السلام عليكم أخي العزيز ياسر

يمكن يكون صعب أطلب منك هيك طلب بس إدارة المنتدى بدها واحد متلك

وأكيد مسؤولية كبيرة ................

المهم حكيت شي عن حرية احترام الآخر وهاد احلى شي

أرجوكم يا أخواتي السوريين احترام آراء بعضنا شي مهم بوقتنا الحالي والابتعاد عن الإساءة لأي حدا بأي شي

الهدف الأساسي إنو نحمي حبيبتنا سوريا من أي خطر خارجي

لازم نقتنع أن لما يكون الموضوع بيخص بلدي وأرضي فالوطن بيكون فوق أي اختلاف
أنا سوري متلك وإنت سوري متلي وما في أي شي تاني لنعبر عن بعضنا غير هيك

رجائي يا أخواتي الوعي

وباالعامية

ضبوا عليا  يلي بتحبو سوريا

وصلى الله على سيد الخلق

كلام رائع و كنا منتمنى انو نسمعو من زمااااااان



لازم نحنا السوريين نفهم بعض و نحترم رأي بعض مهما اختلفنا
صحي انو في اختلاف كبييييير حاصل بيننا بالرأي ومنقسمين لصفين بعاد عن بعد 180درجة و هاد الشي مؤلم كتير و عم يوجعنا كلياتنا بس هالشي مابيعني انو نجرح بعض ولا نتهم بعض بالعمالة ولا نخوّن بعض يا جماعة بالنهاية كلنا سوريين و اي شي بيصير عالبلد ان كان حرب او تدخل خارجي او خير او شر اي شي حيصير حيصير علينا كلنا و ما حيميز مؤيد للنظام الحالي من معارض الو

في نقطة كتيييييييير مهمة و حابة نوه الها
الاختلاف الكبير يلي حاصل بيننا هون بالمنتدى ويلي منقسم لصف مؤيد و صف معارض هو اختلاف حاااااااد كلنا منعرف تفاصيلو و كلنا منعرف شو الأدلة يلي بيجيبها المعارض على كلامو و شو الأدلة يلي بيجيبها المؤيد على كلامو و شو مصادر هي الادلة  وشو حقيقة هي المصادر و الشي المؤكد انو مستحيل يكون الطرفين على حق بنفس الوقت
انا ما عم احكي عن يلي بيجرح او بيتهم او بيخوّن المخالفين و ما عم احكي عن الغلو يلي عم نشوفو عند بعض الاشخاص سواء مؤيدين او معارضين
يلي عم احكي عنو هلأ هو الفكرة بحد ذاتها يلي تبناها المعارضين و الفكرة يلي تبناها المؤيدين
مستحيل يكون النظام الحاكم في سوريا نظام مقاوم للاحتلال و رافض للانصياع للغرب و واقف ب وش الاملاءات الصهيوامريكية و يكون بنفس الوقت نظام خاين و عميل للغرب و لاسرائيل وعم يخضع لاملاءات الاعداء و عم ينفذ اجنداتن
مستحيل يكون نظام الرئيس بشار الاسد عم يدافع عن امن سوريا و عم يحمي المواطنين من ناس تلوثت افكارها و عم تتغطا بالمتظاهرين السلميين لتقتل الجيش و الامن و المدنيين و يكون بنفس الوقت هاد النظام عم يقتل متظاهرين سلميين و عم يوجه السلاح على ناس ابرياء و عم يقتل بشكل شبه يومي عدد كبير من الجيش و الامن -بحجة انن انشقو حسب القنوات الفضائية-
مستحيل يكون نهج الرئيس بشار الاسد و نهج النظام الحاكم نهج اصلاحي و عم يصلح بالبلد و عم يمشينا بطريق بناء سوريا لتصير احسن دولة بالمنطقة و نموذج يحتذى بالديمقراطية الحقيقية و بتطبيق مفهوم المواطنة الحقيقية و بمكافحة الفساد و باعطاء كل فرد حريته بالتعبير و بالمطالبة بحقوقه و  ........ ويكون  بنفس الوقت نهج النظام هاد هو نشر الفساد و عدم الاصلاح و هدم سوريا و قمع الحريات و قتل الابرياء ....الخ
مستحيل يكون الجيش يلي انقتل و اندبح  و تمثل بجثثو يكون قتلو مسلحين حاقدين عالنظام و بيكفرو النظام و الجيش و بيتغطو بغطاء السلمية بالتعاون مع فضائيات كاذبة لتحريك الراي العام العالمي و لاستعطاف الناس باسم السلمية و المشاهد المؤلمة و يكون بنفس الوقت هاد الجيش عم يقتلو النظام لانو-انشق- و لانو كل هالاعداد انشقت فقتلها النظام  هاد غير جرحة الجيش يلي كمان - انشقو - و حاول يقتلن النظام فقالو بعد نجاتن من محاولة -قتل النظام الن- قالو انو مسلحين هاجموهم و قتلو اصدقاؤن و هنن لساتن مع النظام و لا في انشقاق ولا شي....

