وعليكم السلام أختي أميرة سوريا
بسم الله لنبلش على قولتك
1- من هو أول شخص تعرفت عليه بالمعهد وكيف ؟
أول شخص تعرفت عليه في المعهد  كان واحد اسمو غياث شحود كنا تنيناتنا مخلصين تسجيل بالمدينة السكنية وعم ندور عالمطعم و"صدفة والتقينا " ,بالمناسبة كنت شايف قبلو Cyrano  الورد بقاعة التسجيل بس وقتها ما كان حدا منتبه لحدا.
  2-شو ممكن تعمل لو كنت انت في مواجهة مع قرش:
*بتعمل حالك ميت.
*بتضربو على عينو.  
*بتقاتلو . 
رح أختار الخيار الرابع,رح حاول ما واتي بأي حركة لحتا يروح بس المشكلة موهون المشكلة إذا ما راح وقتها سأطر آسفا إني قاتلو ولست مسؤلا عن أي نتيجة بعدها.
3- شو الهدية يلي بتتمنى حدا يهديك ياها بعيد ميلادك؟ وليش؟
والله صعبتيلي الأسئلة , مممممممم بحب حدا يهديني أي شي مادي أو معنوي طبعا غير المصاري و الأكل بحيث إني أتذكرو فيها مهما طال الزمن أو افترقنا مثالا ,لأنو بنظري المصاري والأكل شي غير مناسب أبدا لهدية عيد ميلاد .
4-بشو بذكرك كل مدرج عنا بالمعهد؟
المدرج الأول :بيذكرني بالسنة الأولى و بالسنة التانية إعادة. 
المدرج التالت :بذكرني ياستي بالسنة التانية أولى وهي كانت أحلى سنة إلي بالمعهد,لأني كنت مع أبناء دفعتي الغالية.
المدرج الخامس :بيذكرني بمعاناتي اليومية مع السنة التالتة .
القاعة السادسة :بتذكرني بعسلي بالسنة الاولى 
بالنهاية شكرا كتير على أسئلتك واطمني ما كانت تقيلة بنوب بس حيرتني شوي بس ما في مشكلة,وأرجو تكون أجوبتي مقنعة.
                                                        دمتم بخير 

اهلا وسهلا هلا والله بأبو حميد
بدك تستغل الفرصة مو ,شو عليه حسابك بعدين .
بسم الله منبلش

أقرأ هالقصيدة بتمعن
و طالبة في معهدي ليس يعيبها ............
بتشوف بنات المعهد بيستحقوا هالقصيدة ,أذا كان جوابك لأ ,,,, وضح ليش و إذا كان الجواب نعم ,,,,أي بنت بالمعهد بتناسبها هالقصيدة أكتر من غيرها و ليش ؟؟؟؟
بدك جوابي بكل صراحة وصدق نعم وحتى بيستاهلو أكتر من هالقصيدة ,بس مارح أعطيك اسم معين أكيد لأنون كتار وكمان مشان الحفاظ على سمعتون وهادا أحد اسباب قولي نعم غير أخلاقون العالية وأدبون بالإضافة إلى تميزون أحيانا أكتر من الشباب ولاكيف؟

