السلام عليكم و رحمة الله و بركاته

الحمد لله و الصلاة و السلام على رسول الله .. و آله و صحبه و من تبع هداه .. ثم أما بعد ....


اعذروني على اللهجة السوقية التي ساعتمدها في موضوعي هذا .. و لكنني لمست نوع من صعوبة إيصال المعلومة في هذا الشأن تحديدًا ..
فقيل لي أكثر من مرة أنني استخدم لغة يفهم منها ما لا يراد .. و يراد منها ما لا يفهم ..

فهالمرة بدي احكي على بساط أحمدي .. و بالأندري

الموضوع يتعلق يالتوثيق و المنهجية العلمية .. على المستويين العلمي البحت و الشرعي ..

قبل ما فوت بالموضوع .. بدي أحكي قصة أنا شاهد عيان فيها ..
اجا بيوم من الأيام الطيار السوري نادر جنيد على كلية العلوم .. و كان بده يشرح للمدرسين و الدكاترة إنو الأرض ثابتة و ما بتدور ! و قال عنده أدلة عقلية و علمية و عنده أدلة كمان من القرآن !! طبعًا للوهلة الأولى لما سمعنا الحكي قلنا بيننا و بين حالنا كطلاب سنوات أولى .. العمش هاد جاب التايهة .. و الله يا اخي عندنا ابداعات .. بس ما عندنا دعم .. تعتيم أخي .. عنصرية .. نحنا اللي عندنا إبداع ..
المهم اجا الطيار .. و صار يشرح .. و بدأ الدكاترة يطرحو عليه أسألة يمين و يسار .. و نحنا مالنا فهمانين شو القصة بالضبط !! شي يحكي عن قوانين كبلر (مين سمير ؟) شي يحكي عن الحركة القطعية ! شي يحكي عن النسبية الخاصة المطبقة في حالة نظام الملاحة المخصص للطيران ! و نحنا متل الأطرش بالزفة .. ما فهمنا مين اللي فهمان و مين اللي عم يخبص بالموضوع ..  الدكاترة من هون يقولو هاد حكي مو مزبوط لأنه هيك و هيك .. يقوم هداك يرد : لأ هيك و هيك ..

بالأخير قام الدكتور سقراط البعاج و قلو ما معناه : روح عنا ياااه .. جاب تبيع مي بحارة السقايين ! شو بطلنا نفهم الخمسة من الطمسة بالفيزياء .. هي اسمها هرطقة علمية .. و سحب حاله و طلع !
كمل الطيار كلامه .. و ما كمل جملتين قام الدكتور فوزي عوض و قاطعه قله : ليك هون .. سماع .. ما بتجي بتبرهن نظرية مستقلة بنفي نظرية مسبقة ! هاد الكلام كله غير صحيح و اعتراضاتك على النظرية الميكانيكية لدوران الأرض غير علمية أبدًا .. و سحب حاله و طلع !!

قام وراها الدكاترة صاروا على نفس الوزن .. يطرقو كلام جارح .. و يطلعو ..

بوقتها .. انا عتبت على الدكاترة .. إنه ليش هالكلام الجارح ؟ كان بإمكانهم يناقشوه بهدوء !

المهم صرت سنة ثالثة و بلشت أفهم شوي نسبية خاصة و ميكانيك أجرام و هالحكي .. يا زلمة لما رجعت شفت السي دي اللي منزله .. حسيت بإهانة للعقل البشري بكلامه .. و قلت بيني و بين حالي .. العمش شلون قدرو الدكاترة يتحملو شي 45 دقيقة متواصل !!!!!!! اشوو هاد لك يوووووب قوم فرجينا عرض كتافك ... جاي من البرية و عم تحكي بالفيزياء الفلكية !!!!


و الحال يتكرر هنا أيضًا ...



بصراحة أنا أعاني معاناة كبيرة مع "الطبقة المثقفة" في هذه المسألة ...
يعني الرجل العامي أبو كاسم بياع الفجل بالشارع ما بعتب عليه لما يجيبلي خبر إنو في فيل طار ... بس احيانًا بتجيك حالات من ناس محسوبين على المتعلمين و المثقفين .. بتسلمك الجلطة و بتخليك توقع عليها .. بتوصلك الضغط ل10 بار و بتتأكد إنو الباروميتر انبخش و بتقلك : ما على قلبك شر و بتمشي .. صرت شايف مجموعة أمثلة خرافية بكل معنى الكلمة ..

رح أضرب أمثلة ... و من المنتدى مو من الأمثلة اللي كنت أشوفها أيام الجامعة ... و ما رح أسرد المغالطات العلمية البحتة و الشرعية المتفق عليها لأنها صارت شي فاقع ..

