اقتباس
بس ربكم سترها وما اكلت مخالفة والا كانت بتقوصني
بما أنو الشغلة فيها السواقة و ما سواقة
و بحسب الخبرة
فبدكون تسمحولنا نحكي
كان و ما كان في يوم من ذات الأيام
أخدنا السيارة أول مرة لحالنا و طلعت معي أختي
و رحنا هلى أساس بدنا نعمل مشوار صغير و تفتيلة
شنو السيارة كنت مستأجرها جديد بعد ما طلعت الشهادة
صارت الساعة شي 12,30 الظهر قمت قلت لحالي لروح أخد أختي لصغيرة من المدرسة
و يا أسيادنا الكرام المدرسة واقعة في المهاجرين على طريق السكة (خط دوار شمالي)
و قلت لحالي لأطلع من طلعة ما تكون معجوقة شنو بخاف تطفي معي السيارة لانو أول يوم
و رجلي ما أخدت على الدبرياج و طلعنا من طلعة حلوة فاضية رايقة ما في أحلى من هيك
المهم و بلا طول سيرة
وصلت لنهاية الطلعة و بدي أفتل على اليسار و أمشي على طريق السكة
و إذ بتجي سيارة بقوم بضربلكون هل الفرام و بخلي السيارة تمرق (ذوق و أخلاق)
و لاجل الصدفة بكون عمو الشرطي أبو الميتور صافف ميتورو على الرصيف و عم يمشي السير
المهم فضي الشارع و أجينا بدنا نمرق
رفعنا رجلنا عن الدبرياج متل ما علمونا بمدرسة سواقة شوي شوي
حسيت السيارة حملت على الدبرياج
و يإيم رجل عن الفرام و بجي بدي أدعس بانزين بتطفي السيارة
لعمة شو القصة شو خاني الدبرياج من أول مرة يا باطل
و منعيد المحاولة و على ما يبدو أنو الشرطي أشتلق علي
و لأجل الصدفة كمان طفيت
شغلنا و عدنا التجربة مرة تالتة و مرة رابعة
و إذ ما بلاقي غير الشرطي عم يطلع عليي و فارط ضحك و عم يشوبرلي بإيدو وعم يقلي على مهلك
المهم و بعد شي ست سبع محاولات فاشلة و الزمامير خلفي بتصرع جبل
لاحظت
أني معلق لغيار التالت
شنو كنت طالع مصورخ بالطلعة
و مرقت مناح الشرطي و كان عم يضحك مديت راسي من الشباك و بدي و ضحلو وجهة نظري
و شو كان عم يصير بالقلب يلي رتفع ضغطو و أزداد عدد دقات قلبو شنو أول يوم
و السيارة أجار
قام قلي و هو عم يضحك " لك و الله ما بخوف ,, شبك ليش خفت مني "
المهم أنا أضحكتلوا ضحكة حمرة (مو صفرة هي بتجي غير شكل متل هي
)
و قلتلو شكرا
و شديت و معد بينت
بس الله ستر
و الأحلى من هيك أنو صارت السيارة بهداك اليوم كل ما تشوف شرطي تطفي
(كوع _ طلعة _ أشارة مرور _ ......."شنو كنت نسيان الغير الأول ")
بس بعدين أشتغل لسباق و خبط السيارات و لا سابق و لاحق
بس يوم لا ينسى كان رائع سبع ساعات قاعد ورى الدركسيون صرت معلم و لا شوفيرة
الجادات سلمية و الشيخ خالد
"الله ستر "
لنا عودة
كان معكم مراسلكم عبد الله من موسكو
و شكرا
و السلام عليكم
يا ارض انشقي وابلعيني 