مستحيل تكون قناة الدنيا صادقة و تكون بنفس الوقت قناة الجزيرة صادقة

مستحيل يكون الاعلام السوري صادق بوصف الاحداث و صادق بالفكرة يلي عم يحاول يقنع الناس فيا و يكون بنفس الوقت الاعلام الامريكي و الغربي و الخليجي الناطق بالعربي صادق و عم يوصف الاحداث وصف صادق حقيقي بدون تحيز و عم يعتمد على مصادر صادقة و عم يعرض فيديوهات حقيقية و عم يعتمد على شهود عيان صادقين و عم يتحول لناطق باسم اتحاد التنسيقيات الصادقة و ناطق باسم صفحات الثورة الصادقة و ناطق باسم المعارضين الصادقين و النشطاء الحقوقيين و السياسيين الصادقين ...........

في تناقض كبيييييييييير بيننا مستحيل نكون كلنا على حق فيه و باختصار قصدي من هالحكي انو اكيد في حدا صح و في حدا غلط بين الرأيين
كل حدث من الاحداث يلي عم تصير عم ينقسم لرأيين مستحيل يكونو هالرأيين صح اكيد في صح و في خطأ
و رؤية الاحداث بشكل عام يلي منقسمةلفئتين اكيد فيا فئة صح و فيا فئة غلط

و كل حدا من هالفئتين مفكر حالو على حق و مفكر التاني على غلط و كل فئة عم تحاول تجيب ادلة تدعم كلامها و فكرتها اعلاميا و فكريا و بكل الوسائل الممكنة

وبظل هالانقسام الحيادية امر شبه مستحيل برأيي لانو كل طرف شايف انو رأيو صحيح و انو واجبو يدافع عن رأيو و انو رأيو هو الوطني و واجبو يدافع عنو لانو الموضوع هون بيمس البلد و بيمس الوطن
يعني يلي مقتنع انو النظام قاتل و انو لازم يسقط و انو مافي مسلحين كيف بدو يوقف عالحياد و هو شايف انو البلد بخطر بسبب-النظام و الرئيس الفاسد-؟
و يلي مقتنع انو النظام عم يسعى للاصلاح و عم يبني سورية و عم يدافع عن البلد ضد مسلحين بدن يأذو البلد و بدن يجروها لتدخل خارجي و متعاونين مع اعداء البلد بخطة غايتها تقسيم سوريا حسب الطوائف و الاعراق و اخضاعها للغرب كيف بدو يوقف عالحياد و هو شايف انو البلد بخطر بسبب -المجموعات الارهابية المسلحة المدعومة امريكيا و المدعية السلمية بالتعاون مع الفضائيات و وكالات الانباء العالمية-؟

لاحظو انو بكل الاحوال الشي المهم و المشترك انو البلد بخطر
البلد بخطر
انا من جهتي بشوف انو  واجبي ما وقف عالحياد لانو وقت يكون في هجوم عالبلد و حرب اعلامية شرسة و كلاب مسعورة عم تنبح بدها تأذي بلدي و خطر تدخل عسكري عم يلوح بالافق  فمن وااااااااااجبي الديني و الاخلاقي و الوطني اني وقف مع بلدي ضد هي الحرب
وبحترم كل مين بيخالفني هاد الرأي و يلي شو ما كان رأيو بس اكيد هو شايف انو البلد بخطر
سوريا بخطر
شو ماكان سبب الخطر برأيو
كنت بتمنى و كلنا منتمنى انو نكون متفقين على هاد السبب و نكون مجمعين عليه لان وقت نكون مقتنعين بسبب معين  واحد انو هو مصدر الخطر على بلدنا الحبيب سوريا فساعتا حنقدر نقاومو اكتر و حنقدر نتوجه كلنا ايد و روح وحدة لنوقف ب وش مصدر الخطر هاد و نحاربو بكل ما اوتينا من قوة
بس بما انو نحنا منقسمين بهالشكل فخلينا نكون واقعيين
ماحنقدر نكون حياديين بظل هيك اختلاف حاد
كل واحد فينا حيضل يدافع عن موقفو و يسعى لاقناع الآخر فيه
بس منقدر نساوي شي واحد

