امبارح ياشباب ولما كنت عم قدم مادة القانون الروماني ..ولما كنت عم حاول حل طلاسم الأسئلة اللي جابتلنا ياها الدكتورة_____ اتفاجأت (ومتلي متل كل الطلاب) بصيغة الأسئلة (5 أسئلة لكل سؤال 20 علامة) الي كانت عبارة عن ذكر اسم بحث من 20 أو 30 صفحة بالكتاب وحل اذا فيك تحل....المهم..بلشنا نطلب الدكتورة  لنفهم شو بدها من الأسئلة.ولما قلت للمراقبة انو بدي الدكتورة بترد عليي وبتقلي:ليش ما سألتها بس كانت هون ..الدكتورة ما بتفوت عالقاعة أكتر من مرة...وهون انا اتفاجأت لأني ماني دريان انو الدكتورة فاتت عالقاعة..قام تاري طلعت فايتة عالقعة (عالهسي) مبتسمة وماشية. يعني الأمن مستتب وما في داعي تنطق بجملة (حدا عندو سؤال)

والله ليوم صار معي شغلة
نزلت على كلية لقدم فحص من ساعة 8
بتفاجاة انو مو منزلين توزيع قاعات للمادة حاطين توزيع قاعات للمادة غير
انا هون انصدمت   
والا طلع انا مخربطت مادة مالية عامة فصل تاني مو ليوم بكرا مو 2 شهر 3 شهر
هيك اكلنا رعبة فكرت مادة مبارح وراحت علي لحتى شفت برنامج وطمنت    
شفت رفيقي سنة رابعة قلي عادي مالية بتفوت بلحيط  

@hero@

فاتت عالهسي    .. وقلتلي الأمن مستتب 
ياصاحبي مو قصة أمن مستتب بالقاعة .. بس القصة انو أول نص ساعة بقضيها الطالب بين انو يطلع من الصدمة   شوي بعد ماشاف نموذج الأسئلة ..
وبين انو عم يفكر من أين تأكل الكتف ليقدر يجاوب ..
وتاني نص ساعة ببلش يحس انو الوقت رح يخلص وماعاد يلحق .. فببلش يركد ركيد ليكتب ولو مو متاكد من الجواب

بس سؤال فني كيف فاتت الدكتورة وماحدا شافها ..!!؟
ليكون مابتعرفوها بالحقيقة ..  
أو كل اللي بالقاعة يعني شي 200 طالب مو ..
كلو كان مبلوش بالأسئلة  وعم يدح فيها دح ..فماحدا انتبه

سيدي ان شاء الله خير .. وبالتوفيــــق الك وللشبيبة البقايا كمان ..

lord615

اي بسيطة صديقي
قصتك بتصير وبأرقى العلائلات .. بس ممكن غربطت بدوام .. بموعد .. بس مو مادة فحص ههه
معناها قديش كنت حابب هالمادة وعم تحضرلها .. !!!؟ 

عكلن لقيتلك فتوى لقصتك .. لنزت الحق عالكلية
ياسيدي أول شغلة انو طلاب الحقوق بقدموا بمية مطرح وقت الامتحانات .. وبيعملوا زيارة لجيرانا الحبايب اللي ملوا منا ونحل عليهم غلاظتنا ..
وتاني شي كل الكليات بتحط توزيع الأرقام قبل بيوم .. الا نحنا أحيانا ع آخر نفس 

شلوني معك .. ريحتك من الحمل مااااا   ..
والله يريحنا من هالشغلتين ويطعمنا الاستقرار بكليتنا 

ضحكتني  .. يعني هالخبرية طمنتك وريحت بالك .. الله يخليك هالرفيق
عكلن الله يبعدك عن الحيط  .. وينجحك بالمالية ...

و ناطرين الشبيبة البقايا ... ليحكولنا شوي من يومياتن ومغامراتن بكليتنا الموقرة
وخاصة هلأ بهالوقت بعد الفحوصات .. بتكون القصص كتيرة وتازااا 

تحيـــاااتي

مرحبا أنا كتير بشكرك ع هل الموضوع الكتير حلو
في موقف من المواقف يلي بذكرو هلا
ساويتو انا مع رفيئتي
كانت يا حرام أعدة بمحاضرة الاحوال
وطبعا بيعم الصمت والهدوء ويتجلى الخشوع والرهبة من الله ومن بطش القانون بهل المحاضرة بس الهدوء طبعا ناتج من نوم الطلاب هنن ومفتحين عيونن
أسفة فتت كتير بالتفاصيل
فكانت رفيقتي شاردة بالمحاضرة وعم تتأمل بملكوت الله
أم أجيت ابعتلها رسالة 
تاريها حاطة الموبايل ع أعلى وضع
والا بيصرخ الموبايل بنص المحاضرة وبيفيق تلت رباع الهنغار
وتتطاير نظرات الدكتور المعباية شر وحقد من هل الاغاني الفاسقة
وبتحسو عم يقول بعيونو انا الدكتور اضرب واطرح حاطط الموبايل ع الصامت
فياحرام حاطة الموبايل بسابع أرض ولح تخلص  هل الغنية وما كانت تلاقي فيا حرام
شو صار فيها
فندمت من يوميتها أعم مقالب بنص المحاضرات




