للأخوة الأعزاء بكلية الحقوق ... " كلية الصامدون "
الموضوع فكرتو انو نحكي ونتشارك وندردش شوي بكل القصص اللي صارت وعم تصير ورح تصير معنا بكليتنا الموقرة....

مثلاً

خناقة ظريفة مع شي دكتور وطبعا كان الحق عليه !!؟؟



موقف صار معك بالكلية وفُهم غلط من اللي حواليك وحابب توضح شو اللي صار معك بالضبط


قصص الهنغارات اللي ماكانت تخلص ... وشعورك لما صرت سنة ثالثة وانتقلت عالقاعات بالبناء القديم


قصص الدخول للكلية ... مشاكل البطاقة الجامعية اليومية .. أو لما يجي حدا معك وبألف يا ويلاه ليرضوا يخلو يفوت معك



المواقف والقصص اللي بتصير معك وقت تقديم الامحانات ... من قصة الأرقام ولبكة القاعات  وغيرو ...
(وهو بالذات كتير بحبن  )



رفعت شي مادة وأخدت علامة عالية وطاير من الفرحة وبدك تخبرنا لنشاركك فرحتك ونباركلك  أوبدك تبشر ناس وتجاكر ناس 


حملت شي مادة لا سمح الله ومقهور وزعلان  وبدك تندب حظك ونواسيك ... ولو


والقصص الأكبر ..
ترفعت للسنة اللي بعدها ..تخرجت ونيالك ..ضليت مكانك مراوح والله يكون معك


يعني باختصار أي قصة أو موقف بيضحك... ببكي... بقصدك... مو بقصدك اي شي صار معك وبدك يانا نسمعك ونشاركك فيه


وممكن حتى برا الكلية

قصدي أي قصة بتصير معك ومرتبطة بكونك طالب بكلية الحقوق ... العز للرز ياعمي ئال يعني  !!!
مع كل اللي حواليك وبيعرفوك ومفكرينك حقوقي بجد !!!
وكلهم بدهم يسألوك عن شي قصة  أو ياخدو برأيك بشي موضوع أو استفسار وهيك شي
باعتبار نحنا بنفهم بالقوانين وهالقصص كتير منيح !!!؟

كمان شاركنا بهيك قصص

باختصار بنحكي شوصار معنا من ورا ضريبة الشهرة ... 

بس شهرتنا غير ولو ..... نحنا طلاب الحقوق الفطاحل !!!!!

ويلااا ورجونا قصصكن ومواقفكن ...كليتنا وبنعرفها كلها قصص ومواقف !!!

لما كنت سنة أولى  كنت طالع مع رفيقي من مادة قدمناها

المهم ....شفنا شب بيقربو لرفيقي وكمان حقوق ....

سألنا كيف طلعت يا فلان  بالامتحان...

قلنا خليها لربكن ...بذمتي رح ابكي شوي تانية

له ليش... قال طلع مقدم بقاعة غير قاعتو وخايف يرسبو مشان هيك ...قلنالو بسيطة وبكرا بتنحل

بعد ماراح هالشب ....قلي رفيقي عنجد حالتو بتبكي لقرايبي ...

خير شو القصة

لك يا زلمة هي تالت مادة وكل مرة بيكون عندو قصة فيها والمسكين والله شاطر ..بس ضايعة شطارتو بحظو المنحوس

لك شو القصة

طلع قرايبو بأول مادة نسيان يكتب الاسم والرقم وهالقصص

وبتاني مادة ....كانو صفحات الأسئلة 6 ...الأخ مفكرهن بس 4 لأنو آخر ورقتين كانو ملزقين شوي...بقى مجاوب ع 4 صفحات وطالع ....وبرا لعرف انو هن 6 صفحات من رفقاتو

وهلأ بتالت مادة مقدم بقاعة غير قاعتو

وبذمتي يومها فرطت بكل معنى الكلمة من الضحك     .......عنجد شي بيضحك ولا بيبكي!!!؟؟

ومتمني أعرف شو صار معو بعدها ....رسب  بهالمواد 3 ولا نجح ..؟

نيالك يا سيلفستر عندك مراق للقصص و برنامج الفحص يلي ما بتصور حدى شافه وما انهز بدنه الا اللهم يلي جابو بالتسعينات بالعقوبات الخ الخ
أنا بتصور أن حظ صاحبك أبو التلت مواد ما شايفة متله الا قريبي صار مقدم المدخل الى علم القانون 6 مرات و بكل المرات أخد علامة تتراوح ما بين ال48 و ال49 ولهلئ عنده امل أن يرفعها و أحيانا بيتخيل ان ورقتو تبع أول مرة هي نفسها اللي عم تتصلح أو الكمبيوتر اللي عم يجي حظ ورقته عليه معلقة النتيجة عليه من سنين و ما عم تتغير و هلئ بده يرجع يقدمها و بس تتطلع النتيجة رح خبركن عنها...

