و الله يا مجد , ما عندي شي جديد إحكيه على الصور , بس بحب قول إنو ماني مستغرب شي , لأني سابقا" نزلت و تفرجت على بنايات عم تتعمر لصالح جمعية و كنت من طرف المتعهد , و شفت بعيني كيف بيصير الشغل على مبدأ (هات إيدك و لحقني)

يعني مثلا" زيادة أو نقص 5سم بعرض الجوائز ما كان في إي مشكلة عندون

غيرو سماكة البلاطة بالكامل ( طبعا"بدون ما ينتبه المهندس المشرف لهلشي)

و كمان غيرو بإبعاد قضبان التسليح

و وقت الصب  الله لا يفرجيك على منظر الخلطة البيتونية (فاصلة الخلطة بالكامل)

و أحلى شي كياس البطاطا (الشيبس)يلي فاتت بين تسليح الجوائز و ما شالوها و قت الصب
و طبعا" عطوه للمهندس المشرف وقت (تاريخ) للصب و صبو بوقت تاني و ما خبروه إلا بلحظتها

و جابو رجاج للبيتون و طبعا" ما استعملوه لأنو خايفين يفلت الكوفراج من وراه , بس كان الهدف من جيبتو إنو يعملو حالن عم يشتغلو فيه في حال إجى المهندس المشرف فجأة

و أحلى شي الحداد و النجار لما يكون المهندس موجود تلاقيهم يحكو نكت معو و يشربو شاي ... يعني على شوي بتحسون متل الرفقات يلي بيعرفو بعض من زمان و لما يروح المنهدس يبلشو يحكولي بالعاطل عليه بأسوأ طريقة و فوق كل هاد الحداد يحكي بالعاطل و يشوه سمعة النجار قدامي و كمان النجار يحكي بالعاطل و يشوه سمعة الحداد قدامي و لما يكونو مع بعض بتلاقيهم أصحاب مافي أحلا منهم

بس بالأخير صحيح ماتعلمت شي عملي منهم بالهندسة بس تعلمت كتير عن الطريقة يلي ممكن ينضحك فيها و يتم إستغباء المهندس.

عفوا" على الإطالة و شكرا" إلك كتير على الموضوع    و هي صورة من عندي (و من بعد إذنك) لأحد الإبداعات الهندسية .