أعزائي طلاب الهندسة المدنية .....
بما أنو الفصل التاني صار على البواب متل ما بيقولوا ........
يعني لازم نتعرف على موادو ونشوف المواد يلي بدها شغل والمواد يلي ما بدها شغل زيادة ......

لح نبدأ الحديث عنها ونشالله تستفيدوا ......

1)  الميكانيك 2

على اعتبار انها كبيرة وفيها افكار جديدة وبدها شغل يعني صعبة شوي ، المادة كان يعطيها دكتورين هشام المما وشاهين غلاييني والبشير ، المادة عبارة عن منهاجين بالوقت نفسوا يعني عبارة كتابين وهما الميكانيك الهندسي 2 والميكانيك الهندسي 3 ،
طبعا العملي لازم تجيبوا عشرين وما فوق ( أقل الشي ) ،اما القسمين الباقيين فيعني بجوز تحسوا صعب وبدوا شغل بس بشكل عام المادة بدها شغل منيح .


2) المساحة 1

مادة حلوة كتير وكلها مسائل على الاغلب مسائلها من النوع النمطي بس طويلة يعني ممكن تلاقوا مسائل حلها شي 4 صفحات  بس كتير حلوة ووممتعة جدا ليلي بيفهمها ، المشكلة الوحيدة بالمادة انو تصحيحها على الجواب يعني مثلا المسالة عبارة عن 3 طلبات افترض انو جواب الطلب الاول خطا تحذف المسالة كاملة ،  اما اذا كان الطلب الثاني خطا تعطى علامة الطلب الاول فقط ويحذف الباقي من عند الخطا وكمالة المسالة لذلك يجب الانتباه جيدا الى الالة الحاسبة ولازم تتعلموا تشتغلوا عليها منيح وبسرعة ومشان تفهموها منيح ،المادة بيعطيها الدكتورين انور الصيفي دكتور كتير ممتاز ومرتب وبيراعي الطالب والدكتور وائل رضوان بحب الاسئلة النظرية ، العملي لهي المادة عبارة عن شغل ميداني بالشارع مشاريع تسوية وقياس فروق الارتفاع والمناسيب النهائية وبيتم العمل على جهازي التاكيومتر والنيفو والامتحان على الاغلب عبارة عن فحص على الاجهزة وامتحان كتابي ممكن يجي فيها بعض التعاريف عن الاجهزة ومسالة تسوية ،
يعني بشكل عام المهم الواحد يفهم طريقة حل المسألة ليعرف يحل.

( انتباه لح تلاقوا بالملفات المرفقة ملفين للتعريف عن الجهازين تاكيومتر ونيفو بالصور )


3) التمثل الهندسي

وبيعطيها الدكتور جمال معماري وبتاخدوا فيها المفردات التالية:
* الميول الترابية (( لا ياتي في الامتحان بشكل مستقل )).
* الجدران الاستنادية (( ممكن ان ياتي في الامتحان بشكل مستقل او لا ياتي )) .
* مقطع طولي في عبارة مائية (( يتضمن العبارات والميول الترابية والجدران الاستنادية وهو السؤال الاهم بالمادة وممكن انو ياتي سؤال بعشرين الى 25 علامة )).
* رسم واجهة مدخل العبارة (( يتضمن العبارات والميول الترابية والجدران الاستنادية )).
* رسم واجهة مخرج العبارة (( يتضمن العبارات والميول الترابية والجدران الاستنادية )).
* رسم مقطع طولي في جسر (( يتضمن الجسور والميول الترابية والجدران الاستنادية وعلى الاغلب يجي منوا سؤال ب 15 علامة )).
* الاوتوكاد كيفية استخدام الاوتوكاد والتعليمات الخاصة فيه في رسم الاشكال طبعا الجواب رح يكون كتابي بالورقة والقلم.
هلق الامتحان على الاغلب 3 اسئلة سؤال عن العبارات وسؤال عن الجسور واسئلة الاوتوكاد ، القسم العملي ما بيختلف عن النظري ويلي بيدرس بالعملي ما بواجه اي صعوبة بالمادة وقت النظري وخصوصا اذا كان بيعرف يشتغل على الاوتوكاد ، يعني بشكل عام بدها شوية شغل والتعلم على الأوتكاد ضروري كتير .



