السلام عليكم ورحمة الله وبركاته  ارجو لك التوفيق ولنا ان شاء الله      

نداء للجميع .. ( لمحة عن كليات جامعة دمشق و فروعها )

السلام عليكم

رأيت أن الكثير من الطلاب الذين اجتازوا مرحلة البكلوريا
لا يعلمون معلومات كافية عن فروع الجامعة
و لاحظت أن كل طالب يسأل عن فرع معين يود التسجيل فيه
فأردت أن أجعل هذه الصفحة كمرجع يستفيد منه الجمعة
وذلك طبعاً بجهد و مشاركة أعضاء المنتدى الكرام
الذين أرجو من كل منهم أن يكتبوا لمحة عن اختصاصهم
وخاصة طلاب السنة الرابعة أو المتخرجين
لنكون بذلك مساعدين لزملائنا المستجدين في الجامعة

نحن على أبواب رمضان و فعل الخير مضاعف
أتمنى أن لا تفوتو عليكم هالعمل الخير

صديقكم علاء
علوووووش

سأبدأ بنفسي

أنا خريج بيولوجيا ( علم الحياة ) تخصص حيوية كيميائية

فرع علم الحياة فرع ممتع و مفيد
يدرس علم الحيوان و النبات و الكيمياء
و يدرس الإنسان باعتباره جزء من علم الحيوان

دروس العملي تنفي الملل و تزيد النشاط و التفاعل بين الطلاب
المواد متوسطة الصعوبة لكنها ممتعة ( باستثناء بعض المواد )
يبدأ التخصص في السنة الثالثة على أساس مجموع علامات السنتين
الأولى والثانية بعد استبعاد المواد غير التخصصية مثل اللغة العربية
و المعلوماتية و الفيزياء ...

توجد ثلاثة اختصاصات :

1- الحيوية الكيميائية :يدرس جسم الإنسان بشكل موسع
كما يدرس علم الكيمياء البيولوجية بشكل موسع
مستقبله التدريس – العمل بمعامل الأدوية – ومعامل الأغذية أحياناً - مخابر
يمكن استكمال الدراسة خارج القطر للحصول على شهادة دكتور مخبري
أو صيدلة

2- الأحياء الدقيقة : يركز على الأحياء الدقيقة  من جراثيم و فيروسات و فطريات ..
مستقبله التدريس – العمل بمعامل الأغذية – ومعامل الأدوية أحياناً - مخابر
يمكن استكمال الدراسة خارج القطر للحصول على شهادة دكتور مخبري
أو صيدلة

3- الحيوية البيئية : يهتم بتفاعل الحيوان و النبات مع البيئة و التأثيرات المتبادلة
مستقبله التديس

علووووووش

              وأنا لحكون تاني طالب

أنا طالب (إحصاء رياضي) وهو فرع حديث العهد في جامعة دمشق يتميز بدخوله في فرعين أساسيين من فروع الجامعات في سورية وهما  الإقتصاد  والرياضيات

ففي مجال الإقتصاد : يبحث علم الإحصاء في معرفة التوقعات المستقبلية التامة لأي مشروع اقتصادي أو تجاري قائم ويعطي نتائج فائقة الدقة من خلال بعض البرامج الإحصائية التي تعالج عن طريق الحاسوب

ومن جهة أخرى.................................
يهتم علم الإحصاء في دراسة ظاهرة "ما" في المجتمع من خلال أخذ عينة من هذا المجتمع وإعطاء نتائج دقيقة في تقييم هذه الظاهرة سواء كانت سلبية أم إيجابية

أما في مجال الرياضيات
فيبحث علم الإحصاء في مفهوم التكاملات المحدودة وغير المحدودة وحساب المساحات والحجوم

أيضاً له بصمة واضحة في مفهوم التفاضل

ويدخل الإحصاء دخولاً مباشراً في علم الجبر والمصفوفات والتوابع الخطية...............


