اليوم حابة انو نحكي عن بعض المعتقدات الشائعة بمجتمعنا ويلي للأسف صارت عرف وعادة متعودين عليها وحتى أحيانا اذا عملنا خلافها بنخاف وبنصدق انو رح يصير لنا يلي بينقال بهالمعتقدات ... ومن هالمعتقدات :

* اذا انكسرت كاسة بيقولوا: انكسر الشر (تقولوا الشر مخلوق من الزجاج) 


* اذا مر حدا فوق الطفل ما بقا يطول ( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!!  و متل ما بقول المتل فشخة حية ولا فشخة بنية)



* قص الاظافر بالليل مو منيح (لا تسألو ليش ما بعرف ولا حدا بيعرف بس مو منيح و خلص )


* مراششة الميه فراق (ما بصير حدا يرش رفيقو بالمي لان بعدين بيتفرقوا  اي شو عم يرشه بالزيت كاز )



* للي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين (واللي بيعمل غير هيك بيتحول لسعدان !!) 


* اذا اجت الكندرة فوق الكندرة يعني رايحين مشوار (واذا اجت تحتها يعني راجعين من المشوار ؟؟!!)

* اذا زحف الولد او زقزقت العصافير معناها جاينا ضيوف (وبهيك حالة لازم توقفوا ورى الباب لانهم بكونوا طالعين عالدرج) 


*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل (واذا طنوا مع بعض معناتها طرشت عليك العوض)


* اذا كان في خناقة بيقولوا اقلبوا الصرامي لتحمى الخناقة   (شماتة ) الله لا يشمت حدا فينا



* اذا رفت عيني اليمين بيكون جاينا خبر طريف
*اذا رفت عيني الشمال بيكون جاينا خبر مو منيح(اما اذا رفوا سوى فأنت اكيد احول) 



* اذا حكني حاجبي معناها بدنا نستقبل حدا جاي من السفر



*إذا حكني كفي اليمين معناها بدي أقبض مصاري 



*و إذا حكني كفي اليسار معناها بدي أدفع مصاري (وغير هيك بقى فأنت اكيد جربان روح تحمم) 


* و ما بصير الحمام بالليل (طبعا شي بديهي لأن اكيد المي بتكون مقطوعة) 


*و ما بينفع كب المي بالبلوعة بالليل من غير التسمية بالله و الاستعاذة أولا (يالطيف مشان ما يأذونا ولا نأذيهن)  بس عرفتوا مين هدول؟؟؟؟؟؟؟؟؟؟؟؟؟؟........... هدوليك ما غيرن ...


*واذا شفت مقص مفتوح لازم فورا تسكرو ( لانو المقص الفاتح تمو بيعمل خناق ) 


*و دلق القهوة رزقة ... خليها مدلوقة لا تمسحها


*و شرب المي بعد القهوة قلة زوء (حتى لو اتشردقت موت ولا تشرب مي ) 



*و اذا الولد الصغير كتير ابن الشهور عم يضحك لحالو بيقولو الملايكة بتكون عم تحاكيه بس ابصر شو ؟؟؟!!! 




* كمان يلي حامل بصبي بتتباشع واذا حامل ببنت بتحلا 


* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هاد اذا ما طلع حرامي كمان )



* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص 


*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة (بس اكيد في عالم اذا بتقرأ القرأن كله بيضلوا لزقة فلا تحاول) 



*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقراء المعوذات وتقول من عين افلان و تنفخ... وفي حل تاني انك تروح تشيل عيونه وبلا وجعة هالراس 



*والي بيعدّ النجوم بيطلعلو تالولات بايدو (بس اذا حسن يحصيهم ما بيطلع شي) 



*وبعد ما نخلص صلاة نطوي السجادة مشان الشيطان ما يصلي عليها (خلّيه يصلّي بركدن يتوب ويصير يوسوسلنا بالخير   

بقى شو رأيكم دام فضلكم ؟؟؟      

عنجد ما بعرف شو بدي قول
بس  اكيد هل الامور منتشرة كتير للأسف بمجتمعنا
نحنا ملتهيين بهل الامور
و    اعداء امتنا بشو ملتهيين
نحنا  بالمقص و انكسر الشر و كل الامور يلي ذكرتيها
و الغرب وصل للمريخ
و الشخص يلي  بيذكرلك ياها
بتلاقي مقتنع فيا مية بالمية
بس شو بدو يحكي الواحد
حسبي الله و نعم الوكيل

السلام عليكم:


شكرا" كتير على هالموضوع الحلو والمميز هاد ....

مع أنو معظم هالمعتقدات أنا مالي سمعان فيها بس هنن كلن موجودين بالمجتمع وبقوة للأسف ....


