بسم الله الرحمن الرحيم


اليوم حبيت اني حطلكن ملخص عن مواد السنة الثالثة الفصل الثاني حسب وجهة نظري ومن خلال اللي واجهته انا واللي حواليي في العام المنصرم


الفصل التاني بالسنة التالتة....يعني يمكن ما رح  تحسو عنجد بالهفصل الا لما توصلوا لآخرو لما رح تدرسوا المواد عن جد



على كل مشان ما طول عليكن المواد هي كالتالي



1 - هندسة الإمداد بالمياه

هي المادة بيعطيها بالعملي دكتورين الدكتور الاول هو بشار المفتي اللي رح ياخدكن الرحلة بعد فترة قريبة والدكتور التاني هو الدكتور عبود
وكل دكتور قسمو بيتألف من 50 صفحة نظرية لا أكثر فيهن كتير حفظ وخاصة بالنسبة للدكتور عبود اما قسم الدكتور المفتي فهو اسهل واكثر سلاسة

وكمان القسم العملي بتعطيه مهندستين المهندسة الاولى منصور والتانية بلال (طبعا هي اسماء عيلن) بس المهندسة بلال رح تعطي السنة الرابعة حاليا بقى ما بعرف مين حيعطيكن غيرها

القسم العملي لهي المادة صغير جدا وسهل جدا جدا

يعني لا بيتعب ولا بيخوف


ومشان حضور النظري فأنا بالنسبة الي ما حضرت ولا محاضرة ابدا ابدا ابدا
يعني النظري مانو معقد ومو بحاجة لحضور (طبعا هالنصيحة ليلي ما بيحبو الحضور)





2- الخرسانة 1


طبعا هي المادة اللي بتسمعوا عنها انها البيتون وانتوا اخدتوا الخلطات منها الفصل الماضي بمواد البناء 2

الخرسانة 1 مادة ليلي بحب المسائل وربط "عشرات" الافكار مع بعضها بنفس الوقت رح تكون ممتعة

ولو انو لكتير ناس كانت كارثة


المادة بقسمها الاول رح تاخدو الاعمدة بالطريقة الكلاسيكية والحدية بعدين بتفوتوا بالانعطاف كمان بالحدية والكلاسيكية.....وبالانعطاف رح تحسو انو المادة فاتت ببعضها

وطبعا بتاخدو بهي المادة التشوهات والسهم وغيرها

وأكيد لازم تشتروا الكود تبع الخرسانة لانو رح تستخدموه طول الفصل وبالخرسانة 2 وكمان بقية الخرسانات


ونصيحة بخصوص هالمادة انو لازم تتابعوها من الاول والا رح تحذفوها بعد ما تيأسوا منها لانو المادة ضخمة جدا

وطبعا لسى ما حكينا عن النظري اللي هو كتاب بالاساس للري والصرف بالاضافة لنوطة للدكتور الاخير



يعني المادة باختصار كبيرة جدا وبدها تعب وهز كتاف ولكنها.....ليست مستحيلة(طبعا هي وجهة نظري )



لذلك متل ما اتفقنا عملو متلي ودرسوا المادة اول باول بترفعوها دغري ان شاء الله





3- المنشآت المعدنية 1

هي المادة هي بداية سلسلة المعدنية 1 و2 يعني السلسلة صغيرة بعد ما قصوها لانو بالسابق كانت المعدنية من 1 ل 5

ورأيي الشخصي انو المعدنية ممتعة جدا وانها انظلمت بقرار العام كتير لانو بعد ما اخدنا معدنية 1 و2 ....يعني متل اللي اخد من الجمل ادنو

هلأ المعدنية 1 مادة كبيرة مو صغيرة

اول كم اسبوع بالعملي رح يشطو ويمطو بمواضيع بسيطة وبعدين بيبلش الركض والتعويضي....ولحق اذا بتلحق


طبعا المادة بتعتمد عالكود البريطاني اللي اكيد بتكونوا اشتريتوه وهاد اذا نسيتوا يوم الفحص بوشك عالبيت لانو فوتك بتكون متل قلتها


المادة بدها بصراحة شغل ومتابعة بالعملي كتير


وبيدرس المادة الدكتور بشار سلهب والدكتور مصطفى بطيخة والدكتور درويش

الدكتور سلهب اقسامه لذيذة وسهلة ومضمونة بالفحص دوما
الدكتور بطيخة اقسامه الله لا يورجيكن ونحنا بالفحص جبلنا سؤال واحد (خازوق )
ب 40 علامة
الدكتور درويش بيعطيكن تلات محاضرات بسيطة وسهلة عن الوصلات



بشكل عام حضور النظري منيح ما بيضر بس صدقونوا ما رح تلحقوا تدرسوا محاضرات النظري
وخاصة  محاضرات قسم بطيخة فيها توسع كتيييييييييييييييير


لذلك اهتموا بالعملي كتير






4- انشاء الطرق وهندسة المرور


هي المادة قسمين طرق ومرور الطرق هي اللي عليها علامة العملي لانو عبارة عن مشروع واحد

