السلام عليكم

طبخت اليوم جاج مكسيكي بيختلف شوي عن الطريقة المعتادة

أول شي منفور قطع الجاج ... وبعدها منحط شوية زيت زيتون لنقلي فيهم بصل ناعم قطع صغيرة أو مبشور... متى ما تقلوا منرجع قطع الجاج ومنضيف مكعبين ماجي ورشة بهارات الكاري مع قطع جزر مع فطر وذرة معلبين ومنغمرهم بالمي ومنضغطهم بالبخار لربع ساعة تقريبا بعد ما تصفر.. متى ما خلصت منطفي عليها وبس تفتح منضيف كاسة حليب مدوب فيها معلقة كورن فلور ولتقلب قلبتين يعني لتغلي منطفي عليها بتكون خلصت....

الرز كالمعتاد بس هون منضيف عليه كركم لياخد اللون الأصفر ومكعب ماجي واحد وإذا بتحبوا الحد رشة كاري بس ما في داعي لإنو بالصوص حطينا كاري...

صحتين وهنا :)

حلوة كتير الوصفة .. بس اكيد هي هيي الجاج المكسيكي؟؟

كأنو هي طريقة جاج بالكاري او فيلادلفيا او فاهيتا ... المكسيكي بكون في فليفلة وحد وما في حليب انا هيك بعرف

السلام عليكم

إي هي مع التعديل من قبل عيلتنا المصونة هههه لإنو ما منحب الفليفلة ... والحليب كمان منضاف من عنا جربيها ظريفة كتير وتغيير شكل :)

شكرا كتير

موضوع حلو وعجبني كتير يسلمو  ايديكن على الطبخات بتمنالكن التوفيق يارب

مسالخير ...

رح حط طبخه تانيه سهله خرج المتزوجين عن جديد وما بيعرفو بالطبخ ... يعني متل حكايتي بالضبط :")

رح حطلكن وصفة اكلة كتيييير طيبة وكتييير سهله ..... الكبسة بالدجاج

بتنقعي كاستين رز كبسة ...

بتجيبي نص كيلو شرحات جاج مقطعه مكعبات صغيره
بتتبليهن بمعلقة وسط بهارات الكبسة مع رش ملح وبينحطو بالطنجرة مع شوية زيت وبينكمرو يعني بيتغطو مع نار هاديه وبيتقلبو كل شوي

بهالاثناء بتقطعي بندورايه وفليفلاية مكعبات صغيره وبتحطيهن فوق الجاج بعد ما يستوي مع معلقتين سمنة ليدوبو وياخدو خواص بعض

بعدين منضيف الرز ومعلقتين وسط بهارات كبسة ومعلقتين وسط ملح وكاستين مي ومنغطي الطنجره وبس تقل المي منضعف النار لحتى يطلع الرز ممتاز ...

والف صحة وهنا

شكرا كتير ع الموضوع الاكتر من رائع وانا اتابع واستفيد بارك الله فيكي أخت سلام

طبختي اليوم
جز مز وبطاطا مفركة
اكيد بتعرفو الوصفة ههه
ماراح صور الطبخة لانو بتعرفو حياة العزابي متل طبختو مجعلصة
ع كلن طيبة كتير طلعت معي
وموضوع مفيد راح تابع بلكي بالوحدة القاتلة يلي عايشها
استفيد واتعلم الطبخ :-X

السلام عليكم

طبخة اليوم دجاج بالبرميزان

الطريقه اول شي جبت كيلو صدورة دجاج وغسلتهم وحاولت بالسكين من الجنب اقسم كل وحدة لتنتين مشان رققهم ويستووا ...بعدين حطيت عليهم عصير ليمونة (فيكن بخل أبيض) نقعتهم فيها وخليتهم بالتلاجه حتي خلص تجهيز الصوص وبعدين جهزت الصوص 6 حبات بندورة حمرا وراس بصل وسنين توم فرمت البصل والتوم والبندورة قشرتها وبشرتها ..وبعدين حطيت زيت زيتون بالطنجرة وصرت اقلب البصل والتوم لدبلوا وحطيت فوقهم البندورة ومعلقتين صلصة بندورة مشان تعطيهم لون احمر غامق ومعلقه سكر صغيرة وعصير نص ليمونة وملح وفلفل اسود ...وخليت الصلصه تتسبك كتير منيح لانه بدنا اياها كثيفه وبعد هيك جبت 3 صحون واحد طحين وواحد خفقت فيه بيضتين مع نتفه ملح وفلفل اسود وواحد حطيت فيه خلطة ماجي كرسبي وحطيت فوقها معلقتين كبار جبنة برميزان مبشورة وحركتهم وحاولت صفي الجاج وصرت بالشوكة غط الجاج بالطحين ثم البيض ثم خلطة الكرسبي المخلوطة بالبرميزان وبعدين حميت زيت وقليتهم  وبعد هيك جبت جاط بايركس وحطيت تلت ارباع الصلصه بالقاع وحطيت الجاج المقلي عليها بس ما يغمرها وحطيت عكل قطعه كمشة جبنة برميزان وموزاريلا وعالفرن ع العالي من تحت بس تلت ساعه اتسبكت منيح ودابت الجبنة وصحتين وهنا...

شكلها بشهي سلام ... بس ما بعرف ليه حسيتا صعبة :'>

وخصوصاً عقطع الكهربا ألف ساعة باليوم ما عم يجيني نفس لساوي طبخة بدها وقت بنوب .. يا دوب ساعة زمان لازم كون خالصة الطبخة

الله يفرج ...