ومشان الهنغار والله كتير بحبو  لان بحس حياتنا  كلها قضيناها فيه ومو حابة داوم بالحقوق القديمة 
صحي مرتبة واحلى
بس شو بدك تساوي غاوين فقر
والله القعدة ادام الهنغار بتسوى الدنية وماعليها أيام الدوام
شكرا مرة تانية ع هل الموضوع
لان هدول المواضيع يلي بحبن يلي بيكونو متعلقين بالكلية والجامعة
فبتشعر فيهن بالانتماء


سلام

عاشقة المطر

والله الجولات بالمحاضرات قصتها قصة

واذا أغنية نص مصيبة .. مرة صوت مدري كيف .. هيك " طووووووووووت " وعااالي ..
صرعونا كل يوم شغلة ...
بس مو متل قصتك قصدا  ههه ... بس بتضل مواقف حلوة لبعدين
وللصراحة مساويها كتير .. بمحاضرات وغير محاضرات .. وياما أحرجت الشباب 

مو بسابع أرض .. هو الجوال بالجزدان .. بس تحت شي مية غرض ههه
عكلن بتضل قصة الأغاني أهون .. قدام قصص البلوتوث بالمحاضرات

اقتباس

والله القعدة ادام الهنغار بتسوى الدنية وماعليها أيام الدوام

لك شو حلوين الهنغير ..   شو بدي اتزكر منك ياسفرجل .. كل عضة بغصة
هي مافهمتها .. يمكن انتي من النادرين اللي حبو الهنفارات ..
ايه الله يديم هالمحبة .. ويعوضك بأحسن لما تنتقلي لعند شببيبة التالتة والرابعة
بتبئي بتعمليلن طلة كل كم يوم ...

وهلا فيكي عاشقة المطر زملية جديدة بينا ..
وهو هدفنا من هيك مواضيع .. نكسر الروتين .. وندردش شوي بقصصنا
ونحس بالانتماء اللي حكيتوا عنو 

وناطرين البقية ... تحيتي ...

مرحبا للكل الله يسعد أوقاتكون...
الصراحة أنا ما كنت احضر محاضرات ويمكن هاد الشي اللطيف بس ..
على كل حال ناوي صير احضر وبس يصير معي شي لطيف "يعني إتبهدل بشي"رح إلكون...
**********والله يوفق الكل***********

iyass

بما انك ماكنت تحضر ..
كرمال هيك مالك عرفان شو معنى " بهدلة " بكلية الحقوق وئدام شي 3000 شب وبنت هههه

سماع مني وبلالك ياها    .. وخبرنا اي خبرية تانية ..  بنرضى



هلا فيك .. وموفق

رجع الدوام .. ورجعت اليوميات

المهم ..
رحنا مع الشباب لنداوم بقى .. كفاها الله .. ومنه بنشوف هالبناء الجديد   .. صرعونا فيه

وصلنا عالموقع .. اييييييه شو هاد ياعمي بيشبه قصر العدل هيبة ووقار .. وأعمدة شاقولية هههه

المهم دخلنا .. وشوية تانية رح تنزل دموع الفرح ئال يعني " صبرنا ونلنا .. سبحانك يارب " 
وجوا البناء بلشت المفاجآت وحدة ورا وحدة .. شي رخام وشي نظافة وشي وشي وشي .........
وواحد من الشباب . كان رح يغوطن .. ههههه ... بيطلعلوا ماااااا

وصلنا عالمدرجات ..    اي شوبدكن بالحكي .. والله شي بيرفع الراس
وقعدنا شوي بمدرج س3 .. بعد ما اطمنا عالوضع العام كله

وشوي بدقولي رفقاتي .. ( هندسة وآثار ) .. ولأول مرة من شي عشر سنين وبالفم المليان بنرد

لك انتو تعوا عكليتي ... وشرفونا لهون
هي الجملة اللي طول عمري عم داريها .. وناكل هم العزايم لعنا

وفوقها بلشنا مدح بحالنا .. لك عنا وصار عنا    ومن هالحكي .. يعني مداح نفسه اشتغل هههه
ونحنا وطالعين كأنو كانت عم تطن باذنا غنية " منتصب القامة أمشي "  

زبدة الكلام .. كان كلو تمام .. والله يعطين العافية لكل مين ساهم بادخال هالفرحة لقلوبنا 
بس مايطلعوا الفرق بكرا .. بمعدلات النجاح .. عقولة رفيقي ههههه

موفقين ....

بالسنة الثالثة في مادة اسما اصول المحاكمات المدنية
بيعطيها الدكتور محمد واصل
المهم وووووبعد دراسة مضنية للمادة وحفظها عن ظهر قلب بتفاجئ بالخمسين
     
بدي قدم اعتراض
بس سكرتيرة العميد بتعترض؟؟؟؟؟؟؟
ما بيصير قدم اعتراض حتى شوف سلم التصحيح
قلت اي شو عليه منشوف سلم التصحيح
قالت لي سلم التصحيح لسه ماطلع وبس يطلع بتراجع مكتب نائب العميد
يلي رحت عليه بعد فترة  قام السكرتيرة غنتلي غنية لسة فاكر

يمكن معها حق المواطن العربي حبرو غميق كتير
بس الا مايغني شي يوم للصبر حدود