مسا الخير إيلان..إنشالله تقرأي الرد قبل ما تقرري عسى يفيدك..

أولا: أنا صرلي 8 سنين (5جامعة و 3 دراسات) بهالكلية يلي بحبها وبرتاح فيها نفسياً كتييير...كلية رائعة وجامعة دمشق غير شكل.

ثانياً: [size=5]أنا بفضل الله بدرّس بجامعة القلمون ورحت وشفت وعينك ما اتشوف إلا النور..شو مستوياااات!!!! ..والله قد ماكنتي شاطرة رح ينتزع مستواكي العلمي معون لأنو مارح اتلاقي جنس المنافسة

من يومين طالب خامسة صيدلة قلي كمان انت خريج دمشق قلتلو ايه.. بتعرفي شو قلي بقلب محرووووق "لك نيالكون وألف نيالكون" الشام غير شكل...

أخيرا: الجو هنيك معتقل مافيكي تروحي وتجي... متل المنفى تماما..بعدين انتي مستألتيها المشوار كل يوم 90 كم...لك أنا بطلع يوم واحد وبتكركب

اتكلي على الله وتعي لعنا..وحتى لو أسنان بدمشق أنا بنصحك بكليتنا الحبيبة

تأثرك ودمعتك غالية على كل أعضاء المنتدى الله يوفقك وين مارحتي ...أرجو أن اقرأ ردك قريبا

لا تحتاري ونصيحة من اخت  تعالي على كلية الصيدلة وبس تفوتي وتشوفي المبنى وتتعاملي مع عيلة الصيدلة رح تعرفي اديش الله بحبك لانو طلعلك صيدلة وبجامعة دمشق
ما بتصدقي اذا قلتلك مرة السنة الماضية رحت مع رفيقتي على الجامعة الدولية والله شي ببكي هدول بدون يصيروا صيادلة والله حرام         

مرحبا أيلان...........

بس بدي الك..................


عنجد محتارة؟


عنجد محتارة؟                  


وليييييييييييييييييييي              


شو بدك بطب الأسنان؟ بعدين عفكرة مو بس انتي يللي احترتي بين الصيدلة و طب الأسنان,كل يللي فاتو صيدلة عندن خيار طب الأسنان لأنو متل ما بتعرفي التنتين نفس المعدل ........................


بعدين أنا دكتورتي تبع الأسنان هي بنفسها قالتلي برافو عليكي لأنك دخاتي صيدلة            


مشان هيك فوتي صيدلة و توكلي على الله            
و طلعي حالك من حالة الكأبة الوهمية          

عندي صديق عانى هي السنة من نفس المشكلة .
فاحتار بين طب الأسنان و الصيدلة و الهندسة الطبية.
فاقترحوا عليه بنسبة مرتفعة للصيدلة (كونها الأسهل دراسة).
ومن ثمّ الهندسة الطبية (كونها فرع جديد و ذات مجالات واسعة -وهو اختصاصي الذي أدرسه).
و أخيرا طب الأسنان.
طبعا كانت الآراء من قبل أطباء الأسنان أكثر.......
ملاحظة: يمكنك في الصيدلة أن تتخصصي بمجال الطب المخبري - و هو مجال رائع جدا -
في النهاية ارجعي لقناعتك و توكلي على الله ....
المهم أحبي فرعك و لا تسمعي لآراء الطلبة المشوشين فما ذاك إلا لأنهم فاشلين في دراستهم.
أرجو أن أكون قد أفدتك....

السلام عليكم

هلأ بس بدي استفسر عن شغلة والله العظيم فتت بالحيط
يعني ممكن حدا يفهمني انو هالموضوع مو من سنة تقريبا او اكتر من سنة حتى .....
يعني بصراحة الموضوع لفت نظري تاريخ كتابة للاخت ايلان ......... مممممم  عن جد لانو كتير حابة شارككن بالنقاش لانو بمسني هالموضوع ............
بقى حدا يشرحلي الله يرضى عليكتن

باذن الله انتي أختي في الله

برأي المتواضع:بنصحك اتشوفي حالك ع شو بتميلي أكتر,وصلي صلاة استخارة......لو يعرف الناس فضل صلاة الاستخارة لما حدا الا اعتمد عليها لقيمتها.لأنك بتوكلي أمرك والشئ المقبلة عليه في حكم الغيب لله عز وجل هو أعلم بالي فيه خير الك حاليا وبالمستقبل,ومابخيب أملك,ونفسيا بتكوني مرتاحة لأنك واثقة باختيار الله والي ماعنده غير الخير.........كان صحابة رسول الله صلى الله عليه وسلم يستخيروا الله في كل أمور حياتهم حتى في شراء النعل(دليل التوكل والاستسلام الكامل لله لثقتهم به)

ع كل الله يوفقك ويدلك ع الي فيه خير الك

يا جماعة ...

إيلان صارت سنة تانية صيدلة ..!!  