أي باختصار الإحصاء .......(ليس إلا عبارة عن)....... جملة مصغرة ومقتبسة من علم الرياضيات البحت الذي يتناول كافة جوانب الحياة العملية

الآن كيفية الدراسة في هذا الفرع
تتم الدراسة فيه على مدى أربع سنوات

التخصصات ..........
لايوجد حتى الآن تخصصات في هذا الفرع لأنه بالأصل كان تخصص من فرع الرياضيات تحت اسم  (دراسات إحصائية)

فرص العمل بعد التخرج...........
1- في سلك التدريس لمادة الرياضيات في جميع المراحل
2- في منظمة الصحة العالمية وفروع الأمم المتحدة لكون الإحصاء يهتم بدراسة عينات عشوائية من مجتمعات مختلفة
3- فرص عمل متنوعة في مجال الإقتصاد وفروعه
4- في وزارة البيئة لأن الإحصاء يدرس الإحتمالات المختلفة لأي ظاهرة طبيعية
5- فضلاً عن كل ذلك يمكن متابعة الدراسات العليا في هذا الفرع والوصول إلى سلك التدريس في الجامعات والمعاهد
                                           

                    ..............................

أخيراً بدي أحكي باللغة العامية
بيجوز يلي عميقرأ هي المعلومات يقول هدا طالب عم يواسي حالو بالفرع يلي دخلو
والله ياشباب وياصبايا القصة مو هيك أبداً
عنجد هالفرع روعة وبعد مادخلتو لقيتو مامشهور أبداً فقلت لحالي من خلال هالشاشة الصغيرة انشالله بقدر وصلو لأكبر قدر ممكن من الناس

  واعذروني لأني طولت بالحكي         

ترى موضوع في قمة الروعة وبجد يوم كنت بكالوريا كنت مابعرف عن كل كلية الا اسمها لهيك كان الخيار صعب جدا ...
وبجد انا ماخليت حد ماسألته وصرت ادور بالشوراع كل شي الا ان تسال الناس عشان كل واحد بيحكي من تجربته وبتلاقي شخصين بنفس الوقت واحد بيقلك الفرع منيح واحد اصحك تدخل .بلا طول سيرة فيني اساعد الان والحمد لله ومشكورين على جميع المعلومات حلو الواحد ياخذ فكرة عن كل شيء 
بحكي عن الهندسة المعمارية :
لمحة تاريخية :
طبعا اختصاص جميل كونه يجمع بين الروح والمادة بين الخيال والواقع والعمارة بشكل عام تدخل في كل العلوم حتى لتكون الاساس فهي تنطلق من الانسان المجرد بابعاده ومقايسيه مقايس حركته الفراغ الذي يحتاجه  والرد عليه فبكل بساطة جميع المنشألت اليوم بل جميع الادوات وصولا الى ادوات الطعام ..السيارات ...الطيارات ...ألخ كلها تنبع من ابعاد الانسان وتتوائم مع مقاييسه والفراغ  الذي يحتاجه الى الحركة وطبعا تنشا العمارة منذ التجا الانسان الاول الى البحث عن مأوى اي في المرحلة اللحقة من سكنى الكهوف والمغاور والمبيت على الاشجار وصلا الى الاستقرارا بجوار الانهار والعمل بالزراعة وبالتالي البحث عن مأوى

