رد مشاركة : انت مين .... ؟؟؟
اسألوا اللي سافر وتغرّب 15 -10 سنة عن البلد ,, بعد ما سبها وسب الشغل والفرص والعيشة فيها ..! وبعدا ندم ,, وتحسّر واشتاق للميمة و"يشم" تراب الوطن ..!! -بس بعد شو- .... بتعرفوا أنو محبة هالبلد بقلب كل قلب عم ينبض ع أرضو ,,,
عم تقوليلي أنت مين ..!!؟ أنا سورية وبكل فخر .. وعم صارع أنا وأهلي اللي عم ينحتوا الصخر ,, لحتى ما يكون مصيري متل مصير الغربتلية
بس كمان لا يضحك الواحد على حالو ,, أنا مع mar0000 مليون بالمية ,,
بحب بلدي كتير ,, وبعشق هوا الشام للعضم ..
بس ما بحب الديئة اللي عايشينها !! ما بحب الاستخفاف بئيمة البني آدم .. ما بحب كب مصاري كنت مخبيتها لوقت الديئة ,, لأدفعها لموظف مرتشي رغماً عن أنفي ,, بس لأنو مضطرة !! ما بحب يوئفني الشرطي كل ما إجى ع بالو ,, لياخد ويعطي معي ويعلّ قلبي وما يحل عني لطقلّو 200 ليرة !! ما بحب شوف بابا عم تطلع عيونو كل مرة بيروح بيشتري "خضرة" للبيت ,, ما بحب شوف بابا مكسور ضهرو من مصروف بيت ما عم تفوت عليه قطعة جديدة ,, !! ما بحب شوف ماما عم تحاول تخبي فاتورة السمان بس مشان بابا ما يحس أنو أختي عم تاخد معها شوكولا كل يوم عالمدرسة لأنو "عم تشتهيها" !
ما حدى عم يقول روحوا شوفوا دول الخليج ,, بالنهاية هي كلها استثمارات لشركات أجنبية ,, ممكن بين يوم وليلة تتوقف كلها
ولا المطلوب المفاهيم "المغلوطة" عن الحرية ولا الديمقراطية ,, لأنو مظبوط متل ما حكت دمعة بالموضوع أنو شعبنا مو فهمان من الديمقراطية غير العياط والسّبّ !! !!
بس تعي قولي لعالم هيك عم تعاني "أنت مين..!؟" ,, ح يجاوبك ... :"ليش أنتي مين ..!؟"
وأخيراً .. أنا ســـــــوري ,, آه يانيالي .. من قلبي بحبا
تحياتي دموعة
انت مين .... ؟؟؟ 
