غسان : سمعت شو بدهن يعملوا...
ناجي : لا والله ... مين يلي بدهن يعملوا ...
غسان : الفريق الاقتصادي بالحكومة ... لك تصور يا رجل بدهن يرفعوا الدعم !!
ناجي : أيه والله سمعت هيك شي ، يعني بيني وبينك استغربت شوي ، إنو من وين هالقوة ليرفعوا ...يعني بعرفوا ثقيل ووازن ، مو هيك ؟!
غسان : أيه نعم ثقيل ووازن بس انت شو بدك بها الشغلة ، بعدين سمعان بصندوق النقد الدولي ؟
ناجي : أيه طبعاً هاد يلي أمريكا الها أكبر حصة فيه مو ؟!
غسان : يا عيني عليك ، هلأ هالصندوق يعني شغلتوا متل ما تقول انو وين فيه دولة بتقدم دعم للمواطنين ، يعني وشرطك بالدول النامية ...فالصندوق بيحط ايدوا مع الشباب الطيبة وبيرفع معهن ، وهيك الوزن ما بيعود مشكلة ...لكان.
ناجي : بس بدك الصراحة أنا من كم يوم شفت واحد منهن للفريق الاقتصادي على التلفزيون عم يحكي عن القصة ، يعني والله رح يبكيني كمان شوي على خزينة الدولة والعجز بالموازنة يلي سببوا الدعم ، ومن حكيو حسيت انو هالدعم يعني مثل حمل كبير على ظهر الدولة ...(يقاطعه غسان )
غسان : أيه وبدهن يرفعوا هالحمل ، ولازم المواطن "الكريم" ، مو كريم هوه ...لازم يتحمل مسؤولياتو بها الفترة ، يعني بلا مؤاخذة صرلوا المواطن سنين عايش برفاه ، وراتبوا ما عم يعرف وين بدو يصرفوا على قد مانو مهول !! ، أما التعليم فمعروف مجاني وللجميع ، والمرافق العامة والخدمات حدث ولا حرج يعني شي "بيمزع العقل " ، شو بدك كمان ؟؟ نسبة البطالة .. نحنا ما عنا هيك مصطلح ..اختفى هالمصطلح من قاموسنا الاقتصادي ، يعني فيه كم واحد هنن ما بدهن يشتغلوا ..وهنن حرين !!
لك شو هالعلاك يا ..الأمور مكشوفة ... يروحوا يرفعوا التهرب الضريبي عن ظهر الدولة ..صحيح يلي استحوا ماتوا ..
ناجي : يا غسان يا حبيبي لا تنفعل ، يعني بدك تعلمهن شغلتهن ، الجماعة عاملين حساباتهن وأرقامهن على هاد الأساس ، هيك حكى المسؤول الاقتصادي ...
غسان : لك هنن بس لمحوا تلميح لرفع الدعم وطارت الأسعار وما عاد هدت ، لك كيف اذا رفعوا لكان ... يا حبيبي شوف بعد ما يرفعوا شو بدو يطلع تحتوا !!
اذا اليوم فيه عالم كتير بتاكل خبز و بس خبز .. وكمان بس لانو مدعوم ، وفيه عالم وكتار بتبقى بردانة طول الشتوية وما بتعرف شو هيه "الصوبية" لانو ما معها حق نقطة مازوت ، لك مع انو المازوت مدعوم تصور!! .. لك وين مفكر حالك يا ناجي بالنرويج ولا بالسويد ...آآخ
ناجي : أيه والله آخ ... والله اليوم بدي اشتري كتاب الجامعة فتصور ما كفوا المصاري !!
غسان : شايف هاد والتعليم مجاني و "بأسعار رمزية " !!
ناجي : " أسعار رمزية " !! .... وين سمعان بالجملة ؟؟ ... مطروقة كتير ...
غسان : (يبتسم) مو آخر طرقة كانت قوية كتير ....
ناجي : أيه !!
غسان : شو أيه ....راحت فيها ...عطتك عمرها ...
ناجي : الله يرحمها
غسان : لك قلوا "يا فرعون مين فرعنك" ... قلوا "ما لقيت حدا يردني" !! ، بس... بعدنا طيبين !!
منقوووووول
غسان وناجي حوار نكت ضحك
With My Best Regards................MHD