انو ( نقتنع) و (نؤمن) انو يلي خالفنا الرأي و يلي عم يقول افكار هيي غلط برأينا و هيي ضد البلد برأينا ، خلينا نقتنع و نؤمن انو هالشخص حابب البلد متلنا و قد مو نحنا حابينها و يمكن اكتر ، و هو تبنى هيك افكار عن (حسن نية) و مفكر انو عم يعمل خير للبلد متل مو نحنا مفكرين انو عم نعمل خير للبلد بافكارنا هي ،
يعني انا بشوف انو يلي مقتنع بينو و بين نفسو انو يلي عم يصير فيه تآمر على سوريا و مطنش و مابدو يعترف بهالشي وبدو ينكر الادلة و يوقف مع الطرف المعارض لاسباب سياسية او طائفية او  اي سبب كان ، فهاد الشخص قطعا عميل و عم يخون بلدو و بقولها بالفم الملآن
و يلي مقتنع بينو و بين نفسو انو يلي عم يصير احتجاج و ثورة شعبية سلمية و شايف انو النظام قاتل و مجرم و انو الفضائيات صادقة و مابدو يعترف بهالشي و مطنش و واقف مع النظام  و عم يظهر التأييد الو لاسباب شخصية او لانو مصلحتو مع استمرار النظام او لانو مكولك و بدو يمسح جوخ للنظام الحاكم لو شو ماكان فهاد كمان خاين و عميل و وضيع و ماعندو مانع يبيع بلدو مشان مصالحو الشخصية

انا هون ماعم ناقش مين الصح و مين الغلط و هل في مؤامرة ولا لأ و هل في مسلحين ولا لأ و هل في حرب اعلامية على سوريا ولا لأ
انا عم ناقش بفكرة مهمة كتيييييير وهيي اعتقادنا بنية الاخرين و مدى سلامتها طبعا مافينا نحكم على نوايا بعض بس واجبنا بهيك ظروف نظن ببعض انو نيتو كانت سليمة حتى لو رأيو غلط ، ممكن يكون انخدع بأحد وسائل الاعلام او التبست عليه الامور او كان ضحية كذب و تلفيق جهات معينة
انا اؤيد وجود نقاش سياسي بين طلاب الجامعة و اؤيد هادا الامر جدااااااااااااااااا فسوريا بحاجة النا هلأ و الانغلاق على انفسنا او منع الحوار و اغلاق باب النقاش و الحوار السياسي ما رح يحل المشكلة بالعكس ممكن يزيد الاحتقان او خليني سميه التوتر بالمنتدى
هادا هروب و مابيغير بالحقائق شي و سوريا بحاجة لشباب واعي حر  مابيعتبر شي مقدس الا الوطن و مستعد يغير وجهة نظرو بأي لحظة اذا ثبتلو عكس معتقداتو بالادلة الصحيحة  و متل ما قال الرسم بالكلمات: ( ..المشكلة هي ما ذكرته عن ثقافة الاختلاف وعدم تقبل أي شخص لأي فكرة لا تطابق ما في رأسه أو ما تربى عليه...--ادخل أحيانا بنقاشات فأبدأ بأن أقول للرأي الآخر إن لم تكن لديك النية لترك اهم ما تدافع عنه من مبادئ في حال أثبت علمياً ومنطقياً بطلانها فلا تناقش..وهذا ما أطلبه من الجميع أن لا نجعل النقاش هو للدفاع عن ما نعتقد بصحته بل يجب وضع آرائنا في قفص الاتهام قبل النقاش ونسفها كاملة في حال ثبوت زيفها...وليس هذا خيانة للمبادئ بل تصحيح للعقليات وتطوير للذات.. بالنسبة لي فلدي واجب تجاه وطني وأمتي بأن أضع الحقيقة أمام عيون الناس وأعري الباطل حتى يبان الأبيض من الأسود...ونحن جميعاً في رحلة بحث عن الحقيقة من الولادة حتى الموت ولا أحد يستطيع الادعاء بأنه يملك الحقيقة المطلقة..أرضيتنا المشتركة هي حب الوطن و " ستبدي لنا الأيام ما كنا جاهلين " )