اقتباس

عن جد لانو كتير حابة شارككن بالنقاش لانو بمسني هالموضوع ............

تفضلي .. 

ما في مشكلة ...

                                                                                                                                                                                           

لك والله قلت لحالي هالموضوع مارئ عليي قبل هالمرة بس ما استرجيت رد وقتها لانو بخاف حدى ينأذى بكلامي ........... وكنت خايفة الاخت ايلان تتشتت بحكيي ....
بس بما انها صارت سنة تانية واكيد ربنا اختار الها الخير .... يالله رح احكي وفش قلبي

هلأ اكيد مافي حدا بيتخير بين جامعة دمشق وبين اي جامعة خاصة الا والعقلانية بتقول انو يختار جامعة دمشق ...... بس مو لشي سيئ او مو لانو الجامعة الخاصة هية قليلة علميا ومافيها مستويات جاية تتعلم ..... بس بصراحة انا لو خيروني بين جامعة دمشق وجامعتي يلي هلأ انا فيها كنت اخترت جامعة دمشق لسبب انو كنت بحلم انو اتخرج منها متلي متل كتير عالم

هلأ في شغلة تانية العالم كتير بتتناقل الحديث انو الجامعات الخاصة مو معترف عليها بوزارة التعليم العالي .... بس بالحقيقة غلط هالكلام ومعترف عليها مو بس بسوريا بكتير دول عربية واجنبية كمان

بالاضافة لشغلة كتير مهمة بالجامعات الخاصة يلي بتتميز فيها عن جامعة دمشق وباقي جامعات القطر انو منهاج الجامعات الخاصة هو منهاج متجدد يعني ممكن انا ادرس شغلات الدفعة يلي بعدي ما يدرسوهن بشكل متعمق متلي ويصير في عندهن بمنهاجهن شي تاني يتعمقو فيه وبكون هالشي هو اكتر تطورا

غير انو الجامعات الخاصة بيدرسو بالانكليزي صحيح مو انكليزي 100% بس عالاقل هية لغة العلم يلي بتأهلك لاي مرحلة متقدمة بعد ما تتخرج من فرعك

وفي شغلة حارقة قلبي من جوا جوا ...... انو في ناس بقولو ( انو الجامعات الخاصة مافيها تنافس ابدا ومافي ناس جاية تتعلم يعني كلهن جايين مظاهر وبس )
والحقيقة غير هيك اطلاقا .... لانو على سبيل المثال واحد بكون جاية عالجامعة الخاصة وعلماتو بتأهلو ليدخل صيدلة بالجامعة الخاصة بس هوة بيختار الهندسة المعلوماتية او اي فرع تاني غير الصيدلة ....... يعني القصة ما صفيت مفاضلة ويلي بيطلعلي من رغباتي رح فوتو ......... هون القصة عم تكون من دافع الشخص
ورح احكي على يلي عم شوفو عنا انو في تنافس كتير كبير .... ولكل شخص رأي

وبالمناسبة رح اسأل سؤال : ليش بيختارو المتفوقين بالبكالوريا وبيعطوهن منح بالجامعات الخاصة ...... وليش ابناء المسؤولين بحطو ولادهن المتفوقين بالجامعات الخاصة وهنن ممكن بكل سهولة ومن دون تعب حتى الهن كراسي بجامعة دمشق باي فرع بيحلمو فيه

والسنة الماضية بالذات فصلو عدد من الطلاب كبير كتيررررر لانو كانت عم تنزل معدلاتهن بسبب حمل المواد والتقصير ........... يعني لا حدا يجي يتفلسف ويقلي انو الجامعات الخاصة بيتخرج منها يلي مو فهام لانو داخل بمصريه ........
ان شاء الله يكون دافع مليون ليرة بقلعوه من الجامعة بسبب معدلو المنخفض

وبالنهاية لكل شخص وجهة نظر .............
وانا الي وجهة نظر مصرة عليها كوني طالبة بالجامعة ........ وخلوني خصص هالوضع يلي حكيتو بالجامعة العربية الاوروبية وما رح احكي عن باقي الجامعات كوني لا زرتها ولا بعرف شي عنها

وفي شغلة كمان : انا ما عم بنفي وجود بعض الاخطاء بس اي شي جديد بمجال التعليم ما رح يكون مية بالمية من البداية
بس كمان البكلوريا مالا عبرة حتى تقيم الطالب الممتاز من الطالب السيئ
لانو كل الناس عندها ظروف وبترجع للحظ ... وبصراحة البكلوريا عنا ممكن تنحفظ بصم ومو بالضرورة كل الطلاب يلي جابو علمات الطب فهنن شعلة بالذكاء بجوز يكون عندهن قدرة وصبر انوو يعدو ساعات دراسة اكتر من اشخاص تانيين ومو بالضرورة هالاشخاص التانيين ما بيفهمو

