لحنا كلنا بالخدمة وجاهزين
لمساعدتك آمت مابدك
يمكن لحنا ما منكفي بنصحك تكوني صداقات حقيقية
يعني لازم يكو ألك أصدقاء تشكيلن همك
والفترة الجاية هي فترة الجامعة وهي أحلى فترة بحياتك


زعلتيني عليك مبين عليك وحيدة

حبيبتي انا رأيي تختاري الصيدلة لانها بجامعة حكومية

لا تنسي انو المنحة الدراسية بتلتغي ازا رسبتي بشي سنة لا سمح الله هي غير سعر الكتب  وازا كمان لا سمح الله رسبتي بشي مادة

وماشالله الفرعين متساويين وتنيناتون فروع طبية

انا رأيي مافي داعي لهالحيرة وبلالك هي قصة المنحة يعني الصيدلة بتضل عالمضمون 

صراحة يمكن عنجد ضيعناكي بس برجع بقلك روحي عالكليتين و اعملي استخارة بعدين اختاري يلي بترتاحيلو بس لازم تكون عندك إجابات الأسئلة التالية:

شهادة جامعة القلمون معترف فيها؟؟؟؟

أنت وين شايفة حالك ناجحة: بصيدلية و لا بعيادة طب أسنان؟؟؟

أنت قد أنك تشوفي أسنان المرضى بأسوأ حالاتها؟؟؟و لا بتقرفي كتيـــر؟؟

أنت كبنت وين مجتمعك رح يعتبرك أنجح كصيدلانية...و لا كطبيبة أسنان؟؟؟هلق هادا السؤال يمكن يعتبرو البعض متخلف بس خلينا نكون واقعيين مجتمعنا بمين بيثق أكتر؟؟ إلا إذا كنتي مقررة تكوني طبيبة أطفال؟؟و هذا الشي غير منتشر...

يمكن رجعت حيرك بس بهالأسئلة أنا عم حطك أمام الواقع...


و طولي بالك و الله مشكلتك هي بالعصبية يلي متناولة فيها الأمور و لا تفكري أنو كان إلك خير بالطب و ما طلعلك..........صدقيني كتير عالم حولي كان بدهن فرع بس لما تخرجوا حمدوا ربهن أنو ما طلعلن الفرع يلي بدهن ياه...
(لو اطلعتم على الغيب لاخترتم الواقع) و برجع بقلك بكرة صومي و بيتي استخارة مرة تانية...

مرحبا
أهلا وسهلا فيكي بما أنك جديدة هون
وأنا رح قلك تجربتي المتواضعة بما أنو كانت قريبة من خياراتك
أنا بزمناااتي كان بدي طب بشري وبعد البكالوريا متل الجميع هون انفرض عليي يا صيدلةموازي ,  يا معلوماتية وبعد تفكير طويييل اتكلت عالله  قررت عالصيدلة لانها أقرب لميولي والحمد الله كتير مبسوطة فيها
بعرف أنك هلأ كتير متوترة لأنك شايفتي تقرير لمستقبلك بس تاكدي أنو ما بيصير غير الأفضل 
مشان هيك صديقتنا بقلك أنو فكري عمهلك وشوفي أنتي وين بتلاقي حالك ووين  بترتاحي أكتر وأكيد دايما ربنا بوفقنا لما منتكل علي وبساعدنا نختار الطرق الأفضل


انشالله موفقة
سلاااااااااام

السلام عليكم

خلي أملك بالله كبير

و الله ما بريد غير الخير لعبادو

يعني لما كنت بدي سجل كان عندي كتير اختيارات و خصوصا بدي فوت بمفاضلة الموازي

فاستعنت بالله و هو وجهني و شرحلي صدري للصيدلة

حاليا متأكد أنو صار عندك فكرة حول كل من الفرعين

و حول نمط الدراسة و الحياة الجامعية بكل من الكليتين

فصلي استخارة و توكلي عالله و هو يلي رح يخترلك الأخير لك

و بالتوفيق و ان شاء الله بنشوفك من المبدعين بالمجال يلي رح تختاريه

ليكي لا تحتاري ولا على بالك

انا طلعلي موازي صيدلة 

وبنفس الوقت طلعلي منحة صيدلة

بالجامعة الخاصة (بس أنا لو طلعلي طب بالخاصة كنت اخترتها)

بس أكيد صيدلة بجامعة دمشق أحسن و الحمد لله انو أحسنت الاختيار

ونصيحة والله ما بتندمي وفضلي انك تعدي مع ناس متل مستواكي

العلمي لانو هيك انت مكانك مع ناس يشاركوكي نفس الطموح

هاد بضل رأي

السلام عليكم :

أول شي بدي قلك ياه مالازم أبدا تقولي أنو الله عم يعذبك بالحيرة يلي أنتي فيها

أو لأن ما طلعلك طب بشري أنا نفس الشي صار معي لما ما طلعلي طب فكرت أنو

الله ما بيعطيني يلي بدي ياه وزعلت وكل ليلة ما نام وأنا عم فكر  ليش ما طلعلي

طب وفكرت الدنيا تسكرت بوجهي , صحي ما احترت شو بدي سجل قد ما زعلت

لأني ما بحب طب الأسنان ومستحيل اقدر اتحملها ,مشان هيك بدون تردد كانت

رغبتي الأولى صيدلة وبقول وبكل ثقة الحمد لله على كل شي .