سوريا بحاجة لحوارنا نحنا الشباب نحنا الجيل يلي حيبني هالبلد بوعيو و حريتو و تقبلو لجميع افكار ابناء هالبلد
انا ماعندي شك ولا واحد بالمية انو كل حدا كتب رأي معارض بالمنتدى ماعندي شك ابدا انو بيحب البلد و انا واثقة انكم انتو - كل واحد فيكن عارض او قال عن النظام شو ماقال و عن الاحداث شو ماقال- انتو بتحبو البلد و انتو سوريين حقيقيين و يمكن  اكترمني و يمكن تكونو احسن مني و من مية متلي و حريصين على سوريا و وحدتها و امنها و استقرارها و رافضين  التدخلات الخارجية تحت اي عنوان و بأي ذريعة و بدكن سوريا تكون احسن بلد بالعالم كلو مو بس بالعالم العربي و حتسعو لهالشي معي و مع ومع كل مؤيد للنظام لانو نحنا شي واحد نحنا اخوة نحنا دم واحد و روح وحدة و مصير واحد لك نحنا ولا شي من دون بعض و مافينا نبني هالبلد و ننهض فيها و نخليها تزدهر الا اذا حطينا ايدينا بايدين بعض
كنت بتمنى الموقع ما يوقف الحوارات السياسية ، يمكن في اخطاء صارت من كل الاطراف بس الحل ابدا مابيكون بمنع الحوار و ايقافو هادا خطأ كبيير خصوصي بهالوقت ، و بالعكس فتح باب الحوار مع  وجود مشرفين على هاد الحوار بيمنعو الاساءة و التجريح بكافة اشكالها ، فتح هيك باب ممكن يطلع منو فائدة عظيمة النا و ممكن يوصلنا لحقائق كتيرة او على الاقل حيخلي التبادل الفكري و النقاش البناء المبني على احترام الاخرين بدون تشكيك بنواياهم حيخلي روح الالفة تقوا بيننا و روابط المحبة تزيد و تتمتن و حتى لو ماحدا غير قناعاتو بس اكيد حنستفيد من بعض و يمكن نحنا السوريين نقدر نقترح افكار او نبتكر حلول تساعد ببناء بلدنا و تقرب وجهات نظرنا و حتى تساهم بحل الازمة يلي عم نمر فيها ،و بانقاذ  بلدنا بقوتنا و وحدتنا و محبتنا لبعض و عشقنا لسوريا افكارنا النيرة الشابة البناءة


بتمنى ينفتح قسم خاص بالحوار السياسي و مايكون النقاش بالسياسة بالمنتدى الا ضمن هادا القسم و يكون المشرف عليه منتقى بعناية و مؤهل للحوار السياسي و ذو شخصية دبلوماسية و تفكير حضاري يقبل الاختلاف و  باحث عن الحقيقة و يسمح للجميع بابداء آراءهم بحرية و النقاش بها دون تجريح احد لاحد
خلينا نورجي العالم انو نحنا شباب سوريا و طلاب جامعة دمشق شباب حضاري متفهم و بيقبل الاختلاف و بيحب بعضو مهما اختلفت وجهات النظر  و على مستوى عالي من الوعي و قدر كبير من تحمل المسؤولية بنقاشاتناو حواراتنا يلي كلها بناءة باذن الله...... بناءة لهذا الوطن العزيز الغالي على قلوبنا جميعا -سوريا- يلي منعشق ترابها و هواها و سماها و اهلها و ناسها ..........

بعتذر كتييير عالاطالة بالحديث و ردي اصلا جايي متاخر بس حكيت بدون ما حس على حالي و لا عد كلماتي لاني بعشق سو ريا و بعشق كل سو ري

مشكورين جميعا و على جميع مساهماتكم يا سوريين
سلااااااااااااام