حسناً إذاً سيبقى الموضوع قائماً..

و سنظل نلتقط الصور..

--------------------------

السلام عليكم

أنا برأيي أخي وسيم إنو يضل الموضوع عام لإنو أحياناً عم نطرح أفكار و مناقشات بهمنا إنو الزائرين يقرؤوها...

______________________________________________

حابة اطرح فكرة للمناقشة ...بصراحة ترددت كتير قبل ما اطرحها بس بعدين تشجعت لإنو شفت إنو هي الفكرة عنجد تحتاج للمناقشة و البحث عن أسبابها...
و الفكرة هي عبارة عن أسئلة...يلا جهزوا حالكن للأجوبة و خصوصاً أخواننا الشباب...

ليش ما منشوف صداقة حقيقية بين الأخت و أخوها؟
ليش بأغلب الأحيان بتفرغ البنت حاجتها للاهتمام عند أشخاص آخرين و ما بتفرغها عند أخوها؟
ليش ما بكون الأخ فعلاً خير سند للأخت؟

و بالتأكيد أنا ما عم قول إنو كل الشباب ما بهتموا بأخواتهم بس للأسف النسبة الغالبة منهم ما بهتموا....
و بصراحة أنا الفكرة خطرت ببالي على أثر موقف صار معي اليوم...و هو إني فتت على محل مشان اشتري هدية لأخي و ما بتتخيلوا الموقف المحرج اللي انحطيت فيه لإنو حسيت من كلام صاحب المحل إنو في استغراب إنو كيف بنت متلي فايتة تشتري هدية لشب ( و طبعاً عرف إنو الهدية لشب من نوعية الهدية اللي طلبتها)...يعني لو كانوا الشباب بهتموا بأخواتهم و في ود بينهم ما كان استغرب هاد الشخص من تصرفي...يعني لو خطر بباله إنو الهدية لأخي ما كان استغرب...بس للأسف طبيعة المجتمع فرضت عليه هاد الاستغراب...

بعتذر لإني طولت عليكن بس عنجد أنا بحترق قلبي لما بشوف بنت عم تغلط و بكون السبب الرئيسي هو عدم اهتمام أسرتها فيها و بشكل خاص أخوها...

بانتظار آرائكم...

السلام عليكم

أصلا مفروض الواحد يضل على صلة وثيقة مع إخواتو البنات دائما طول العمر

و الحمد لله كتير بحب إخواتي و بنحكي و بنروح مشاوير و بشتريلهم هدايا (طبعاً ما بصير متل ما صار معك)

بس بتضل البنت بتحب صحبة إمها أكتر بس طبعاً بتكون بحاجة لدعم و حنان من أخوها

هو صراحة كمان في مشكلة تانية هو أنو أصلاً صاير كل واحد بالعيلة لوحدو

يعني حتى مرات بطلع مع أخي مشاوير و بيستغربو رفقاتي أنو كيف هيك علاقتك منيحة مع أخوك

إزا الأخ و أخوه ما بحاكو بعض بهي الأيام فشلون الواحد بدو يكون صحبة مع إختو

مسا الخير:

عنجد لازم تكون في روح الصداقة بين الأخوة شباب و بنات....

هلق أنا الحمد لله علاقتي مع أخواتي كتير حلوة و بيحترموني و حتى أغلب أغراضي هدايا منهن " أحياناً مزوقين بالأغراض أكثر مني" بس من جهة مشاوير و الله ما كتير منروح مشاوير لحالنا .... إلا كلنا سوا مع العيلة....بسبب قلة الفضا -وقت كون أنا فاضية هنن مو فاضيين و بالعكس- بس الحمد لله بستشيرهن بكل شي و هنن كمان بيثقو برأيي....


بس كأنو بهالتكنولوجيا الحديثة الواحد ما عد حاكا حدا وجهاً لوجه إلا نادراً ...... حتى بالعيلة الوحدة.........الله يستر.....