4) الرياضيات2

ما بدها كتاب واهم شي اسئلة الدورات من عند الركن وهي استكمال للرياضيات 1 وعلى الاغلبب بتكون نسبة النجاح فيها اعلى من الرياضيات 1
الدكتارة نفسهم والمعيدين نفسهم والطلاب نفسهم بس نسبة النجاح غير ، يعني بشكل عام سهلة وأسهل من الرياضيات 1.



5) الجيولوجيا الهندسية

مادة نظرية بحتة ومخصصة للطلاب المحبين للحفظ البصم ولترفيع المادة من اول دورة لازم تدرسوا الكتاب بشكل كامل تقريبا ومابنصحكم تحفظوا اسئلة الدورات لانو بتصيروا تخربطوا بالامتحان متل ما اسلفت المادة حفظية حتما ،
اما دورة الحملة على الاغلب بتجي تكرار لاخر 3 دورات يعني بكرا بتشوفوا انو دورة الحملة بتجي سهلة كتير  وبدورة الحملة ادرسوا الدورات وانشا الله الكل بيرفعها من اول دورة ، القسم العملي بدوا كتيب صغير والعملي سهل وحلوا وعلى الاغلب العلامات كلها فوق العشرين وبهي المادة اهم شي تجيبوا علامة عالية وخصوصا الطلاب يلي ما بتحب الحفظ ، يعني بشكل عام مادة بدها حفظ بشكل مركز .



6) الكيمياء

على مبدا الفيزياء بالفصل الاول تجارب العملي تتم بمخبر الفيزياء ولازم تجيبوا كتاب العملي مشان تجهزوا التجاب وتدرسوا منو قبل الامتحان العملي ، الامتحان العملي يقسم الى جزاين الجزء الاول تجربة او جزء من تجربة لكل طالب لوحده أما الجزء الثاني امتحان كتابي (( كلوا تعاليل او اسئلة فهمية لاختبار مدى فهم الطالب بالمادة وممكن تجي مسالة موجودة بكتاب العملي ))
القسم النظري بالمادة بيعطيها الدكتور هاني طالب والدكتور غسان التخين
قسم الدكتور هاني طالب احلى قسم والدكتور بهموا الطالب يكون فهمان وما بحب الطالب يلي بيبصم ما بيفهم رح يعطيكم الاسمنت وكل شي عن الاسمنت نظريات التصلب للاسمنت وتركيب الاسمنت وتفاعلات الاسمنت وصناعة الاسمنت وانواع الاسمنت ومعرفة مواصفات الاسمنت اعتمادا على تركيبه الكيميائي ومسائل عن الاسمنت بنظري هاد القسم مضمون لانو الدكتور ما بدقق على الجواب يلي بكون نظري بحت وبيعطيك العلامة كلها بمجرد ما توضحلوا الفكرة الاساسية بددون اي كتابات نظرية ، أما قسم الدكتور التخين بتاخدوا فيه كيميا بتشبه كيميا البكالوريا يعني تفاعلات الاكسدة وانصاف التفاعلات والحموض والاسس وسرعة التفاعلات وبدوا شغل اكتر من قسم الدكتور هاني ، يعني بشكل عام مادة بدها شغل بس مو صعبة.



7) العربي

لاتحضروا لا تدرسوا الا تعملوا شي قدموا الامتحان وعلى الاغلب الكل يرفعها بس ما رح تحسوا بعدل بالعلامات ( يعني الغالبية بحيطان الستين ) يعني الوواحد ممكن يكتب ويكتب ويكتب بتمانين تسعين علامة ويرفع المادة بالستين وهاد الشي عادي بهل المادة .



8) اللغة الانكليزية 2

استكمال للغة 1 ما بدها حضور اهم شي تكونوا فهمانين القواعد منيح وعندكم تشكيلة من المفردات مشان تفهموا النص والمادة على الاغلب اتمته وبتطرقوها معدل مشان تحسنوا علاماتكم.

وهيك من كون خلصنا من المواد وانشا الله بترفعوا جميع موادكم والسنة الجاية بشوفكم سنة تانية ( وبشوف حالي طبعا ) ههههههههه

يالله موفقين ولا تنسوا بالمرفقات في  ملفين للتعريف عن الجهازين تاكيومتر ونيفو بالصور لمادة المساحة 1