رد مشاركة : اسبوعا لكل عضو نعبر فيه عن حبنا....
السلام عليكم مجدداً ..
بنتابع ..
اقتباس
ما حلوة فوت واطلع بدون ما اسأل
له ولو أخت hevien .. خدي راحتك ..
واضح انك مابتحبي تكتري أسئلة
اقتباس
اولا . (ههههههه بلشنا) انت بتحب تعمل مقالب بالناس؟؟
هلا كل الشباب بيعملو مقالب بالاساتزة بالثانوية ..... بقى ازا عامل شي مقلب احكيلنا
ايييييه .. رجعتيني لورا كتير .. لأيام من أحلى أيام عمري .. اي والله
بأساتذتي .. كتير و مقالب بتشيب شعر الراس ..
وبكل السنين بمعدل شبه يومي 
بس خطر عبالي مقلب ظريف .. عملتو بأستاذ العربي .. سنة الحادي عشر
وقتها ربطتلوا شوية شرطان تربيط (أسلاك) بالممر بين مقاعد فرقتين .. وهي الأسلاك لونها فاهي
فمن الصعب انها تنشاف .. وعملتلو متل حقل ألغام ..
شي من هون وشي من هون وشي شاقولي يعني المقلب ع أصولو
وهو الاستاذ قرب وعلق والله علقو .. وكان رح يقلب رغم انو ضخم بالجثة(جسمو يعني)
وانا روح قالب ع ضهري من الضحك
..
هلأ هو بضحكتي وبدونها كان رح ينكشني ومارح يشك بغيري
فكيف اذا كانو ولاد الحلال كتاااار .. المهم قال بدو يضربني فبعت طالب يجيب اكبر مسطرة
وبنظرة عين مني صوب هالشب .. هو رفيقي شوي .. راح الأخ وجبلو أصغر مسطرة تبعوت التسطير
فـ فلفت فيه الاستاذ وضربو الو ..
ولما رجع وجاب مسطرة ضخمة .. الله لا يورجيكن
مدري شو طقت براس الأستاذ ... " قال بطل يضربني .. هو انا فرحت بالأول .. بس قال بدو يحطلي 3 صفار مكعبة بدفتر العلامات .. وانا عم قلو لأااا .. ومشان الله .. وبقلبي مو فارقة معي .. المهم نفدنا "
وذكرتيني باستاذ .. عملنا بسنتها حادث بالسيارة وضربنا بحيط بيتو .. وتصدع الحيط بس عالخفيف
وقتها .. نقم علينا نقمة غير شكل .. بس طلعنا الفرق .. لما قفلنا باب بيتو من برا
بس والله مع ذلك .. كنت منيح بالدراسة
والنا مكان بأول 5 مراتب بالمجموع .. والحمدلله
اقتباس
وكمان برفقاتك شو احلى مقلب سويتو؟
مرة كنت مع رفقاتي بمنطقة بعيدة شوي والدنيا شتوية و ليل وبرد ..
ووقتها مثلت عليهن انو السيارة تعطلت .. فنزلو كلن يدفشوها
وانا ولا عبالي حاطط رجل ع رجل وهي شغالة ..
وبعد شي ربع ساعة من الدفش
اجا عبالي شغلها وروح واتركن ..
وغبت شوي وبعدها من طيبة قلبي رجعتلن
اقتباس
شو هيي اكبر رعبة ارتعبتا بحياتك؟
كمان هالشغلة مرتبطة بعالم السيارات ..
مرة حادث وكان وقتها أبي السائق .. والحمدلله سليمة
ومرة مع ابن عمي .. بس بشكل تلاحمي وش لوش
.. وكمان الله ستر
اقتباس
شو هو احلى مشوار طلعتو؟ ومع مين ؟
هو بس مشوار .. المهم
بتذكر مرة نزل التلج بمدينتي بس ماعلم عالأرض حتى .. و بمناطق جبلية قريبة علينا كان التلج قوي
فطلعنا انا والشباب لهنيك ولعبنا وانبسطنا وتصورنا و و و لشبعنا ..
وبعدها عبينا السيارة تلج كان معنا بيك آب .. ورجعنا ودخلنا عالشارع الرئيسي ومين ماكنا نشوف
كنا نسلخو دعبولة تلج من للي بحبها قلبكن ..
بنعرفو ولا مابنعرفو .. ووقتها قضيناها سري مري
هيك لخلصت كومة التلج .. والناس كلو تحمضلنا ع قتلة ..
بس بجد مافلت حدا منا وجننا البلد وقتها
بس بالمقابل كانو مبسوطين .. انو عم يشوفو التلج لأنو لسى ماكان نازل عنا
اقتباس
شو هيي اكبر خناقة فتت فيا ..... وكم بوكس اكلت (هههههههه عم امزح)
خناقة بصف العاشر .. اذا بقلك نص المدرسة اشتركت يمكن ماتصدقي
وطبعاً بحكم وجود الشباب رفقاتي وولاد عمي واخي وكل ولاد الجيران .. فصرنا شي مية
وقدرنا نطلع بكرامتنا .. رغم كل شي .. والحمدلله النتيجة والأمور سارت لصالحنا وقتها
وهزمناهن هزيمة نكراء ..
وللتوضيح والأمانة ... كانت علقة حق ورد بلى
اقتباس
اممممممممم
شو هو الشي اللي ازا عملو اي حدا ادامك بتعصب كتييييييير (مشان نعملو ..... قصدي ما نعملو )
هلأ أنا بعصب بسرعة .. بس بروق بسرعة كمان .. والحمدلله على هالنعمة
بس اذا قصدك بالمنتدى مثلاً
فعندك ..
الفضوووول .. والتصرف بسداجة
(( اللي ماعندو استعداد يجرب ليعرف السبب دغري بحط سؤال ))
اقتباس
يللا حاجة هدول حاليا ...
بس بدون مسبات هه
يعني فهد قلنا نتوصى فيك انا ما دخلني (روح اتخانق مع فهد ههههههه )
ماشاء الله حولك .. ماقصرتي ..
وعالمسبات لا تاكلي هم مو عيب ..
الا شوي 
عم نمزح أسئلتك حلوة بس بدها وقت
ومشان فهد .. لاتخافي خليتو يندم عالساعة اللي رشحني
موفقة .. ودمتِ برعاية الله
اسبوعا لكل عضو نعبر فيه عن حبنا....
.. وتحتاج لوقت طوييييل 
..........بس على فكرة أجت بوقتها و بما انه السيد سلفستر عالمقلاية و ما بهون علي يتحروق اكتر من هيك(مو مشان شي بس مشان المقلاية ما يصرلها شي) رح لي البهارات خفيفة و ما رح تقل الاسئلة 
