لك الله يبارك بالكل و شكرا كتير على مساعدتكن..و عنجد لهلأ ما قررت تماما بس حاليا استبعدت طب الأسنان و حصرت تفكيري بين البشري و الصيدلة و لهلأ عم دور على عيوب الطب و على عيوب الصيدلة...و اللله بيسر

هلأ الصيدلة كمان دخلتها عن سبق إصرار وترصد وما بندم أبداً على اختياري وقضيت هالخمس سنين من أحلى ما يكون لأنها ممتعة جداً وما كتير عنا عقد مقارنة بباقي الكليات

بس

رح قلك الشي يللي ما كنت بعرفو ويللي كان لازم أسأل عنو أكتر لما كنت بمتل موقفك وهو المصير بعد التخرج وعقباتو:

-لازم تعملي حسابك أنو ما فيكي أول ما تتخرجي تفتحي صيدليتك الخاصة بشكل قانوني (إلا بالريف) لأنو عندك سنتين خدمة ريف........باعتبار فتح صيدلية خاصة هو أنجح مشروع -حسب ما يقال- من النواحي المادية والخبرة والإفادة وتربية السمعة الطيبة بهالمهنة.


- طيب لازم تفكري كمان أنك في حال ما كملتي دراسات عليا، فلازم تخدمي ريف أو تشتغلي مندوبة أو تأجري شهادتك والخيار الأخير فيه من الخطورة والمسؤولية ما يكفي لتقلعي عنو.

- الدراسات العليا (مدتها 3-4 سنوات محد أدنى) لن تتيح لك مجالات عمل أكتر من غيرك بشكل مطلق (عدا المتعلق منها بالمخبري) فأغلب طلاب الماجستير بيرجعوا لنفس خيارات العمل للخريجين العاديين بل بالعكس قد يفضل صاحب المعمل توظيف خريج ويعطيه خبره أكتر من الاعتماد على خبرة خريج دراسات..... (كمان حسب ما سمعت من أصحاب العمل).

- منوصل على خيار التوظف بصيدلية فمردودو المادي قليل جداً جداً قد لايتجاوز 8-10 آلاف لخمس ساعات يومياً على الأقل فدوبو يغطي مستحقات النقابة السنوية.........ولن يكون كالأحلام الوردية التي تسمعينها بالكليّة......وبتصير كتير مشاكل إذا قعدت بنت لحالها بالصيدلية فغالباً بتحتاجي احتياطات أو شخص مرافق إلك بالصيدلية أو الإقلاع عن هالخيار.

- الشغل بالمعامل: معاملنا ما فيها أقسام بحث وتطوير فالعمل فيها ليس واسع جداً جداً لكن يقال أنه ممتع نوعاً ما......لكن المعامل جميعها بالأرياف ودوامها طويل يعني عندك ساعتين طريق بالإضافة لدوام من 8 - 4.30 كحد أدنى.......فكمان خيار مو سهل

- في حال فكرتي مستقبلاً تاخدي إجازة فترة مثلاً سنتين من الشغل لسبب ما أو لملل ما......فسيكلفك هذا ضرائب من النقابة.....يعني بدك تحطي هالقصة ببالك وأعتقد أنها موجودة كمان بالأسنان والبشري 


هلأ الناحية العملية التطبيقية هي بطب الأسنان أكتر من الصيدلة ......يعني يللي بتتعمليه كلو بتطبقيه بشغلك أنا نحنا فكتييييير شغلات أخدناها ما فينا نطبقها بشغلنا......بالمقابل سنوات الدراسة الخمسة بالأسنان متعبة جداً وبتتطلب تجميع مرضى وتحمّل تخلفهم عن المواعيد (فبتروح علامتك) وبتتحملي تكاليف أدوات ومواد ومراضاة للمرضى وحتى في مواد تتطبق على الأطقال فبدك تجيبي وتاخدي من المدرسة مع موافقة الأهل.........ودوام يومي طويل لكن النظري خفيف الظل أكتر من الصيدلة

الطب متعب جداً وبالفعل طريقو طويل ولازم تستعدي له من ناحية السفر (عندك القدرة المادية تسافري للاختصاص؟ وهل عندك -أو عند أهلك مشكلة بالسفر لوحدك سنوات؟؟) وتكريس نفسك للعلم 6 سنوات تقريباً بالإضافة للسنوات ال6 الطبيعية حتى تقدري تجاري السرب الموجود.


طبعاً عرضتلك كل شي سلبيات بموضوعية لتوازني وضعك بالفرع المناسب لك وحدك
وجاهزين لاستفساراتك

يعني كيف بعد التخرج منخلص سنتين الخدمة و بعدين فينا نختص و للا كيف؟؟

السلام عليكم


بعد التخرج يلي مو حابب يكمل دراسات... ما بيحصل على شهادة ترخيص دائم بمزاولة المهنة لحتى يخدم بشي ريف (على تقسيمهم لأنو المعضمية مثلا ودوما وحرستا مو ريف برأيهم ومخدمين منيح), المهم بيلازم لمدة سنتين بشي ريف وبكونو عاطينو ترخيص مؤقت لمزاولة المهنة بهالفترة, ويمكن إنو إذا اشتغلتي بمعمل بالريف يحسبولك ياها هي لسا ما اتأكدت منها....

ومشان الاختصاص

بعد التخرج إذا الواحد انقبل بالماجستير فسنين الماجستير تعتبر بديل عن خدمة الريف ومتى ما خلص الماجستير بمدة لا تقل عن سنتين ممكن يعطوا الشهادة....

وممكن كبديل عن خدمة الريف كمان إنو تخدمي بالمؤسسات الحكومية لمدة 5 سنين على ما أذكر وبيمشي الحال.. بس هي ما حدا بيرغبها.....