المواد والاختصاصات:
العمارة طبعا تشمل المواد النظرية والعملية وان غلب عليها الطابع العملي
القسم النظري :
ندرس مواد طبعا لها علاقة بالرياضيات والميكانيك اضافة الى التحليلات الانشائية و بعض الحسابات البسيطة للحمولات وابعاد الفراغات المناسبة ...الخ
كما ندرس مواد كتاريخ العمارة ونظريات عمارة وبعض النظريات وعلم اجتماع عمراني وصولا الى تشريعات عقارية ومايتعلق بالقوانين الناظمة لحركة العمران في الوطن
اما القسم العملي :
وهو مجددا لاينفصل تماما عن النظري ففيه قسم رئيسي يستمر طيلة سنوات الدراسة وهو مادة التصميم والرسم الهندسي
واكيد هي تدخل في صلب الهندسة المعمارية ومفهومها العام كتصميم المباني العامة والمنشأت المختلفة ....ألخ
القسم الثاني والثالث معا :
التخطيط العمراني:
وطبعا يتعلق بدارسة شاملة للمدن و وفعالياتها المختلفة ووسائل الربط ..مواصلات طرق عامة ...ارصفة  وفق اسس علمية متعلقة بعدد السكان وبنوعيى الضعوب وعاداتهم ..الخ
النتفيذية :
وهي تتعلق بآلية تنفيذ المنشأت وتفصلات ومراحل البناء والانشاء وصولا الى تجسيد المخطط الورقي على الواقع
ملوحظة :
في كلية العمارة نظام يختلف عن سائر الكليات وهو وجود مادة التصميم والتي تعامل كمادة مرسبة في حال نجح الطالب بالمواد النظرية اام لا فالانتاقل الى السنة الاخرى يتطلب كسائر الكليات ترفيع المواد الا اربعة كحد اعلى اضافة الى مادة التصميم  اي بدون النجاح فيها لايتم الترفع الى السنة التالية
والرسوب فيها يتطلب اعادة العام باكمله وليس نظام فصلي كحمل المواد
المؤهلات :
بكل بساطة الموهبة في الرسم كشيء اساسي وان لم تكن تملك فلاباس يمكن التعلم لكن المهم ان تملك الرغبة الحقيقية في هذا اضافةالى الحب .....
التركيز حتى آخر لحظة والقدرة على تحمل الضغط والجلوس لساعات طويلة ...اما في المنزل او من خلال الدوام او اثناء الامتحانات .....
ان تكون اجتماعي ذو شخصية قوية حالمة ومبدعة وواقعية ...اضافة الى متطلبات مادية
حاليا ومع تصاعد التقنية الحديثة :
لابد من اتقان برنامج الوتوكاد بشكل اساسي ...اضافة الى الفوتوشوب الماكس ..زالخ وطبعا استخدام التقنية محصور في السنوات الاعلى
الاختصاصات:
طبعا الكلية تخرج مهندس معماري عام مدة الدراسة خمس سنوات ويأتي التخصص بعد التخرج بالدراسات العليا فقط وصولا الى الماجستير والدكتوارة
الاختصاصات نابعة من صميم المواد نظرية وعملية ..الخ
مجالات العمل :
طبعا في مجال التصميم ..التخطيط ...التنفيذ ولاشراف
شركات هندسية ..مكتب خاص
اضافة الى الديكور الداخلي ..تصميم المفروشات ....الخ
نصيحة صغيرة :
من طلب العلا سهر الليالي يعني لايوجد اختصا ص سهل وبالذات الهندسات بس اكيد دايما في وقت لكل شيء
بالتوفيق للجميع

شكرا كتير لصاحي هي الفكره
أنا طالب بكالوريا ولهلا ما بعرف فروع الكليات كلها
وإذا الواحد درس بباقي المحافظات بيقدر ينقل علشام ولا لا
بتمنى من الطلاب التانيين المشاركه

اجتمعت عدة مواضيع لهدف واحد

المهم نشر الفائدة

كثرة المواضيع في هذا المجال يدل على
حرص أعضاء المنتدى على مساعدة الآخرين

بارك الله في الجميع

[size=4]السلام عليكم جلنار من سوريا درعا الموضوع كتير حلو بس بدي اقول لكم نقطة هامة اهم شي يكون كل طالب فينا مقتنع تماما بالمجال اللي بدرسه و يحبو وينجح بمجاله وما يهمو راي الناس لان الناس غاية لا تدرك[/size]

