الموضوع اليوم شوي حساس و بتمنى من الكل يجاوبوا بدون مثاليات يعني متل مالح تعملوا بالواقع تجاوبوا

ماضي الشريك بيهمك و لا لاء؟؟

مثلا اذا الشب حب شي بنت و كانت فتاة الأحلام يعني بأخلاقها و علمها و دينها و جمالها و لقيت أنها بتستحقك

بس

عرفت أنها كانت بتحب شخص قبلك و علاقتهم انتهت

فبتقبلها زوجة ألك و لا لاء؟؟

و لا لأن كان ألها قصة سابقة مع شي حدا قبلك مالح تقبل؟!؟

أو

خلص لح تفتح صفحة جديدة معها و تنسى كل شي من قبل و أنت تبلش قصة جديدة و تنسيها يلي قبل؟!؟

و السؤال للصبايا نفسه

يعني لو شب تقدملك فلح تقبلي فيه و لو كان أله تجربة سابقة مع بنت قبل سواء خطبة أو قصة حب  و ترك البنت بالتغاضي عن الأسباب يلي فرقت بيناتهم لح تقبلي و لا لاء؟؟

هلأ بدي أسألكم كمان سؤال أنه يا ترى لو قبلتوا بالشريك على علاقاته السابقة و أكيد ما عم نحكي عن علاقات خطأ يعني مثلا كان خاطب أو هيك شي
ممكن لبعد الزواج تقوله أنه أي ما أصلا أنت قبل كان عندك علاقات (( يعني ببساطة تضلوا تهتوا بعلاقاته السابقة ))؟؟

يعني هالشي ممكن يأثر للمستقبل و لا لاء؟؟

بتمنى مشاركة الشباب و البنات

سلامااااات 

اول شي يسلمو ايديكي عالموضوع فضولية

تاني شي

برأيي طالما العلاقات السابقة ماوصلت للزواج

وطالما ماكان في شي غلط

فمافي مشكلة بالموضوع

لأنو اذا بدنا ندقق على كل التفاصيل

ماعاد حدا بيتجوز حدا

سلام

فاااارس

أول شي أهلا و سهلا نورت الموضوع

السلام عليكم

أول شي شكرا عالموضوع لأنو فعلا نحنا بحاجة لحتى نناقش هيك موضوع من كتر ما عم تصير علاقات غلط و تجاوزات بترفضها الفطرة السليمة قبل ما يرفضها الدين..

أنا برأيي كبنت ما بهمني الماضي أبدا أد ما كان أسود حتى أني سمعت من داعية أنو ماحدا من الشريكين بحقلو يسأل التاني عن الماضي لأنو الذنب انتهى و الله تاب عليه و ستره فما بحقلي أنا إجي أفضحو و ربنا من أسمائه الحسنى (الستار) و الرسول الكريم عليه الصلاة و السلام قال:
(من ستر مسلما ستره الله يوم القيامة)
أما عن الحاضر فما بحق لحدا من الشريكين يخبي شي عالتاني..بعرف أنو مو هادا سؤالك بس مشان تكون الفكرة واضحة..
و من جهتي و لو صار و عرفت إنو ماضي الشخص مو منيح و شفت إنو أخلاقو و دينو نصلحو و إنو الماضي انتهى عندو فممكن إنو أقبل فيه و مستحيل إجرحو بشي كلمة بالمستقبل و إلا بكون عنجد عم أظلمو..
شكرا مرة تانية..

