هل مررت يوماً بـ.... شارع الثورة !!!

.هل مررت يوماً بـ.... شارع الثورة !!!

nanon

عضــو فضـي

لا تحزن إنَّ الله معنا

مسجل منذ: 19-10-2008
عدد المشاركات: 1059
تقييمات العضو: 34
المتابعون: 18

غير موجود
اشــترك بالتحديثات
رسالة مستعجلة

هل مررت يوماً بـ.... شارع الثورة !!!

29-06-2009 05:04 PM

شارع الثورة ... اسم صار عندي متل الكابوس .. مجرد ذكر اسمو قدامي بيكركبلي كياني .. وهلأ بعدما خلصنا دوام والحمد لله.. حاسة أكبر نعمة هيي الخلاص من زيارة هالشارع العظيم أكتر من خلاص الفحص ودراستو... عنجد ياجماعة ما عم بالغ.. يعني مجرد إني اتذكرو بيخطر ع بالي المثل:(شو بدي اتذكر منك ياسفرجل.. كل عضة بغصة)..

وإذا مو مصدقين.. عيشو معي هاللحظات الرائعة من أحداث شارع الثورة..

واعتبروني راجعة من الكلية ونازلة من جوبر مزة.. أول ما بنزل بستفتح بشي بيجيب الجلطة .. ما بلاقي غير زلمة ختيار بيوقف بوشي بدو يبيعني شي محطوط بكياس.. يعني إذا أنا بنت وشايفني حاملة كتب ومالي شاحطة ورايي قنينة غاز.. كرمال الله شو بدي بجلد الغاز؟؟؟ ..

ماشي ..طنشنا وكملنا مشي.. بلاقي آخر صرعة نازلة عالسوق: ... "حطها بالمي بتكبر.. بس بعشر ليرات".. عرفتوها؟؟ هي متل طابات الجيلاتين يلي بتنفش إذا انحطت بالمي.. وأحلى شي البياع يلي كان بالشتا ينادي "جواكيت جلد طبيعي بألف ليرة بس.. قرب يا حباب" بدي افهم شو هالجلد الطبيعي يلي بألف ليرة؟؟ اللهم اجعلو.. وهلق بيبيع ساعات عالبسطة ..بس أصلية هه "بخمسين ليرة" !!! لا وبعد كم خطوة كان في زلمة ينادي "أكبر جريمة اليوم" .. وسبحان الله كل يوم في أكبر جريمة.. تقولو المافيا عنا مو هيك.. بس مدري ليش ما عدت شفتو..الظاهر اغتالوه..

لا وكلو كوم وهالحديقة يلي حوالين الحمّام-بسوق ساروجة- واللي هدو الأبنية العتيقة مشان يساووها كوم تاني.. يعني هيي حلوة وما فيها شي غلط إلا شغلة وحدة.. إنو العالم صارت تتلحوش فيها وكأنو متسطحين ببيتن وأعز.. شو هالمنظر؟ والله مو حلو..

وهدا كلو ولسه ما طلعنا عجسر المشاة .. طيب..وهي طلعنا عالجسر يلي دوبو وسعان العالم.. فوق هيك بتلاقي نصو رايح بسبب بياعين البسطات والمتسولين(أحلى شي إنو مرة لقيت هدا الزلمة يلي بيشحد عند نفق الآداب وعلى أساس معلول مدري شبو كان نفسو على هالجسر عم يشحد.. عم يغير جو الزلمة).. بس والله أكتر شي بزعل عالولاد يلي يا دوب عمرن 8 سنين بتلاقيهن نايمين قدام بسطات البسكوت يلي عم يبيعوها وهنن فطسانين من التعب والشوب .. الله يصلح الحال..

ماشي.. نزلنا عن الجسر والحمد لله بدون خسائر (مادية)..فبيستقبلنا.. "اشترو آخر مرسوم للسيد الرئيس حول المدري شو".. أو.."آخر ترددات الأقمار الصناعية.." وكل هالشغلات معلقة عالسور يلي بلزق الجسر..

وشي وصل عالمكان يلي بستنى فيه الميكرو ..هووووووون بقى الطامة الكبرى .. أكتر شي بجاكرني بهالشارع كلو هو إنو بيكون الواحد تعبان وراسو رح ينفجر بعد الدوام الطويل والشوب الفظيع والطجطجة بالباصات ومالو طايق يسمع شي.. بيقوم بيلاقي مين ينادي (شرطكن بوجود مكبرات صوت .. هدا زمن تكنولوجيا مو شلون ما كان).."بعشر ليرات.. أي قطعة بعشر ليرات.. بعشرة والعشرة بمية.. محسوبة.. اللهم صلي على سيدنا محمد.. قرب يا حبيبي قرب يا عيني.. بعشر ليرات.. ألعاب وهدايا واكسسوارات.. بعشر ليرات القطعة بعشر ليرات" الله وكيلكن صوتو الحنون بيضرب عالعصب.. بتمنى قلو هي 100 ليرة بس اسكوووت .. أو إني قيم هالمكبر يلي مأنزعلي ياه تحت لوحة الإعلان مشان الكل ينصرع وطحبشو طحبشة ...

وفوق هيك وهيك بدك تستحمل أو بالأحرى تستحملي التلطيش يلي ما بينسمع وبيشلّع المنافس.. بس يا عيب الشوم عالعالم يلي ما عادت استحت من هيك حكي بيخجل الحجر .. أي والله يا عيب الشوم ..
المهم.. إجا الميكرو والحمد لله.. وهي زلغوطة .. وبلش الطحش.. طيب.. فهمنا إنو متلي متايل وإنو الكل تعبان وبدو يركب مشان ينضب ببيتو بقى.. وإنو ما عاد حدا من الشباب يبعد للبنت مشان تركب بدالو.. وبيجوز الحق معو.. بس يا أخي كرمال الله إذا سبقتك وإجيت لاطلع قبلك لا تدعس على رجلي وتطحش عليي وتطلع قبلي .. مو مشان شي بس والله مو حلوة بحقك...

فشو رأيكن بـ... شارع الثورة؟؟ بذمتكن إذا فتلتو الدنيي طول وعرض إن كان بالهندأو بالصين أو بأميركا.. رح تلاقو أخو هالشارع بكل مناظر الحضارة يلي فيه ؟؟ بشك
بكل الأحوال الله يبعتلي سيارة ويبعتلكن من واسع كرمو مشان نخلص من كل المآسي تبع هالشوارع الراااائعة ... وإذا ما صار هالشي.. فالمكسب معنا.. منعيش كل يوم مغامرة شكل .. والله يكتبلنا الثواااااب

« عرض آخر مواضيع العضو »

اللهم أكرمنا بنور الفهم، وافتح علينا بمعرفة العلم، وسهّل أخلاقنا بالحلم

، واجعلنا ممن يستمعون القول فيتبعون أحسنه.

شاركنا بمشروع الترجمة الجماعي لطلاب الصيدلة.. من خلال صفحة الموقع
تنسيق الترجمة التعاونية للموسوعة التقنية الصيدلانية

ملفاتي المنتهية: الاستشراب الغازي
الدوارئ
أخطاء المداواة

أنت غير مسجل لدينا.. يمكنك التسجيل الآن.