اصدقائي كلية الزراعة كلية جميلة تحتاج الى عراك طويل فيها حتى تثبت نفسك
الان ترفعت الى السنة الثالثة ورسبت في السنة الاولى مع الاسف ولكن هذا الرسوب علمني الكثير  في كليتي يعجبني  النشاط والعمل خلال العام  اشعر ان كليتي مظلومة من حيث نظرة الناس لها مع ان الزراعة في اميركا تحتل مرتبة راقية مع الحقوق من حيث الدراسة
ورح لخص ملاحظاتي بما يلي
1)بدك تفوت زراعة لازم تقتنع فيها ويكون عندك قدرة تستمتع لحتى تنجح
2)لازم تلغي من بالك فكرة انو طموحك غير الزراعة ودخلت بالغلط او لانو علاماتك ما ساعدوك
ملاحظة 50%من الطلاب رسبوا بالسنة الاولى وبالسنة الثانية لانو لسه مفكرين انو الزراعة مو من مقامهم  ورح يتركوا الجامعة
3) البحث العلمي رائع وخاصة لما بيكون ضمن مجموعة حابة تتعلم
بس للاسف كتير طلاب فايتين ليتخرجوا وياخدوا اسم مهندس 
4)انا حلمي انو تلتغى فجوة الجيل بين الطلاب والدكاترة لحتى نقدر نتعامل بطريقة مشتركة ونتوصل لشي مهم
5)طلاب كلية الزراعة كتير بيحترموا بعض وتقريبا خلال سنة بتقدر تتعرف عالاغلبية
6)بس في مشكلة انو في ناس كتير بيلتفوا عبعض وما بعرف كيف تفكيرهم  مع احترامي للكل
7)بتمنى انو طلاب الزراعة يكونوا واثقين من حالهم اكتر  معن حق الدكاترة  يعاملونا بهل الطريقة
ما حدا حابب يتعلم كلوا حابب المواد تجي معلبة متل السردين
8) لما نحنا منتحمل جزء من مسؤولية معاناتنا بالكلية منقدر نتوصل لحل
دايما الفاشلين بيحطوا الحق بفشلهم على الاخرين 
9)بتمنى طلاب الزراعة يفكروا بشي مشروع مفيد الكل يشارك فيه ويرفع اسم الكلية ويغير نظرة الكل لالنا
10)الزراعة مهمة جدا لانها عم تحافظ عالحياة  وهي بتحافظ على العنصر الحي  واستدامة الموارد الطبيعية    الزراعة شريان الحياة  ودونها ما كان لاي مجال تاني اي قيمة
كليتنا بتحتوي على أقسام رائعة يتم التخصص فيها بعد السنة الثالثة
اما السنوات الثلاث الاولى فهي تاسيسية عامة يطلع فيها الطالب على العلوم الزراعية العامة وياخذ فيها فكرة جيدة يوجد في كل فصل تقريبا ست مواد عملي  (30علامة من 100)
ويصبح امتحان العملي من 70        هي فكرة الكل بيعرفوها بس بغير كليات صار العملي من 40
انشالله يتغير السنة
مواد ممتعة ولكن تحتاج متابعة وملاحظة ما فيك تاخد استراحة بعد البكالوريا شوية متابعة وحضور واهتمام بيمشي الحال
واخيرا بدك تطول بالك على بعض الدكاترة وهل الشي موجود بكل الكليات مو بس عنا
الزراعة ممتعة بشرط تكون مقتنع      وفي ميزة خاصة بالزراعة وفريدة
الطبيعة بتناديلك انت بس عطيها شوية اهتمام وملاحظة وبسهولة بتوصل للحل
النبات متل الانسان بس يمرض بتظهر اعراض المرض وهيك بيصير في تفاعل بينك وبين مهنتك
انا صرت بحب الزراعة كتير  وناوية اتفوق  فيها انشالله بالتوفيق للكل
اسفة طولت كتير بس لازم نحكي كل شي
وبتمنى اذا اخترتوا زراعة تكونوا ناويين تعملوا نهضة زراعية بسوريا البلد الزراعي الاول بامتياز

أنا بدرس زراعة أو مثل ما بيخففوا عنا و بيقولوا هندسة زراعة نصيحة من أخ لاخو إياك ثم اياك تدخل هالفرع و فهمك كفاية