على بالجامعات الخاصة ما عنا اسئلة دورات نحفظها او نطلع عليها ... يعني كل فصل بصير تغيير بالنماذج وبالدكاترة وبالنهاية دكاترتنا نفسن وفيكن تسألو دكاترتكن القديرين يلي بيعطو نظري متل الدكتورة سحر الشماع - والدكتورة سوسن ماضي

نتائج فحص الكفاءة (الجودة) يلي صار هالسنة غير كافي لتقييم جامعة بهالوقت لانو الدفعة الرسمية تبعنا هلأ رح تتخرج ويلي قبل كانو طلاب منقولين من غير جامعات

وهاد الامتحان كان بس لتقييم الجامعة يعني مو متل الاشاعة يلي طلعت انو طالب جامعة دمشق بقدمو بشكل اختياري وبعد التخرج اما طالب الجامعة الخاصة فحيكون الفحص سبب لتخرجو او لأ .... هاد الكلام غلط عالاكيد


اسفة كتير عالاطالة بس والله العظيم من حرقة قلبي ومن كتير هالاشاعات يلي بتجلط ..... صحيح نحنا عم ندفع مصاري بس هاد مو يعني ما عم نتعب متلكن ويمكن اكتر منكن ....... وبرجع وبقول اسألو دكاترتكن القديرين هنن بجاوبوكن

بس اتأسف من ايلان لانو حكيت هالحكي بموضوعها مع انو مالو علاقة بس بدي تسامحيني امانة

وحسان هوة يلي دفشني وهوة خلاني انبحت ............
الحق على حسان 

أهلا آنسة "meme90"

هلأ نحنا بجامعة دمشق ما عنا ضغينة ضد الجامعات الخاصة

بس الوضع العام وكترة أعداد الصيادلة هي السبب لبعض المشاحنات

يعني الكل بيعرف أنو صار بين الصيدلية والصيدلية صيدلية تالتة

وهلأ في إشاعة قوية أنو تنفتح المسافة بين الصيدليات

يعني والله الوضع كتير صعب

يمكن لكل 50 شخص صار إلهم صيدلي

============

ما بعرف كتير عن الجامعات الخاصة

وما قلتيه عن المناهج المتجددة صحيح وهي ميزة عندكم

كمان بيهتمو بإرسال الطلاب لمعامل الأدوية

لكن بعرف شغلة قلنا يها كزا دكتور بالكلية

أنو مناهج الجامعة الخاصة أصغر بكتير من جامعة دمشق

وأنو محاضرة وحدة عنا قد 3 أو 4 بالخاصة

ما بعرف صحة الموضوع

شكرا كتير على ردك بطريقة محترمة وشكرا لرحابة صدرك

بس نحنا مو كل المواد عنا ياها بكميات قليلة بس لا يخلو الامر
بس كمان هاد بيرجع لقلة عدد الدكاترة وخصوصي ليلي ما بيتقنو اللغة الانكليزية ... يعني انت تخيل انك عم تتلقى المحاضرة باللغة العربية وترجع عالبيت لحتى تدرسها من مراجع ومنهاج باللغة الانكليزية لانو ممنوع يجي سؤال بالامتحان باللغة العربية عدا انو الوقت يلي بدي استغرقو وانا عم ترجم هالنوطة يلي كلها مصطلحات اجنبية صحيح الدكتور شرحها وحكا عنها بس حكاها بالعربي لقلة خبرتو باللغة الانكليزية
يعني مو بس انتو بتعانو من ناحية انو بعض المواد بتدرسوها لحالكن

بس كمان في دكاترة بتحكي باللغتين يعني عربي وانكليزي شوي هيك وشوي هيك مشان نقدر نفهم وبالمقابل لمن نرجع عالبيت نحس حالنا سمعانين بهيك مصطلحات من قبل

بس بالنهاية بكل مكان في المنيح وفي الريء ....... والواحد بدو يتماشى مع يلي الله اخترلو ياه ........ والحمد لله على كل حال

ان شاء الله تكون وصلت فكرتي مظبوط لانو حاسة حالي ما عم اعرف عبر صح

بالمناسبة رح اعطيك مثال كتير واقعي : الدكتورة القديرة سوسن ماضي بتحكي ضمن المحاضرة باللغتين يعني بضل طول المحاضرة واقفة وعم تفتل من مكان لمكان وعم تحكي وتشرح وتعبر وتوصل الفكرة قد ما بتقدر متل عوايدها ومناخد وقت المحاضرة عالقد حتى الحضور تبع الطلاب مو هية يلي بتاخدو بتطلع مشرفة العملي قبلها بدقيقة بتاخدو وهاد كلو مشان ما تضوع علينا دقيقة ممكن من خلالها تقول موضوع المحاضرة ..... والهدف من هاد انو تعطينا بذمة وضمير

يعني هي الشغلة يلي انت حكيت عنها اخي زيد انا ما بخبي عنك مظبوطة عند بعض الدكاترة يلي نيمو ضميرهن وفتحو جيوبهن

شكراااا