وبدي قلك كلمات لازم يضلو بذهنك وين ما رحت :

أنت تريد وأنا أريد والله يفعل ما يريد

وأكيد يلي بيختارو رب العباد خير للعباد . 

ما قلتلك أنو أحسن لأن برأيي من سماعك لتجارب غيرك لازم تتوصلي لجواب

مريح .      وطمنينا بس تقرري لنباركلك .

وبرجع بقلك أخلصي التوكل على الله والله لح ترتاحي كتيير .

أختي متحيرة ..

أبعد الله عنك الحيرة ..

نصحتك سابقاً بالصيدلة .. وقلت لك لو كنت مكانك لأخترتها ..

لأنها برأي أريح نفسياً وأفضل دراسة ومستقبلاً ..

هذا مع الأسباب التي ذكرها الأعضاء الكرام ..

ويعود الأمر بالنهاية لك ..


أحمد

  ان تاتي متأخرا خيرمن لا تاتي ابدا

ليكي ايلان  كانو انتي اخترتي الصيدلة

وانا  ببصملك بالعشرة انو هاد الخيار  الصحيحي انا  من القلمون    وجامعة القلوم    اثبتت حتى الان  فشلها  وصدقيني  ما في حدن بيتخير  بين جامعة دمش وجامعة القلمون  وبيختار القلمون الا  وما بكون  مخطئ تماما

الله يوفقك  بالصيدلة واتاكدي انو رب العالمين  اخترلك  الطريق  الافضل

)))) كل حدا عم يلعي ع طب الاسنان يسكت
وكل حدا بيجيب سيرة الخاصةةة كمان يسكت
كل الفروع وكل الجامعات خير وبركة
رامة ((((


أولا .. حابة اشكرك انك أوردتي اسمك بنهاية الحكي يلي كتبتيه لحتى يكون

منسوب الك .. لأنو متل هالكلام ما بينحكا عنا بمنتدى الصيدلة

تانياً ... يا عيني .. ما الك بالقصر من مبارح العصر .. بدال هالحكي كان فيك بكل

أسلوب راقي تقولي بداية السلام عليكم وخاصة انو نحنا بالشهر الفضيل .. وبعدين

تعطي  رأيك بمنطق .. مو بهالطريقة الهجومية وكأنو صرلك طبيبة أسنان عشرين

سنة .. !

ثالثاً .. حسب ما شفت كل يلي الك 6 مشاركات .. يعني لسه ما الك باع كتير بالمنتدى .. وما بتعرفي قوانينه وآداب الحديث فيه .. لهيك منعذرك هالمرة

رابعاً .. وهو الأهم ..... انتي فايتة على منتدى الصيدلة وهون ما الك الحق أبدا بانك

تسكتي أي حدا من الأعضاء ... 

بعدين هنن بحقلهن يقولو رأيهن لأنو الهن سنين عم يدرسو كل واحد بفرعه ..

مو وحدة جاييتني هالسنة فاضلت على طب الأسنان ولسه ما بتعرف خيره من شره وجاية تدافع عنو ..

عيب هالتصرف ..

بعدين انتي على حسب ما شفت جايبة 235 وعلامتك حلوة ما شاء الله .. يعني يفترض تكوني منا وفينا ... ليش هبيتي كل هالهبة كرمال الجامعات الخاصة ...  ؟؟؟

إذا وحدة من إحدى هالجامعات عم تحكي رأيها عنها .. ونحنا ما علقنا لأنو ما منعرف ..  رح تكوني بتعرفي أكتر منها يعني؟؟؟؟؟!!!!!!!!



الشغلة الوحيدة يلي منتفق عليها انو كل الفروع والجامعات خير وبركة وكلهن بكملو بعض ..


بعدين بعدك بأول الطريق وادامك عمر تشوفي فيه صحة خياراتك

وطبعا طب الأسنان فرع متل كل الفروع اله ميزات ومحاسن وما في شي perfect


ونحنا منتمنالك كل الخير والتوفيق والسعادة ..

ومنتمنى انو يكونو الأطباء والصيادلة ايد وحدة .. وإلا بحياتنا ما رح نطلع من هوة داء العظمة والتخلف الفكري يلي عايشينه ..


والسلام عليكم ورحمة الله وبركاته ..