مرحباً جميعاً
بالنسبة إلي بحسهن متل رفقاتي وبحكيلن شو بصير معي بشكل يومي وهنن كمان بيحكولي ومنستشير بعضنا كتير........وصارو حافظين الكلية من حكيي

ولأنن شباب بتكون ملاحظاتن بمحلها دائماً وفي شغلات ما بيقدر ينصحك فيها إلا أخوكي الشب

الحمد لله أنو عندي اخوات شباب .....أكيد الشاب سند قوي كتير للبنت

بس إجمالاً وضع الأسرة كل مالو لورا يعني دوامنا طويل وكل واحد وإلو مشاغلو
والله يساعد......بس أكيد مكانة الأخت بالنسبة للأخ هلق أحسن من قبل...
وآســـــــــــــــــفة عالإطالـــــــــــــــــــــــــــــــــة

السلام عليكم

و الله خليتوني اتفاءل شوي ...
يعني الحمد لله إنو زيد بجيب هدايا لإخواته...
و غولدن بيل و طير الوروار أوضاعهم تمام مع إخواتهم...
بس وين باقي أفراد العيلة؟
أنا حابة تشاركونا برأيكم إنو شو الأسباب اللي ممكن تخلي الأخ بعيد عن أخته لحتى نحاول نتجنبها... يعني ممكن يكون في حواجز عم تبعد بينهم و تكون الأخت هي السبب فيها...
يمكن تقولوا إنو شو قصتها نور الهداية علقت هالقصة...بس عنجد أنا هالقصة زاعجتني كتير ...يعني أنا شو بكون عاملة إذا مشيت مع أخي بالطريق أو طلعنا شي مشوار لحتى آكل زورات من الناس...
حتى في مرة إجى أخي لعندي عالجامعة و عيونكن تشوف النظرات اللي ما ضل حدا بالجامعة إلا هداني ياها...
يعني شي كتير غريب إنو الوحدة تمشي مع أخوها؟؟؟؟؟؟؟؟؟؟؟؟

صحيح أخت نور الهداية..

و كثير من الأحيان يحصل معي نفس الشيء عندما أمشي في الشارع مع أختي..

و ذات مرة مر جارنا بقربنا فقلت له " السلام عليكم"..

فلم يرد علي السلام..!!!

و أخبرني صديقي أنه كان على أختك أن تضع " المنديل" الأسود...

و أن تغضي وجهها..

و عندها سيرد عليك السلام..

و مشينا أنا و أختي في الطريق و وجهنا هكذا :

     

السلام عليكم.....................

و الله يا نور موضوعك أكتر من رائع لأنو هالحالة بلشت حس فيها من لما صار أخي بكالوريا يعني ماعاد

فاضيلي و هلأ فات عالجامعة و دواموا كتييييير طويل يعني يا دوب عم شوفو شوي...............

و الله عم أزعل عالأيام الماضية لأنو كل واحد بيشوفنا بيفكرنا توم من كتر مالنا متفاهمين و دائما

منحكي مع بعض...............

هلأ و مشان إنو الأب و الأخ  سند فأنا بأيدك مليون بالمية على هالقصة, لأنو وقت بابا (يسلملي )

بيجي من السفر إي و الله بحس حالي غير و بطمن كتييييييير....................

و مشان الأسباب يلي بتخلي العلاقة شوي محدودة هي إنو قد ما كان بيضل الأخ إلا ما يكون عندو

شوي تحفظات ما بدو يغيرها و لا مستعد إنو يناقش فيها.......... و بيكون جوابوا هيك لازم تعملي و

و إنتي شو بيفهمك.................., مع إنتو الموضوع بتكوني آخدتي إنتي على حسن نية و مالك مفكرة

بيلي عم يقولوا أبدا...............

آسفة عالإطالة بس و الله موضوعك يا نور الهداية فشلي خلقي شوي..................

         

السلام عليكم
شكراً كتير نور الهداية على الموضوع القيم
بالنسبة إلي علاقتي مع أخي(الله ييسرله )
أكيد بتعرفيها كتير منيح
ومن لما فتت عالجامعة كتير بيساعدني بكتير مواضيع وخاصة العلاقة مع الشباب بالجامعة يلي ممكن البنت ببداية المسيرة الجامعية تكون متلبكة بهالقصص
بس والله كنت أحكي كل شي لأخي وكان دايماً ينصحني

هاد غير أنو دايماً يجي ياخدني من الجامعة المساء وما يخليني أرجع لحالي أبداً.....

وما بنسى العيد السنة الماضية كنت أنا وهو عندنا فحص بعد العيد وكنت عم أدرس بالعيد وكنت رح طق
فرحنا أنا وهو مشوار وقعدنا بمطعم ففات واحد مع مرتو وعندو 3 أولاد صغار جننوه وما خلوه يتهنى
فقبل ما يطلع اطلع بأخي وقلو.........
لا تكتروا أولاد    
بقى عندنا بالمجتمع ما بيخطرلهم أنو ممكن أخ وأختو يطلعوا سوا......  
وما بعرف شو السبب؟؟؟

الله يسامحك يانور الهداية فتقتلي جروحاتي
حاكم أخي بالجيش وحاسة حالي متل الضايعة بدونو