#كلمات أحتج عليها# 
                                                    بسم الله الرحمن الرحيم
(المحل محلك خلي علينامو محرزة- إحميل وامشي مقدمة- خلي علينا- يلي بطلع من خاطرك -بلا حقها- 000000000000إلخ)
  نعم إخواني كثيراً ما نسمع هذه الكلمات وغيرها من باعة المحلات ونستخدمها تقريباً في كل يوم هي من الناحية الاجتماعية جيدة ومنيحة ولها اسم (مجاملات ) ولكن لو أخذناها من الناحية التي تُستخدم خلالها ناحية البيزنز والتجارة وهذا العالم كما نعلم لا يُقيم للعاطفة وزناً فمثلاً لو دخلت على محل لبيع الألبسة تنتقي ما تريد وعند تسديد ثمن ما اشتريت ستسمع من البائع هذه الكلمات( المحل محلك- خلي علينا – مو محرزة- احميل وامشي- بلا حقها ) والله وهو بداخله لا يقصد أي كلمة من هذه الكلمات وكل ما يفكر به هو الربح الذي سيجنيه من هذه البيعة0 تخيل لو أنّ أحدنا نفذ وصدق إحدى هذه الكلمات طالما المحل محلي هل من المعقول أن أدفع ثمن ما آخذ من محلي والله لو فعل أحدنا هذا بالله عليكم ماذا سيكون موقف البائع ربما يسكت ويكتم غيظه حفظاً لماء وجهه ولكن ثق أنه ما إن تخرج من المحل حتى يبدأ بشتمك وسيقول (العمى قلنالو بلا حقها صدق والله وما دفع شو ها لناس هي)   وسأذكر لكم حادثة جرت معي أنا شخصياً منذ يومين تصب في نفس هذا الموضوع عن المجاملات وأنها ما بتلبق لكل الناس فمثلاً منذ يومين استاجرت تكسي أجرة وكنت قد اشتريت ساعة ذهب ثمنها 3000ليرة ولسه ما تهنيت فيها وقعت عين الشفير عالساعة وقلي (شو ها لساعة الحلوة قلتلو مُجاملاً عيونك الحلوين فما عجبو قلي يعني لو قلتلي مقدمة فكرك رح آخذها قمت استحيت وقلتلو مقدمة قام قلي مقدمة هاتها وعيب عالي برجع بكلامه فعطيتو الساعة وأخذها وما كان صرلي ساعتين مشتريها وفرحان فيها )صح هي مو غالية كتير بس بالفعل المجاملات بتلبق لناس وناس
هذا كان رأي فما رأيكم أما آن لهذه الكلمات الكاذبة أن تختفي من حياتنا  
                   

يعني بالله من كل عقلك عطيتو ياها؟؟؟؟!!!!!!!!!  آسفة لهالطريقة بالحكي بس والله عصبتني .. حدا بيعمل عملتك .. أي شو مفكر حالك عم تعطيها لأخوك ولا لأبوك .. هو واحد لا بتعرفو ولا بيعرفك ليش لتعطيه ياها بمجرد إنو قال لك "قلي مقدمة" ..
ومشان هالعبارات فهيي مزبوط إنها مجاملة وكتير أحيان بتكون حلوة بمواقف معينة.. وأحياناً فعلاً بقولها وبكون قاصدتها... بس إذا عالم مابعرفهن بقول "تسلمي.. عيونك الحلوة... "ومن هالحكي...
فلابقى تعطي غراضك لحدا مشان كلمتين ضحكوا فيهن عليك لأنو" ما أخذ بسيف الحياء فهو حرام"
لا تواخذني إذا لهجة كلامي قاسية شوي بس ...    
والله يعوضك بأحسن من هالساعة
تقبل مروري
   

ههههههههههههههههههههههههه
والله ياصديقي حقك تحتج على هل الكلمات
اي انت التاني الله يصلحك شو مفكر حالك عبتعطيها لحدامن أعضاء المنتدى

      عبمممممممممززززززززززززززح والله
بس هدول فعلا كلمات ما بنقالوا لمين ما كان
وبدها ناس مزوقة تفهمها
يالله عوضك على الله  أخي احسبها صدقة أكيد صاحب التاكسي عايف حالي

بس والله ضحكتني

ياالله اخي الله يعوضك الهي بس انت التاني معقول تعطي ياها والله ماتكون صايرة معي كنت اخدت عيونو بدالها
هههههههه اوع تصدق بس عنجد هو هاد قليل ادب والله يصلح الناس

السلام عليكم...

هلأ  أكيد كل هالكلام مجاملات...

أنا بدي أستخلص عبرة من موضوعك..والي هيه..

أنو كل إنسان مسؤول عن كلامه  يعني ..((قد كلمته))..

يعني الإنسان يحاسب على عمله..وأقواله..

والي صار معك يا صديقي..((والله يعوضك بخير منها  إن شاء الله))

أنو أنت حكيت كلمة وما قدرت تتراجع عنها..صح..؟؟

لذلك برأيي الحق كلو...على مين...؟؟

على الي حكى هالكلمة......يعيني ((كلمة المجاملة))

يعني ازا حدا قلك..أنو الخيار أصفر  منقلو أي...أصفر...

أنا قصدت بهالكلام لا تحكي كلام لست مقتنع به...

لذلك...كل أنسان..رهن ذاك اللسان....

والسلام عليكم

لا عن جد انت مو معقول شو تعطيه اياها ؟؟؟؟؟؟؟؟؟؟؟؟


لهالدرجة قلبك طيب !!!!!!!!ولو رجعت بكلامك شو فيها ما هوي الكلام بالاساس كان

مجاملة بس


فعلا المجاملة ما بتلبق لكل الناس

انا هالكلمات بتضرب عندي عالعصبي
تقبلي مروري
 

انا معك هاد اسمه تمسيح جوخ وبكل مكان موجود  ياريت الناس تصحى وحاجه غباء لانه الامور مكشوفه فليش المجامله

تقبلوا مروري اللطيف

يا جماعة شكراً لكل من تعاطف معي بس أنا ما ذكرت قصتي إلا للايضاح وكان بدي رأيكون بها لكلمات  يلي اكل عليها الدهر وشرب حاجة نكذب على بعض لازم نمسحها من قاموس مفرداتنا اليومية وفعلاً أنا كان لازم ارجع بكلامي يعني دول عم توقع معاهدات وعم ترجع بمواقفها وكلامها وقفت علي
وما حدا فهمني غير فهد بالفعل انا ما قدرت اتراجع بكلامي قال يعني مو حلوة