ميرسي فضولية عالموضوه المميز
أنا بالنسبة لألي ما بتقبل بسهولةانو يكون الشخص يلي حبه وارتبط فيه يكون الو علاقات سابقة وخصوصا" اذا كانت لفترة طويلة

بس .......
اذا كان بحبني عنجد وانا بحبه يمكن اتناسى هالشي وغض نظر عنه

صديقتك نيبو

سلام للكل

هو شي طبيعي إنو أهتم بحياتها قبل ما أتعرف عليها بس كنوع من الفضول مو أكتر وأكيد هي قبل ما أعرفها ما كانت "قطة مغمضة" وكانت إنسانة إلها علاقاتها وحياتها..
ما عندي أي مشكلة بإنو يكون عندها بحياتها قصة حب سابقة طالما مافي مشاكل حول سلوكها
الشي المهم بالنسبة إلي هو إنو نحب بعض وطالما هالشرط موجود فما رح يهمني إنها كانت على علاقة وأصلاً برجع بقول مو غريبة تحب قبلي لأنو أكيد ما كانت قبل ما تعرفني عايشة بالكهف ولا منتظرة طلعت البهية^_^

وطالما أنا بقيت معها وطالما أنا بحبها فأكيد ما بصير أهتّها على شي أنا قبلت فيه سلف لأنو هاد تصّرف كتير سيء رح يكون ورح أكون ما بستاهل صراحتها معي ولا بستاهل محبتها..
هي إنسان إلو حياتو قبل ما يعرفني

تحيتي لكِ انسانة فضولية .. موضوعك حساس وانلقاش فيه طويل ..

عموماً ..

طبعاً ..

اقتباس

مثلا اذا الشب حب شي بنت و كانت فتاة الأحلام يعني بأخلاقها و علمها و دينها و جمالها و لقيت أنها بتستحقك
بس
عرفت أنها كانت بتحب شخص قبلك و علاقتهم انتهت
فبتقبلها زوجة ألك و لا لاء؟؟
و لا لأن كان ألها قصة سابقة مع شي حدا قبلك مالح تقبل؟!؟

يعني مع اللي ذكرتي ممكن أقبل ... بس لازم افهم شو كانت حدود هالحب السابق في حياتها

اقتباس

خلص لح تفتح صفحة جديدة معها و تنسى كل شي من قبل و أنت تبلش قصة جديدة و تنسيها يلي قبل؟!؟

طالما فهمت شو الوضع سابقاً ..
وبعدها قررت اني ارتبط فيها
طبعاً رح انسى .. وانتقل لصفحة جديدة ..... هي صفحة المستقبل

اقتباس

هلأ بدي أسألكم كمان سؤال أنه يا ترى لو قبلتوا بالشريك على علاقاته السابقة و أكيد ما عم نحكي عن علاقات خطأ يعني مثلا كان خاطب أو هيك شي
ممكن لبعد الزواج تقوله أنه أي ما أصلا أنت قبل كان عندك علاقات (( يعني ببساطة تضلوا تهتوا بعلاقاته السابقة ))؟؟

طالما كانوا الطرفين صريحين وواضحين مع بعضن من الأول
وكل طرف بيعرف كل شي عن التاني .. فما بشوف في داعي لهيك حركات وكلام


وبالنهاية .. تصفح ماضي الشريك .. حق للطرفين ..

وما في أحلى من الصراحة والوضوح ... للحاضر والمستقبل


لكم تحيتي ... وناطرين جديدك  

حلو الموضوع
أنا بشوف انه طبعا لازم كل واحد يعرف ماضي التاني؟؟
مشان مايصير أي مشاكل بعدين واذا كانت العلاقة ما فيها غلط برأيي عادي..

المهم الحاضر واذا كان في حب عنجد مافي داعي الواحد يتذكر الماضي..

وهلأ سؤالي الك فضولية انتي شو رأيك بالموضوع!!
 

بالنسبه الي ابدا مابنزعج من الموضوع لانه صارت معي بس بحب اعرف شو اسباب الانفصال لحتى يكون عندي علم مو اكتر

واكيد يلي بدقق على ماضي مارح يعيش المستقبل

مرحبا :::


أنا أتفق مع الاخ فارس تماماً

وأعجبتني مقوله الاخت لودي ::


واكيد يلي بدقق على ماضي مارح يعيش المستقبل




تحيتي .