الســـــــــــــــــــــــؤال التاني :وين بتاخدك هالكلمات ,,,,1- حب
بتاخدني لأعماق نفسي  .
2-شجرة
بتاخدني لمنظر بستان يحوي أشجار محملة بالتفاح الأحمر.
3-عصفور
بتاخدني للسما الزرقا الملئا بالحرية .
4-قمر
بتاخدني لغرفتي بأخر الليل وقت الي بكون أنا وربي والقمر.
5-ثورة  
مبينة بتاخدني لشارع الثورة ولا شلون!!!
الســــــــــــــــــــــــؤال الثالث :على فرض أن بتحب بنت حتى ,,,الجنون شو أكتر صفة ,,,لح تكون محببتك فيها ,,,,و شو أحلا كلمة بتتمنى تسمعها منها
أحلى صفة هي الرزانةو المرح بنفس الوقت بعيدا عن المياعة ,لأنو البنت حلو تكون تقيلة شوي بس مو لدرجة طفش الشب (برأي الشخصي).
أحلى كلمة بحب اسمعها منها هي   "بشار.... أنا بحبك" .
الســــــــــــــــــــــؤال الرابع) :أملأ الفراغات التالية
1- أفضل صديق لي في المعهد ,,,,,,,, ؟
هادا السؤال صعب كتير لأنو الشباب كلون غاليين علي وبحبون كلون أد بعض لذلك لا أستطيع أن أفضل أحد على أحد .
2- أكثر شخص أتأثر بكلماته ,,,,,,؟
الرسول الكريم محمد  
3-أفضل دكتور مر على رأسي ,,,,,؟
بكل أريحية د.نضال شمعون لأنو مثال للعلم والتواضع بأن واحد.
4-الله يحمي ,,,,, من كل شر .
طبعا بلدي سوريا .
5-ربوط ,,,,, مكان مايقلك صاحبه :)
الجحش . حشا السامعين.
6-قال علي رضي الله عنه ,,,,
لو أن الفقر رجل لقتله ,,,بالنسبة ,,ألك لو أن ,,,,, رجل لقتله
بالنسبة إلي لوكان الخوف رجلا لقتلته.
7- ,,,,,, هي أكتر شغلة بكرها بهالحياة
الهموم.
8- ,,,,,هي أكتر شغلة بكرها بالبنت
المياعة و الغرور .
9-أعلى علامة حصلتها بهالمعهد هي ,,,,,, بالمادة ,,,,,
هي 100 بشفهي الدارات بالسنة التانية .
10- أنا ,,,,,,  ,,,,,,  محمد العمر  ــــــــــــــــــــــــ - أسئلتك (يعني أنا ) ,,,,,,,,,, أسئلة شمعون
هلق ما فهمت شوبدك بس رح جاوبك على كل حال :أسئلتك ما يتشبه بنوب أسئلة شمعون إلا بالشكل لأنو أسئاتك بتنحل بينما أسئلتو ؟!@#$@#.
11- أكتر شخص بحب زوره بالمعهد هو ,,,,
والله حيرتني يا أخي الكل خير وبركةو الكل بحب زورون بنفس التساوي .
12-أنا خطي  ,,,,, (MTN or SYRIATEL )
MTEL المشغل التالت  ,عفوا عفوا  لسا ما نزل عالسوق .هلق خطيSYRIATEL .
الســــــــــــــــــــــــــــــؤال الخامس ( أختياري )أعتبر قدامك ,,, صفحة بيضة ,,,شو بتحب تكتب فيها  ,,,ولمين بتحب تهديها
هادا السؤال حلو كتير الجواب حيكون كالتالي :
الرسالة مهداة لوالدي المتوفى
"أبي العزيز
يحز في نفسي رحيلك عني ولكني صلب كالصخر كما عهدتني
كم أتمنى لو كنت بجانبي الآن لترى فلذة كبدك وقد كبرت
كم تمنيت لو كنت معي لتكون فخورا بأبنك الشاب
أنت معي مهما اتسعت المسافات
رحمك الله و أدخلك فسيح جناته "
شكرا كتير إلك محمد على هالأسئلة الحلوة  وأرجو ما أكون أخر الشي قلبتها تراجيديا بس اسمها المقلاية شو بدنا نسوي .
أرجو كون أقنعتك بأجوبتي ولك جزيل الشكر والحب 
                                          دمتم ودام الوطن سالما 

السلام عليكم جميعا :

أخي أبو عبدو  مارح لف ولا رح دور أسئلتي صريحة وهي

1- شو الشي يلي بتتمنى تساويه وما بتحسن ؟

2- شو أكثر شغلة بتكرها ببشار ؟

3-بتتمنى أنك ترتبط في الوقت الحالي وهل هناك الشخص المناسب؟

4- بتتمنى لو ماكنت متعرف على الشلة أو أي شخص فيها وليش ومين ؟

ودمت بخير

السلام عليكم

اقتباس

"بشار.... أنا بحبك"

ياي شو هاد ..........