بس يلا ان شاء الله هالجيل الجديد بيحاول يمحى شوية معتقدات خاطئة متل هي .... وشوي شوي بيمشي الحال ...


شكرا" مرة تانية على هالموضوع المميز ...


سلام

والله هالمعتقدات كتيييييير منتشرة.......
معقول نحن بهالزمن ولسع بيقولو هالحكي.......
بس اكيد كلامهن صحيح لانو اهل اول ماتركو شي ماقالوه.......
وكان دائما كلامون صحيح.....

اقتباس

*و شرب المي بعد القهوة قلة زوء (حتى لو اتشردقت موت ولا تشرب مي ) 

.................................
عن جد هي القصص بنتصرف فيها بدون ما نحس
بس اذا بنفكر فيها هيك ... والله شي بيضحك ؟؟؟

انا اكتر عادة بتزعجني هي تبع : لا تعدوا النجوم بيطلعلكم ثآليل .؟؟؟؟؟
انا بعدهم باليوم مية مرة ومابشوف شي بس ستي وعمتي و ...و ...
كلهم بيخانقوني ؟؟؟؟؟؟؟؟؟؟؟؟؟؟؟؟؟؟؟؟


تحيـــــــــــــــ الرومانتكيــــــــــــــــــــــة ـــــــــــــــــــــاتي.............

السلام عليكم


أي شو هاااااااد ........

كله ما بيصير .....وإذا..... ولازم ......وبيقولو ....ويقولو شو ما بيقولو .......شو بدي بكلام الناس ....
هههههههه

بس عنجد موضوع رائع ...... في شغلات ما كنت بعرفها  ...

اقتباس

* اذا كان في خناقة بيقولوا اقلبوا الصرامي لتحمى الخناقة  (شماتة ) الله لا يشمت حدا فينا



* اذا رفت عيني اليمين بيكون جاينا خبر طريف
*اذا رفت عيني الشمال بيكون جاينا خبر مو منيح(اما اذا رفوا سوى فأنت اكيد احول) 



* اذا حكني حاجبي معناها بدنا نستقبل حدا جاي من السفر

تقبلي مروري .....

محمود....................hmmam

                                                                          عاشق البحر والمطر 

والله معك حق الغرب عم يبرمو عالحياة على سطح كواكب تانية ونحن مشغول بالنا بالمقص الفاتح تمو ؟!!!!!!    نورت 
                                                                                                mr.ghaith 

متل العادة مرورك كتيير حلو ومهضوم شكرا على اهتمامك بمواضيعي   ....واكيد بالاضافى ليلي انا حكيتو لسا في كتير معتقدات ما بعرفا  نورت 
                                                                                                  ayahhh

والله ضحكتيني من قلبي  هلأ يعني بيجوز انو صدفت شي مرة وزبطت مع أهل أول فأخدوها قاعدة .. والله ما بعرف    نورتي 
                                                                                                romantic girl  الحمد لله طمنتيني انو ما بيطلعلك تآليل  (بس أكيد انتي متل ما بتقول القاعدة المعروفة عرفتي عدد النجوم  ولولا هيك يييييييي    الله لطفك  نورتي                                                                                                محمود 

شو بدنا نعمل هيك المجتمع يلي عايشين فيه ولازم نتصرف تبعاًلعاداتو وتقاليدو وإلا يالطييييف بنكون شذينا عن القاعدة  نورت 

أصدقائي  الغاليين  تشرفت بمروركم الحلو بموضوعي  وبانتظار مشاركاتكم الحلوة على طووووول   

شكرا كتير على هالموضوع الحلو والغريب
واله ما سمعت بهالشغلات غير هون
طبعا سمعت بعضهم لكن مو لهالدرجة
ولي على هالحالة لازم نحسب حساب لكل خطوة وهمسة وغمزة
أكيد لأ يبلطوا الزرقا

والله ضحكتيني .. في شغلات بعمري مو سامعة فيها ..

بس عنجد كلامك صحيح مليون بالمية ..

يعني الأغلبية بالمجتمع بيؤمنو بهيك معتقدات ..

و للأسف هي معتقدات متوارثة ..

وما فينا نغيرها بين يوم ليلة ..

بقى إذا الواحد بدأ من نفسو واللي حواليه بيقدر يغير..

حتى لو شي بسيط .. أحسن من ولا شي ...

مشكورة صديقتي على موضوعك

لأنو برأيي .. مهم جدا ً.............

بقولوا هالمعتقدات لها اساس
ديني خاصة قصص المي والحمام
وعد النجوم
ما بعرف شو المرجع الديني لهي القصص بس انا هيك بسمه ازا حدا عندو اي اطلاع
على هيك ارتباطات يزودنا فيها
موضوع حلو بيستاهل الواحد يكتب شكر لكاتبته