وكل واحد وحظوا ممكن تجوا عند دكاترة بالعملي او مهندسين وفي منن كتير متساهلين وفي كتير متشددين ورح يطلعوا روحكن بالمشروع


القسم النظري للمادة غالبيتو استنتاجات ومسائل وخاصة بقسم الطرق

اما قسم المرور فدكتور المرور ما شفتوا بس بحبو يعني النوطة تبعو صغيرة وسلسة بس بدكن تفهموها وتفهموا مسائلها لانها بتجي بالحرف بالامتحان


اهتموا بالمشروع شوي مشان تضمنوا علامة العملي


ومشان حضور النظري انا ما حضرت ولا محاضرة




5- الانشاءت 2

وهي المادة اسهل من الانشاءات 1 بكتير يعني هي مو صغيرة بس قسمها الاول سهل وهو مصفوفة المرونة بعدين بتاخدو مصفوفة القساوة وبعدين بتاخدو الشبكات الصلدة وبعدين بتاخدو التحليل اللدن


المادة بالمقارنة مع بقية مواد الفصل تعتبر من اسهل المواد


اهتموا بالعملي وبتترفع بسهولة




6- التربة 2

ويا لطيف عالتربة 2

واحقر شي فيها فيها انو قسم العملي غير النظري.....يعني عالفاضي.....بس اهتموا فيه مشان تضمنوا علامتو



المادة بصراحة كتير كبيرة ويعني هي المادة تصنف من عقد الكلية
اللي بتضم
الميكانيك 2 والانشاءات 1  ومواد البناء 1 وهيك شي


المادة بصراحة على زماننا كان الحظ هو العامل الاجمل فيها
يعني الترفيع كان من الدكاترة لالنا بعد ما ((خوزقونا بالامتحان)) لانو لو ما ساعدونا كانت نسبة النجاح تحت الارض



بتمنى كون عطيتكون لمحة ولو سريعة عن المواد وبتمنى تستفيدوا منها


واذا عندكن اي سؤال انا جاهز



مجد

شكرا على الشرح الوافي والممتاز للمواد لأنو  عنجد الواحد بيكون ضايع وفايت بالحيط بأول الفصل .
شكرا كتيييييييييييييييييييييييييييييييييييييييييييييييييييييييييييييييييييير........

الله يعطيك العافية أبو الجود

باينين المواد سهلين ....ههه


هي الموضوع ثبت


ليتم بعد ذلك ...تصنيف المواضيع


ومشكوركتير

الله يعطيك الف عافية مجد ومشكور كتير

الله يوفقك

                                                       

شكرا مجد

بدي اسالك الخرسانة عم يعطينا العوا
والطرق جوني
خبرنا شوي عن الدكاترة

الله يعطيك العافية على المعلومات يلي كنا بانتظارها منك

حاسة أنو في بعض الاختلاف بالدكاترة

بس ضغط المواد  نفسه والحمد لله 

إن شاء الله بمر هالفصل بسهولة ...أنا متفائلة والحمد لله

أهلا وسهلا فيكن يا جماعة وبتمنى تكونوا استفدتوا من الموضوع


en.chirk
شكرا كتير لالك.....



Mo7amad
الله يعطيك العافية وشكرا عالتثبيت لتعم الفائدة.....والله يكون معك بتصنيف المواضيع




MEMO.CSH

اهلا وسهلا



keko_the_best
بالنسبة للخرسانة بعرف انو بلوط بطل يعطي خرسانة.....وحاليا العوا هو احسن شخص بيعطي خرسانة هو صحيح رح يهريكن تعويضي....لانو بيماطل كتير بس الاستاذ فهمان...وحتلاقي الكل بدن ينقلو لعندو لانو كل الاكبر منكن هيك رح ينصحو بعد ذهاب بلوط


ومشان المهندسة رباب جوني فانا اجيت عندا بالطرق 2

بصراحة المهندسة رباب فهمانة وبتحب الطالب الفهمان....وبتحب كل كلمة تحكيها تلتزم فيها
اللي سمعتو من رفقاتي لما اخدو عندا مشروع الطرق 1 انو جننت سماهن..بس عطتن علامات


ومشان بقية المواد خبرني شو بدك وانا بجاوبك تكرم....لانو المهندسين كتار ويمكن تغيرو بقى حددلي عن المهندسين والدكاترة وانا بخبرك





مجد

شكرا مجد ع ردك الله يعطيك الف عافية ما بعرف كيف بدي اتشكرك
يسلم ايدك يا رب
بس دخيل عينك لا تحاكيني بصيغة المؤنث

يعطيك العافية مجد ,,,,شكرا ً كتري على النصائج

بس شو من شان التربة ,خوفتني منها ............

و بدي اسئلك شو رآيك بالكتاب نجيبوا و لا متل قلتوا


سلاممممم

keko_the_best


شكرا مجد ع ردك الله يعطيك الف عافية ما بعرف كيف بدي اتشكرك
يسلم ايدك يا رب
بس دخيل عينك لا تحاكيني بصيغة المؤنث



------------------------------------------------------------


له الله يسامحك وين صيغة المؤنث بالموضوع

والله يسلمك ولا شكر على واجب
واذا عندك اي سؤال تكرم عينك





مجد