اقتباس

بتاخدني لأعماق نفسي

اذا اخدتها لاعماق نفسك رح تضيع هالكلمة خليها بقلبك أحسن

اقتباس

الرسالة مهداة لوالدي المتوفى

الله يرحمو ويجعل مثواه الجنة................................آمين


والله ما بعرف شو بدي اسألك بس رح حاول طالعلك من بنيات أفكاري شي كم سؤال


1 شو أكتر كلمة بتكره انو ينادوك فيها الشباب

2 حافظ قصيدة "قفز الارنب" اكتبها اذا حافظها

3 بتحب تصير سوبرمان وليش؟

4 قديش حق اللابتوب تبعك  


سلام

وعليكم السلام
أهلين بالوراق والله
يا سيدي أحلى شي فيك هو إنك زلمة دغري ما عندك لف ودوران
منبلش خيو منبلش

1- شو الشي يلي بتتمنى تساويه وما بتحسن ؟
بكل صراحة, زيارة القدس والصلاة في المسجد الأقصى .

2- شو أكثر شغلة بتكرها ببشار ؟
هاد السؤال صعب شوي بس رح جاوب ....غصب العني ....
أكتر شغلة بكرها بحالي التطنيش أحيانا ولو عن بعض القضايا المصيرية وقلة المروة .

3-بتتمنى أنك ترتبط في الوقت الحالي وهل هناك الشخص المناسب؟
نعم وبقوة ولكن ما بدي اتسرع  , ومشان الشخص المناسب موجود بس المشكلة مابدك هو يقبل بالأول خصوصي إذا كان معتبرني زميل أو أخ.

4- بتتمنى لو ماكنت متعرف على الشلة أو أي شخص فيها وليش ومين ؟
أعوذ بالله شو عم تحكي يازلمة عنجد رفقاتنا أحلى شباب وكلون خير وبركة ,صحي بيصير سوء تفاهم أحيانا بس يا أخي ما حلوة الحياة  بدون هالشغلات ولا كيف ؟.

يسلموا حيان على هالأسئلة الحلوة متل حكايتك .
والله يوفقك .
                                                                      دمتم سالمين

وعليكم السلام
أهلين بالسيد أيمن خطوة عزيزة
أولا_تعيش والله يرحم أمواتنا وأمواتكون وشكرا كتير إلك على هاللفتة الكريمة منك.
ثانيا _ مشكلتك يا أيمن أنك ظريف و حلو وسكرك زيادة كمان ,على هالإقتباسات الجميلة ,بس معليش مارح رد عليك .
ومنبلش
1-شو أكتر كلمة بتكره انو ينادوك فيها الشباب؟
فسفوس, وخصوصي وقت اللي بكون عم ادرس طبعا متل مابتعرف هاي حالة نادرة الحدوث بغير وقت الامتحانات .

2-حافظ قصيدة "قفز الارنب" اكتبها اذا حافظها.
هلق ماني حافظها بس بتذكر أولها
قفز الأرنب كنت قريبا منه ألعب ..............

3 -بتحب تصير سوبرمان وليش؟
علوا , ليش!!! مشان ساعد الضعفاء والمظلومين و المقهورين والمعذبين وال..... في هذه الأرض.

4 -قديش حق اللابتوب تبعك؟
شو هالسؤال هاد
خيو كاش 32 ألف وتقسيط 36 ألف .
مليح هيك .

وبالأخير بتشكرك كتير أخي أيمن على عفويتك بطرح الأسئلة وهذا إن دل على شيء فهو يدل على طيبة قلبك وظرافتك .
والله يوفق
وتصبحو على خير .
سلااااااااااااااااام 

السلام عليكم
كانو هالموضوع صار من هياغب الماضي
ويييييييييييييييييينك ياأبو عبدو الورد
بس ما تكون زاير عند بيت خالتك
خلص خطوب وخلصنا

وخود هاسؤال:

  مين بتحب أكتر بساط الريح ولّا مربى الخيزران

السلام عليكم



شو شريك ما عم أعرفك وانت عم تنكت  

وانا بدي اسأل بشار.......

ما هي الآلة الموسيقية التي تحبها أكثر؟؟

1 البوق

2 المزمار

3 أي الة ما عدا ما ذكر سابقا