السلام عليكم:

اقتباس

بس لو كان فيكم تعرفوا المرجع الانكليزي يللي مترجمة عنو النوطة في حال ما تأمّن البحث ....د.انطون ما قلكم عن مراجع مهمة بهالمادة ؟؟

بكرا بتصيروا ماجستير ومنحكيلكم كيف تصيروا تمشوا حالكم.
الله يخليلنا النت، قدرت جيب مصدر الجدول بالانكليزي وبعض من الشرح عليه.
يعني تقريباً نص الجواب صار عندي، من هون للمسا إن شاء الله بيكون مشي الحال.

شكرا كتير غلبتكم معي.

ادعولنا بهالمادة لأنو نظام فرنسي مع هيك نوطة بشي 200 صفحة ما بعتقد نعرف نجاوب برياحة.
يا رب.

أووووووووووه ياما صارت معي مغامرات مضحكة مع الدكاترة متل الدكتورة فوزة _الدكتورة سوسن _الدكتور جمعة _الدكتور أحمد حسن وغيرهم الكثير
والأظرف كانت مع الدكتور أحمد سمير النوري

بس مارح اذكرها هلأ لكن بعد الفحص ان شاء الله لأني مستعجل و ماني مركز هلأ

شكرا الك سلام 

السلام عليكم


فارما
الحمد الله يلي لقيتو الجواب والله الواحد بينقهر لما يجي السؤال وما يعرف يجاوبو....
إن شاء الله يترفعوها للمادة بعلامة عالية..

***************************
princess

^_^

أما شو هالدكتور النهفة يلي عندكم

شكرا لمرورك الكريم

************************
مراقب أدوية

بانتظار المواقف مع هالدكاترة... بس استوقفني اسم.... دكتور جمعة....   ولي ... ما بتمنى اعلق معو بنوب.....

الله يوفقكم بالفحص

شكرا لمروركم....

مرة الدكتور سمير النوري كان بالمحاضرة كعادته عم يبهدل الدفعة على قلة الحضور والالتزام والتأخر عن المحاضرة فقام يحكينا عن الجامعات الخاصة وقديش فيها التزام من الطلاب وقديش طلابن فهمانين مقارنة مع طلاب جامعة دمشق وقديش هنن بيسألوا الدكاترة  وبيهتموا انو يتعلموا بغرض العلم وقال بنبرة حسرة "انو من أربعة عشر سنة مشتهي  طالب واحد  من طلاب جامعة دمشق يسألني شي سؤال "

وطبعا أنا كنت معجز الدكاترة بالأسئلة وهلأ اجتني فرصة دهبية

طبعا طلاب الدفعة قديش مادايقهن  كلام الدكتور وبهدلتوا صاروا يطلعوا عليي و يقولوا للدكتور في طالب بدو يسأل سؤال فما كان مني الا قوم واسأل شي سؤال لحتى اثبت عكس كلام الدكتور انو طلاب جامعة دمشق أفهم من الخاصة

وبالفعل سألتوا سؤال عن الفرق بين صيغتي دوائين  مشتقين من نبات الجانسيان

فاسمعوا جوابوا  شو قللي وانتو احكموا :

قاللي" مرة كنت بالجامعة الخاصة قام وقف سألني طالب سؤال فصرت اشرحلوا شي نص ساعة عن سؤالو فقام ادايقوا منو رفقاتوا وطعموا قتلة بعد المحاضرة "

المهم انا ماسكتلوا وقلتلوا معليش دكتور أنا مستعد أكل قتلة بس بدي الجواب عن سؤالي

واسمعوا شو قللي  واحكموا كمان : 

قللي" اذا بدي جاوبك عن السؤال فراح طالبكن فيه بالفحص" قام صاروا طلاب الدفعة يصيحو " لا دخيلك دكتور مابدنا "  وصاروا يزوروني بعيونن ويسكتوني

قام قلتللو يادكتور معليش أنا موافق تجيبوا بالامتحان بس بدي الجواب

قام جاوبني رفع عتب بكلمتين بس  تصوروا لحتى يسكتني ويخلص من هالعلقة السودا   

بس بصراحة الدكتور سمير من الدكاترة المحبوببن  بالنسبة لي فهو شخص  متواضع ومرح  رغم انو بعصب عالطلاب أحيانا  بس قلبو طيب كتير كتير وبيتقبل المزح وبيسامح بسرعة وكانت العقاقير أحب المواد بالنسبة لي مع الكيمياء الصيدلية والأدوية  

 

ألقاكم في لقاء أخر .....هادا طبعا اذا ضل الموضوع بخير لوقتها

دكاترتنا الحمد لله قلبهم طيب بشكل عام وقليل ما يلتأموا من الطلاب


والله أنا بتذكر شغلات صغيرة يمكن ما في دكتور إلا وصاير شي بتذكرو فيه بس أكتر شي هي مواقفي بالتأخير عالمحاضرة -تبع الساعة 8 خصوصاً- والمشاغبة الخفيفة غير المقصودة

تذكرت هلأ شغلة صارت معي:

لما اعتمدولنا نظام الشعبتين عند آخر سنة كنت حب أحضر قسم الدكتورة لمى بشعبة وقسم الدكتورة وفاء بشعبة تانية لحتى كون مركزة تمام


بس مرة بآخر محاضرة للدكتورة وفاء عطت مراجعة شاملة وحسيتها كتير مفيدة لدرجة اني ما حبيت أكتب شي لشارك وركز بس......فقررت أحضر بس قسم المراجعة مرة تانية مع الشعبة التانية وطلبت من رفقاتي يعلمولي لما توصل لآخر فقرة بالمحاضرة لحتى أدخل وفعلاً هيك عملوا

وحتى تعم الفائدة وأنا وداخلة شفت Iron man ناح القاعة وقلتلو عن فكرتي الجهنمية بإعادة المراجعة وفعلاً اقتنع ودخلنا......طبعاً إشارات التعجب كانت واضحة على وجوه الطلاب والدكتورة لما دخلت بكل ثقة وإذ بتخلص الفقرة بعد دقيقتين وبتطلع الدكتورة بعد تمنياتها بالتوفيق لنا بالامتحان دون مراجعة

هون طبعاً ما صفي حدا إلا وعلّق على دخولي الغبي بثقة لحضور آخر جملتين من المحاضرة !!!!   وأكلت زورة من iron man ولهلأ كل ما بتذكر شكلي بتضحك....

السلام عليكم

مراقب أدوية

منيح يلي ما أكلت القتلة...

بانتظار الباقي... 

golden pill

ما اقدرت ما افرط من الضحك على هالموقف... عنجد خزوة 

اقتباس

دكاترتنا الحمد لله قلبهم طيب بشكل عام وقليل ما يلتأموا من الطلاب

إي والله صدقتي 

على نفس سيرة التأخير  

في مرة كنت متأخر ساعة ونص عن محاضرة الدكتور عيسى سلوم اللي كان عم يعطينا صيدلة صناعية

المهم دخلت الى المدرج بكل ثقة وأخر شي سمعتو عم يحكيه  الدكتور كان عن التتبع في الصناعة الدوائية وهي عملية هامة يقوم بها المصنع لكشف الأخطاء في التصنيع واذا بيوقف الدكتور المحاضرة وبيطلع فيي ويقللي " شو بكيررح نخلص المحاضرة  شو الشغلة المهمة الللي تأخرت مشانها كل هالوقت " وكان الهيئة من وشو وتعصيبو انو  رح يطردني من المدرج

وبهالوقت العصيب وأنا مهدد بالطرد والدكتور معصب والطلاب كلها عم تترقب هالموقف البهدلة   وشو بدي جاوب واذ بقللو وبكل برود أعصاب " دكتور كنت عم ساوي تتبع "

قام الدكتورضحك ضحكة قوية  ولا كأنو  كان معصب من شوي وقاللي خلص  قعود

بس أنا كان عزائي الوحيد أنو ما إجى من المراجعة شي (تقريباً) بالفحص ...


بس عنجد السنة الخامسة كانت سئيلة لأن كلها بالقاعات

زمن المدرجات كان الواحد بيسلت ع المدرج أما هلأ بالقاعة بدو يمر قدام الدكتور والكل يطلع فيه وهو ماشي لآخر القاعة ليقعد (هاد إذا كان في حضور))

اقتباس

الجامعات الخاصة وقديش فيها التزام من الطلاب وقديش طلابن فهمانين مقارنة مع طلاب جامعة دمشق وقديش هنن بيسألوا الدكاترة  وبيهتموا انو يتعلموا بغرض العلم وقال بنبرة حسرة "انو من أربعة عشر سنة مشتهي  طالب واحد من طلاب جامعة دمشق يسألني شي سؤال

بس حابة وضح رد على هاد الكلام... أنو أنا طالبة بجامعة خاصة... وكل الطلاب الي عنا بهتونا بطلاب جامعة دمشق وعلى انهم أفهم وانهم بيسألوا أكتر وبيحضروا أكتر
يعني باختصار كل الدكاترة بيحكو عنا نفس الحكي وعندكم نفس الحكي وكلهم عم يضحكوا علينا وعليكم
بس أخي مراقب أدوية الله يسامحك يعني طلعنا نحنا طلاب الجامعات الخاصة بنظرك مو فهمانين؟؟؟؟؟؟

السلام عليكم

أختي دانا مراقب أدوية ما قصد بكلامو حدا... بس إذا بدك للحقيقة وأكيد بتوافقيني عليها إنو السواد الأعظم من طلاب الجامعات الخاصة ما بيعرف من الفرع يلي عم يدرسو غير الاسم... وهدول كمان موجودين عنا بس بنسبة قليلة والحمد لله....

أكيد ما عم نشمل الكل في بالجامعات الخاصة طلاب أمثالك مجدين وآخدين القصة جد وبدهم يكملو دراستهم ويفهموا أكثر عن فرعهم... وهدول طبعا يفتخر فيهم بس للأسف هنن عندكم فئة صغيرة....

بتمنى ما تتحسسي من الموضوع هو بالأخير الكلمة الفصل بمجال العمل ومين بيقدر يثبت وجودو ضمن ساحة العمل....