..لشباب و صبايا طب الاسنان..
رح عرف بحالي أولا..
أنا اختكم وعد..
متخرجة حديثا من الثانوي و حابة ادخل جامعة..
مجموعي يسمح لي اني ادخل طب بشري او اسنان او صيدلة..
و أنا فعلا كتير محتارة و  ما حدا عم يدلني على الطريق الصحيح..
بتمنى منكن يا شباب و يا صبايا تذكرولي مزايا و عيوب طب الاسنان ..
و هل انتو مرتاحين بهالفرع..ممل و للا لاء.. حلو و لا مو حلو..مجال عملو كيف ماشي و للا مو ماشي..بدي اعرف عن هالفرع كل شي من بعد اذنكن..

أهلا اختي وعد .. و مبارك عليكي النجاح و التفوق ..

نظرا لما يرد إلينا في هذه الأوقات من تساؤلات عديدة .. حول التسجيل في الجامعات و التحير الحاصل ما بينها .. قمنا بانشاء دليل الطالب 2011 إلى جميع كليات جامعة دمشق ..

التحميل من الرابط التالي
[url]http://www.jamaa.net/art275160.html

تجدين فيه .. كل شيء عن كليات الطب و الصيدلة و طب الأسنان ..
بإمكانك الاطلاع عليه .. و تحديد الرغبة التي ترغبين بها ..

بالنسبة لفرع طب الاسنان بالشكل الخاص .. سأترك الحديث لاي طالب نجح إلى الثانية .. بإبداء رايه الخاص لهذا الفرع ..

موفقة ..

اهلا فيكي اختي وعد والف مبروك التفوق       
انا شام طالبة مترفعة على السنة التانية طب اسنان فما فيني فيدك كتير
بس استنتجت بهالسنة انو  طالب طب الاسنان لازم يكون عندو طولة بال
هلق بالسنة للمواد النظري فهي اخف من النظري بالطب البشري
انا فتت الفرع عن قناعة مع انو طلعلي طب بشري والحمد لله لحد هلق ماني ندمانة
بس بنصحك اني تفكري بالفرع يلي بدك تدخليه على اساس الحياة العملية بالمستقبل  --طب الاسنان مريح اكتر من البشري بالنسبة للشغل يعني ما في اسعاف بالليل او مناوبة بالمشافي  وبالنسبة للدراسة فكل الفروع بدها تعب يعني كلو متل بعضو --               

                                              هي كانت وجهة نظري
                                              والله يوفقك وييسر امرك

                                                       
                                           

الطب البشري طريئو طويل وموادو بدها دراسة منيح بس عام وحلو والحياة المستقبلية متعبة إذا كان الاختصاص ماكن حتى طريق الدراسة متعب وبدو جهد لكن النتيجة بتكون حلوة كتير
أما طب الأسنان طريئو أقصر وموادو أخف بكتيير من الطب البشري من حيث النظري والعملي بطب الأسنان بسيطر بشكل كبير بكافة السنوات وخصوصي السنين 3 وطالع والحياة المستقبلية دوام بالعيادة
كمان بدها تعب لكن أخف من الطب البشري
الصيدلة أيضا طريئها أسهل من الطب البشري لكن بسيطر على موادها الكيميا بشكل كبير ومستقبلها ممكن صيدلية أو مخبر تحاليل طبية واشتراك مع شركات طبية ما بعرف أكتر من هيك بالصيدلة :(
هي معلومات كطالب مترفع جديد عالسنة التانية بطب الأسنان وأنت بتم اختيارك حسب ميولك والمعلومات يلي منفيدك فيها

أهلا وعد ......
وماشالله عليكي وعلى شطارتك ....


شوفي حبيبتي أول الشي كونك بنت فطريق الطب البشري طويل كتييير عليكي وفي تعب كتير عدا عن نهايته يلي بتكوني فيها مسؤولة بشكل كبير عن مرضاكي والمناوبات وهالقصص لأنو الواحد لازم يفكر دائما للمستقبل البعيد كمان يعني اكيد هو ممتع وبالنهاية طبيبة بس متل ما قلتلك طريقو طويل



أما بالنسبة لفرعي يلي هو طب الاسنان فبعتقد انو طريقو اسهل واقصر وبنفس الوقت بتكوني كمان طبيبة
أنا صراحة كنت محتارة متلك بس بين الاسنان والمعلوماتية وعملت متلك تماما وسألت واستفسرت واستخرت رب العالمين حتى دخلت هدا الفرع بس ما كنت مقتنعىة فيه مية بالمية

بس بعد ما قضيت هي السنة الاولى جد شعرت بالمتعة عنجد كانت سنة كتييير حلوة وأسهل من البكالوريا بمليووون مرة وهلأ صرت مقتنعة فيه مية بالمية والحمد لله

أما الصيدلة ففيكي بكل بساطة انك تقارني بينها وبين الاسنان حسب رغبتك بالدراسة اذا بتحبي الكيميا كتييير ففيكي تختاري صيدلة لأنو عملها حلو كتير بالنسبة النا كبنات بس اذا بتحبي العلوم اكتر ففيكي تختاري طب الاسنان لانو اغلب موادو علوم والكيميا فيه فرعية وسهلة وبسيطة جداا

هي القصة بترجع لرغبتك بالدراسة .....

بس آخر الشي بحب قلك استشيري واستخيري وشوفي وين ارتاح قلبك وتوكلي على رب العالمين
بالتوفيق انشالله ......