و هي قصة عني أنا شخصيا صارت من فترة قريبة و أنا قصصي كتيرة بدأت معي حتى قبل ما صير طالبة يعني من لما كنت عم سجل   

من فترة كم يوم وصلت عالهنغار و أنا منهكة من عجقة السير و خناقة مع شوفير التكسي لأن ما معه فراطة المهم مالكن بالطويل و عم أركض ركض مشان لحق محاضرة غليظة بس متضرة أني أحضرها لما وصلت على الهنغار التاني العزيز والغالي و اللي سقفه كان حيطير من كم يوم لقيت الباب تسكر بنص وشي استنيت قدام الباب بلكي بينفتح عبس المهم ما كزبت خبر دقيت الباب من حيلي و عزمي و هربت ههههه    هو موقف مولدن بس انقهرت بعد العزاب وقف برى وما أحضر المهم سمعت ان الدكتور انزعج بس ما اهتميت كتير لأن بعد شوي فتحو الباب و انا نطرت 2 فاتو قدامي وما حكى معهن الدكتور قمت فتت من سكات و ابتسامتي العريضة على وجي ما بعرف ساعتها حسيت اني منتصرة و بنفس الوقت عندي شعور ان أسئلة هالمادة رح تجي قاتلة

مافي شي عندي احكي بس انه تخرجت هل الفصل وكان تخرجي واقف ع ماده وجده تنازع القوانين سنه 4 بس الحمدلله تخرجت وفوقها اعلى علامه ع الدفعه 95 يعني ختامها مسك والحمدلله وعقبال كل طالب حقوق     

ههههههههههاي موضوع لزيز

بس والله يازميل هلا يوميات الطلاب ببيتون بدا تكون
مافي لاطلعة ولافوتة


بس الجامعة فترة كتير حلللللللللللللوة بحياة الطالب خصوصا بكليتنا شي بيجنن

يسلموووووووو ويعطيك العافيه

زميلتي White Lily

الله يكون بعون قرايبك اللي عم يقدم المدني س1
لأنو قصة 49 فيها أنا ما عشتها بس عاشها رفيقي ل 4 مرات ورا  بعض   ....والله غريبة وبنفس المادة
وبالنسبة الي يقولولي راسب وعلامتي 12 ....ولا أرسب وعلامتي مو 49 ...والله45 بنقهر  

عجبني وصفك المتناقض شوي....عزيز وغالي!!!! .... بس حيطير......

وعنجد قصتك كتير ضحكتني     .... يعني والله منيح اللي طلعت من بنت
والموقف عادي مو مولدن ولو....والله حلو تجي ويروح تعبك عالفاضي

يمكن هيك قصص تروح عن قلبنا شوي ....وخاصة هلأ ونحنا بلبكة الامتحان

دمتي صديقتي بخير ....والله يوفقك ويوفق قريبك

الموقف اللي صر معي انه كنت عم احضر جزائية 
;i( وانا واعوذ بالله من كلمة انا من الطلاب اللي بتفاعل بالمحاضرة 
وبعد ما جاوبت الدكتورة شو بتقلي  انتي طالب شطورة ادش جبتي بالمادة هون انا كن ادامي حلين
اما بقلها اني كاتبة ب 95 وحطيت لي 50 وبعلق معها ادام الطلاب او اني ما بقلها 
وتحت الحاحها لمعرفة العلامة قت لها تحت المية ونفدت
هدا موقف ن المواقف اللي صارت معي مع الدكاترة

الحمد لله انا من الطلاب يلي ما بيفكروا يحضروا محاضرة
بس مبارح صارت معي قصة انو كنت نازل بس مشان جيب محاضرات و بعد العذاب وشي ساعة بالطريق من العجقة يلي بتخلي الواحد يجن اكتشفت لما وصلت عالمكتبة انو البطاقة مو معي يعني مشوار عالفاضي مشان هيك بدي اضطر انزل مرة تانية مشان جيب المحاضرات وان شاء الله اليوم ما انسى البطاقة كمان

والله يا شريك..من فترة كنت قاعد بالهنغار وكافي العالم خيري وشري..نعسان ومالل من محاضرة الاقتصاد...وفجأة........ما بلاقي الا مزراب مي عم ينزل فوق راسي...
شو القصة؟؟؟قام تاري المطر عم تنزل برا...وهنغارنا العزيز عم يدلف ...وطبعا أنا بوقتها انصدمت وما كان مني الا انو صرت انظر لفوق مشان اعرف شوالقصة..قام دكتور الاقتصاد انزعج مني ومن حركتي الزايدة وقلي... وبكل هدوء أعصاب ...اتفضل لبرا...و أنا ما كزبت خبر واتفضلت لبرا وأنا عم اشكر ربي على نعمتو وعالمطر اللي بعتو واللي خلاني اخلص من المحاضرة المملة ....