السلام عليكم ورحمة الله وبركاته...


بإذن الله سيكون هذا الموضوع للنقاش سوياً عن مواد السنة الثالثة ولتبادل المعارف والتعاون على تجاوز هذا العام بنجاح وتفوق حقيقي ان شاء الله ...

عم نستنا مشاركاتكن تالتة 

واهلا وسهلا فيكن
   

وعليكم السلام

شكراً كتير عفتح الساحة 

الله ييسرلنا هالسنة ويوفقنا فيها ... وإن شاء الله تمضى عخير

وإن شاء الله منتساعد قدر الإمكان باللي بيمر معنا

***

خلينا نبلش بإذن الله...

- بالنسبة لشعبتنا أخدنا عقاقير وحيوية -2- ... ونصحتنا سلام بأنو كلما كان الحضور أكتر كانت الاسئلة أسهل (متل ما قال الدكتور) ... والدراسة من كتاب حينزل إن شاء الله

الحيوية -2- لسا ما بلشت د.فايزة لأنو ما اتفقت مع د.سحر عالتقسيم ... وبالنسبة لإلها حتنزل محاضرات متل السنة الماضية ... وعم تاخد حضور كمان ... قالت ما بتقدر هالسنة تتحكم لأنو ما في عملي بس لسا عنا المادة بالسنة الخامسة إن شاء الله ... وردت حكت عحلقات البحث للي بيحب يعمل كمان مشان يستفاد بعلامة السنة الخامسة

- والعملي كلو تسجيل حضور ما حيبلشو بالجلسات هالأسبوع ...

- بيبقا الشعبة التانية إذا في مجال حدا يقلنا عالتكنولوجيا ... والجراثيم والفيروسات

السلام عليكم

بما أنو ما حدا شارك حأكتب اللي أخدنا...

- تحيلية 2: ما أخدنا شي

- دمويات ومناعيات: إجا د.قوتلي وبلش بمقدمة وشوي من منشأ الكريات ... يعني تقريباً محاضرة كاملة ... وقال أنو في كتاب إلو بس ما في كل شي يعني في إضافات بيحكيها بالمحاضرة ومطلوبة

- تكنولوجيا صيدلانية: إجا د.محمد أمين وحكالنا عن المادة ومعايير الدواء ... والمحاضرة سهلة ومارقة علينا بشكل عام مع بعض الأفكار الجديدة

- جراثيم وفيروسات: ؟؟؟ ما زبط وقت هالمحاضرة لهلأ ويفترض ما حتضل يوم الأربعاء من الـ5 للـ7 ... بس عطو محاضرة بالشعبة التانية يوم الثلاثاء حسب ما عرفت

حبيت ضيف علي قالتو أسيل أنو الدكاترة كتير ظراف وشرحون كتير منيح وتعاملون مع الطلاب حلو
يعني أكيد لح تستفيدو إذا حضرتو محاضرات الدمويات والتكنو
هاد كان اطباعي الأول انشالله يكون الباقي هيك
     
بس بتمنى يكتر الحضور !
عدد الطلاب كتير كان قليل
ومخزي كطلاب سنة تالتة أنو ما حدا يحضر من أولها
ابقو شرفونا بحضوركن الكريم
ومتل ماقلت الدكاترة كتير مناح ومالح تخسرو شي !
بتتسلو حاجة قعدة بالبيت وتضييع وقت

طولي بالك رهف 

لسا بأول أسبوع في ناس بتكون مسافرة وما صحلها تجي ... أو الظروف ما بتسمح حالياً

بس إن شاء الله عالأسبوع الجاية يتغير الوضع

***

رهف حبلش طلبات بالدمويات بما أنو هي اختصاصك    (أو إذا حدا عندو فكرة كمان بيكون مشكور  )

بما أنو ما استوعبت المحاضرة وبالذات المصطلحات ... الدكتور قال عم يقولها باللاتيني وأبسط الأمور ما عرفتها (متل لما كان عم يحكي عن الأشياء المخصصة للتمايز فمدري شو أسمها CE ولا CD ولا ؟؟!!)

وفي أشياء ما موجودة بالكتاب ... فأول شي عندك فكرة عنهم؟ وتاني شي في شي مرجع مبسط في هالأفكار الرئيسية بتعرفي أسمو؟

اليوم شفنا أنا وديما بالمكتبة ... والحمد لله ما لقينا شي! لأ هو ملان كتب أغلبها عن المناعة وفي كتب كتير بس ما عرفنا شو اللي نحنا بحاجتو بما أنو لساتنا ألف باء فيها

السلام عليكم

^_^

هذا الدكتور خليل ما... وأنا مثلك هداك الفصل طلعت والدخنة طالعة من راسي بأول محاضرة لأنو ما فهمت علي شي... بس طلع هالحكي كلو مناعة ورح يرد يشرحهم بآخر 3 محاضرات الو...

هلأ لقلك بشكل مختصر هو كان عم يحكي عن الـ CDs وهي عبارة عن مستضدات بروتينية موجودة على سطح الخلايا ومرقمة بأرقام 1,2,4,8...... وهالأرقام بتختلف مثلا حسب تطور الخلية, وهو أكيد قلكم إنو الخلية السرطانية بترجع لحالة اللاتنشؤ (رجوع للوراء) فبياخدوا هالخلية السرطانية وبشوفوا أي CD عليها هل هو CD الفتوة أم لاء وهيك بيقدروا يحددوا لأي مرحلة وصل السرطان إذا للفتوة يعني وصل لمراحله الأخيرة... هلأ كمان أكيد حكالكم كيف بحددوا هالشي... هو قال في جهازين حديثين نوعا ما الأول بحدد كم خلية سرطانية في عنا... التاني الأجدد بيحدد كم وحدة وبيفصلها عن السليمين...(مدري شو كان اسمهم بالانكليزي ؟؟؟!!!)