بالتوفيق إن شاء الله

له له له..

كأنو السلبيات و العقبات بعد التخرج كتير كبيرة..

الله ييسرلنا الخير

قولو آآمين

السلام عليكم

هلأ عم نحكي عن العقبات مشان مثل ما تفضلت golden pill ما ننصدم بالواقع... بس هذا ما بينفي إنو المهنة إلها كمان كثير من الميزات يلي بتخلي الواحد يحبها... وبالنسبة الي أنا بحب هالمهنة كثير على الرغم من كل السلبيات يلي انذكرت ويلي لسا ما انذكرت.... ما في مهنة مو صعبة ومستحيل ما يطلعلو الواحد ببداية طريقه المهني كم عقبة... بس المهم كيف هو يلاقي حلول لهالعقبات لحتى يقدر يمارس المهنة يلي كان بيحلم فيها....

اقتباس

كأنو السلبيات و العقبات بعد التخرج كتير كبيرة

هلأ متل ما قالت سلام أكيد بكل شي في عقبات......بس أنا حطيتها بجرعة مركزة لأنو لطالما كنت عاطفية جداً بالشرح عن الصيدلة وحسناتها بس هلأ عم أكتشف السلبيات وحبيت ألقي الضوء عليها لتكون زميلتنا الجديدة على بيّنةبكل جوانب الصيدلة كونها مو حاطة ببالها شي محدد

وأكيد رغم كل شي بعشق الصيدلة ولو بيرجع الزمن لورا ما بختار غيرها وإيجابياتها كتيرة ومعروفة وسبقوني رفقاتي بالحكي عنها،، أقل ما هنالك أنك الملجأ الوحيد لكتير من المرضى وفيكي تنشري وعي بمجتمع لأنك على احتكاك مع شريحة كبيرة منو وشعور تقديم نصائح للبشر واستفادتهم منها كتير جميل.

عيوب الطب ما بعتقد بتقل عن عيوب الصيدلة بالعكس يمكن تكون أكتر لأنو الطبيب -حسب علمي- خيارو الوحيد أنو يفتح عيادة أما بالصيدلة ففي خيارات تانية سهلة وغير مكلفة مادياً.


ومقارنتي حصرتها بين الأسنان والصيدلة لأنو رفيقتي تخرجت من الأسنان وبعرف منها كتير أمور عن هالفرع


الميزة المشتركة بين الصيدلة والأسنان أنو ممكن بعد 5 سنوات تكتفي من الدراسة وتشتغلي فوراً أما بالطب فبتكوني لسا بدك شغل على حالك ودراسة سنوات تانية لتقدري تشتغلي


بنصحك تمري على صيدلية ناجحة وتقعدي مع الصيدلاني شي ساعة تشوفي الجو

وتمري على طبيب وطبيب أسنان ناجح وتستفسري منو عن الإيجابيات والسلبيات

ولا تطلبي رأي الناس لأنو إما بيكون بطريقة عاطفية بحيث تغطي عالسلبيات كلها أو بالعكس تماماً وبيسودوا الدنيا بوشك.........واعملي بعدين جدول اكتبي فيه النقاط الإيجابية والسلبية كلها يللي عرفتيها وشو بيناسبك من هالفروع


وألف مبروك تفوقك بالبكالوريا    والله ييسرلك يللي فيه الخير لدينك ودنيتك

مبروك العلامات
ما شاء الله الزملاء كفوا ووفوا
بس بدي علق

اقتباس

ويمكن إنو إذا اشتغلتي بمعمل بالريف يحسبولك ياها هي لسا ما اتأكدت منها

الشغل بمعمل لمدة سنتين بيغني عن خدمة الريف هاد الكلام صحيح   

شكرا شباب و صبايا و الله كفيتو  ووفيتو ..جزاكن الله كل خير

و حاليا عم فكر بين فرعين و عم اعمل استخارة و بوعدكن اول مانقبل بشي جامعة رح خبركن..ادعولنا    

نصيحة لوجه الله سبحانه :
إذا كنت يا أختي من يلي عندهم طموح وبحبو يفهمو ويأبدعوا فنصيحة لوجه الله إنك تدخلي طب بشري لأنو ما إلك خبر عندنا بالصيدلية!
أغلبهم بصيمة والدكاترة بصيمة والمراقبين بصيمة وجميع العاملين بالصيدلة بصيمة وخااااااااااصة المعيدين وطلاب الماجستير!...طبعاً إلا من رحم ربي , ولا أخفيكي أنه عندنا بالصيدلة رؤوس فهمانة جداً  في الصيدلة من حيث الفهم والإستيعاب مثل : أبو محمود وأبو مجد وأبو نزار وقاضي وزيد ....الخ وغيرهم .
بس الأغلبية الساحقة بتعتمد البصم بالنجاح وبصراحة هذا أبداً أبداً مو ذنبهم لأنو مجبرين على هالشي حتى ننجح لأنو الأسئلة الإمتحانية بتعتمد على الحفظ أكثر من الفهم إلا طبعاً أسئلة الدكتورة سوسن يلي بتحب تجيب أسئلة للفهم وحالات سريرية واقعية وأنا بحترمها كتير.
اعملي يلي بيريحك بس بيجي يوم وبتتذكري كلامي.
ملحوظة : أنا بعترف أنو أول 4 سنوات بالطب موت أحمر وصعبييييييين جداً ... بس لكل مجتهد نصيب.
الله ييسرلك ويوفقك وبرأيي استخيري الله سبحانه
آسف على الإطالة......والسلام عليكم ورحمة الله وبركاته