانها من خلال تحضيرك لهل المادة خصراً هية و تشريح الأسنان ,,,

و بخصوص أنو المكيفات و المراوح و الله أكبر مو موجودة ,,, لا لا ابشري موجودة ,,, بس مطفاية :D
بلكي نحكي مع جماعتنا بالكلية و نقدم اعتراض كبير باسم طلاب الجامعة مشان يشغلوه ,,, مع أني أظن أنو شغال بس ما شاء الله على تحمسكن الكبير و عددكن الله يحميه ما رح اتحسو بالمكيف ,,,
بس يلا هية فترة صغيرة و بتعدي ,,, و بتصيرو مجمدين من البرد ,,, وقتها بتنطو مرة تانية شغلونا التسخين ,,, و لا يهمك هاي أمور روتينية رح تتعودو عليها ,,,,

هلأ هاي المادة هديك السنة كانت من كتاب تشريح الرأس و العنق للدكتور يوسف مخلوف و ان شاء الله ما أظن رح يشلف محاضرات لانو كتابو بجنن كتير كتير كتير و منظم بطريقة سلسة و مفهومة ,,,
انتو اسئلوه للتأكد بس انا متأكد انو ما رح يغير الكتاب ,,, و لا حتى رح ينزل محاضرات ,,,

بس متل ما عم قلكن ,,, حاولو تدرسو على الاطلس من غيرووووووووو ما بيمشي الحال أبداً ,,, ركزو على الثقوب و شو بمر منها ,,, من أعصاب و أوعية دموية ,,, مثلاً الثقبة فوق الحجاجية بمر منها العصب و الأوعية فوق الحجاجية ,,, و المجاورات ركزو عليهن و حاولو تهضمو المادة مليح و اتركزو عليها ,,, يعني التشريح التشريح التشريح ,,, بكرا بتتخرجو و بتصيرو أطباء أسنان و شاطرين بس يوم من الايام رح تحتاجو التشريح و اتقولو يا الله شو كانت مهمة هل المادة ,,,

إلي رجعة ان شاء الله بس مضطر اطلع لسبب ضروري برجع و بكملكن بعدين ,,,
بالتوفيق شباب و صبايا

و عليكم السلام و رحمة الله و بركاته ,,, أهلاً أختي ثواب ,,,,
الاطلس هو عبارة عن صور إما الكترونية أو ورقية تتضمن صور العضلات و الجماجم و الأعضاب أي التشريح كاملاً للجسم ,,, طبعاً يتم ذكر اسم كل عضلة أو عظمة أو عصب ,,,

الاطلس الورقي في عندكم الكمال الجزء الثالث ,,, ظريف ,,, بس ما رح تحتاجوه غير هل الفصل مؤقتاً,,, لهيك بفضل اتجيبو الأطلس الالكتروني ,,, و اللي هوة عبارة عن برنامج الكتروني ,,, ممكن على حسب اقتراح الأخت بنت القيصر انساويهن سيديات و انوزعهم على الكلية ,,, أو ممكن تلاقو أطلس من المكتبة أو السوق ,,,

اقتباس

و هلا التشريح مهم صح بس شو مشان كاني ما فهمت شي من المحاضرة
لانو الدكتور ما خلا عظمة بالراس إلا و حكى اسما بقى ما حفظت معو شي

اي اختي شي طبيعي ما تفهمي مو بس انتي الكل ما بلومكن لانو فعلاً محاضرة طويلة كتير ,,, بس أبشرو الدكتور اللي عم يعطيكن يوسف مخلوف يعني روقو على المزبوط كل ما تمرق شغلة قديمة بيرجع بعيدها و بحاول أنو تتزكروها مع بعض ,,, عداكي عن هذا أنو التشريح العملي ما هوة إلا تثبيت للمعلومات النظرية اللي أخدتوها ,,, رح يرجع الدكتور العملي يعيد أهم الفقرات و أهم المسميات ,,, بس برجع بقلكن ,,, رح تتعبو بالتشريح إزا ما درستوه أول بأول ,,, و ركزتو دراستكن على المصورات ,,,

يعني باختصار المحاضرة العملية لازم اتفوتو حافظين النظري و فهمانين كلشي ,,, و بعدين كلشي بيسهل عليكن باظن الله ,,,

و بلكي شباب و صبايا التانية إزا عندن أي معلومات تانية ممكن يفيدوكن فيها ,,,,
بالتوفيق شباب و صبايا ,,,,
سلامي الحار للجميع ,,,,