وكمان رح تاخدوا عنهم عند الدكتورة جمانة... بس أكيد لازم تفهموهم عند الدكتور خليل بالأول....

إن شاء الله كون فدتك بشي....؟!؟!؟!

السلام عليكم

ايوا ... يسلم إيديكي ... طلعت CD ... والله هيك كتبتها أول شي بعدين محيتها وساويتها CE

المشكلة ما كان فاتح عسلايدات لنشوفها ... هلأ استوعبت الفكرة

حكالنا كتيييييير أشياء ... ومنها الخلايا السرطانية ... فما بعرف مخي ما جمع غير كم شغلة

علم الدمويات: سريري - مخبري - دوائي

كل واحد عرفت شو وضعو ... وأنو نحنا حناخد المخبري إن شاء الله

وبعدها بلش بنمشأ الكريات وهون خلص بلشت فوت بالحيط ... استوعبت شغلة نقي العظم بس ما عرفت شو الفرق بينو وبين الخلايا الجذعية ... وكمان حكا عن الشغلتين يلي شي بيضل متل ما هو عند الانسان وشي بيتمايز وشي ؟؟!! هي كمان ما زبطت معي كتير وكمان شغلة التوافق النسيجي وبالزمرة الدموية ... مرة فهمت أنو النسيجي ما حدا عندو متل غيرو ومرة فهمت أنو وقت بدهم ينقلو دم أو أعضاء لازم يكون موجود لهيك هلأ في منهم بيتبرعو بالدم ببنوك الدم مشان إذا احتاجو هن (حسب ما فهمت غالباً بمرض سرطان الدم) ما يضطرو يدورو ... يمكن لأنو بحالة سرطان الدم بيروح الدم مع المناعة فلازم يكون نفسو

بركي إذا جبنا الكتاب منستوعب شوي  ... بس كمان قال الكتاب مو كامل وفتحلنا عكم صورة بالسلايدات بدو نحفظها مو موجودة بالكتاب بس قال منلاقيها عالنت ... بس بالأصل ما عرفت هالصورة إسمها صورة شو 

السلام عليكم

كمان لا تخافي مشان الزمر الدموية في بآخر الكتاب بحث كامل عنها.... هو بفوت كذا موضوع بقلب بعضو بأول محاضرة بتخلي الواحد يضيع...

تبع نقي العظام هو قال إنو هو منشأ الخلايا الجذعية وبكون عنا نقي أحمر ونقي أصفر.. الأحمر هو النشيط بالعظام يلي بيولد الخلايا الجذعية للكريات الحمر... الأصفر هو غير النشيط وعو يشمل أعضاء مثل الكبد والطحال ما بيشتغل إلا لما يصير في حالات نقص حاد بالدم فهون بتشتغل القدرة التعويضية كمان رح يرد يحكي عنها بعد محاضرة أو اتنين....
كمان رح يكون حكى عن الخلايا الجذعية إنو موجودة بالمشيمة ...و في الها كذا اسم لاتيتي حسب تطورها وإنو هي بتنقسم عدة انقسامات والنهائية البالغة مؤلفة من 3 طبقات... هلأ أسمائها اللاتينية رح ترد تمر معكم ببحث سرطانات الدم... ورح يشرحلكم كل واحد..

مشان التوافق النسيجي هي ببحث التبرع بالدم هو قصدو بالإضافة للمستضدات المعروفة ABO في جمل مستضدية تانية ممكن تعمل ارتصاص عند الآخذ وتسببلوا انحلال دم لكن هالحالات بتجي نادرة نوعا ما... يعني الكل عندو منها بس النادر ما يصير ارتصاص منها.. هيك قصدو

مشان الأسئلة الكتاب كافي ووافي وكل هالقصص ما اجى منها ولا ربع سؤال بكل السنين فلا تخافي بس افهميهم من باب العلم بالشيء... إذا بدك بعطيكي كتابي كاتبة علي هالشغلات... بس بدك تحطي ببالك إنو خطي مفشكل كثير 

حاسة حالي سامعة هالمعلومات بس ما علقو 

يلا إن شاء الله خير ... الدكتور مبين حباب ... بس إن شاء الله نقدر نبلش ننظم أفكارنا شوي شوي لنمشي معو

يسلم إيديكي كتير لأنو توضحو هلأ ... والله إلك مستقبل دكتورة 

ويسلمو عكل شي ... ما في غير منعذبك معنا

   

***

بس لما حكالنا عن مشفى السرطان وأنو إلها ميزانية كبيرة وأنو مثلاً سرطان الدم بيتعالج ... حسيت أنو ما شاء الله شي ممتاز

بس ما بعرف عملياً إذا هالشي موجود ... في كتير مرضى عم يتوفو بسبب هالمرض ... الله يجيرنا

مع أنو فعلاً نحنا عنا ميزة أنو الأمراض المستعصية بتتعالج مجاناً ... متل لما قلتلكم عن الطفل اللي طلع عندو حالة السل ... عطو العلاج مجاناً الحمد لله ... أما بالبلاد التانية بياخدو مبالغ كبيرة كتير عالعلاج

الله يشفي جميع المرضى ... حلنا نستفيد من العلم 

السلام عليكم

ولا يهمك... بكرة بينعادو شي مية مرة قدامك... لحتى تصيري تقوليهم بمنامك.. ^_^

الله يسامحك ما عملت شي بس حكي الدكتور عم عيدو...