مثال 1:

بيجيني واحد دارس اقتصاد و بيقلي تعويم العملة بيعطي دفعة قوية للإقتصاد الحر في البلد !!!


مثال 2:

بيجيني واحد دارس "أدب" عربي و أدب عربي و بيقلي مدرسة الشعر الحر كانت نتيجة إبداع الشعراء العرب !!!!!

مثال 3:

بيجيني واحد أدب انكليزي و بيقلي كلمة : "out of my sight" كلمة دارجة و لطيفة و لا تحمل أي شتيمة !!!

أما عن المغالطات العلمية ... حدث و لا حرج .. صرت أشوف بلاوي زرقة .. مثل لغز أينشتاين اللي تكرر شي ستين ألف مرة بهالمنتدى و كله بيقلك لغز آينشتاين اللي ما حلو غير عبقرينو و كركور و غرندايز !
و المواضيع اللي بتنزل عن الثقب الأسود أو النموذج المعياري للجسيمات الأولية أو الإعجاز العلمي .. تخبيص عجبة ! يعني إذا بتجيب أبو عبدو الفوال يمكن يطلع معه شي أزبط من المواضيع التي "تنقل"

لك المصيبة اللي بتشلك إنو بموضوع مثل موضوع لغز آينشتاين .. بتقلهم للبشر .. للجامعيين للمثقفين للمتعلمين .. يا ناس يا عالم يا هوووو يا سماعين الصوت ... يستر على حريماتكم .. اللغز حلو و رهيب و رائع و ما في قبلو و لا بعدو .. بس آينشتاين ما إله علاقة لا من قريب و لا من بعيد ..

اللي بيشلك إنك بتلاقي الجواب من نمرة : هيك قرينا ! طب وين قريتو : بالمنتدى الفلاني .. طب شو الدليل إنه هالكلام صحيح ؟ بيقلك ما بعرف بس نحنا متل ما قرينا منحط !!!! بتقله يا حبيبي يا عيني ما دخل آينشتاين .. بيقلك : كون لطيف شوي !!!!! بتقله يا أخي أنا مو ضدك .. بس أنا من أنصار التوثيق و الموضوعية .. بيقوم بيقلك : احكي باسلوب ما يكون حاد !!!!!!!!

يعني بوس رجلك مثلاً لتفهم إنو هالعلاك المصدي اللي عامله قص لصق اسمه : كذب !!

الأنكى من هاد كله .. بتحكي مع بعض المشرفين .. بيقلك : لك عيفهم يا زلمة خليهم يشغلو مخهم شوي !!!!!!!!!


مثال ثاني كمان على آينشتاين .. قصة إنو شوفير آينشتاين كان معو فترة طويلة قام حفظ كلام آينشتاين قام بمرة من المرات طلع هو بدل آينشتاين و آينشتاين قاعد بين الصفوف على أساس إنو هو الشوفير (تبديل أدوار يعني) .. قام بس خلص المحاضرة .. اجا بروفيسور سألو للشوفير سؤال قوي .. قام الشوفير قله : رح خلي شوفيري يجاوب على هيك سؤال سخيف (اللي هو فعليًا آينشتاين القاعد بين الحضور كما تزعم القصة) .. بيقوم آينشتاين بيجاوبو ..

بعد التشكرات الكثير على الموضوع الشيق و القصة الممتعة .. و التحليلات الميتافيزيقية و الثناء و ذكر محامد آينشتاين و و و و و إلخ

بتشوف تعليق مثل :  و هكذا نستنتج إنو مو آينشتاين فلتة .. لأ كمان شوفيرو شغلة كبيرة ..

لك أنا بس بدي أفهم عقل اللي عم يقرأ .. ما خطرله إنه آينشتاين ما بيكرر محاضرته مرتين لأنه آينشتاين باحث و ليس أستاذ جامعة ؟ طب خلي ما خطرلو هالخاطر .. و خلي آينشتاين عم يكرر نفس المحاضرة ستين مرة .. و خلي الشوفير حفظها .. طب بالله هالشوفير العبقري ليش ما بيشتغل باحث بفرد مرة إذا كل هالقد ذكي و بيفهم؟

لك أنا أفهم اللي بيقرا هيك قصة بيكون عم يستوعب شو عم يقرأ و لا بس عم يمضي سطور ؟

من جديد نفس المعاناة .. بتقلهم يا عالم يا هوووووو يا بشر .. أبوس رجلكم .. جيبولي مصدر واحد لحتى أقدر اصدق هيك شي .. بيقلك : حبلك تصدق حبلك ما حبلك لرجلي !!!!!!!!!!!!!!!!!!!!!!!!!!!


أما بالموضوع الشرعي و هو الأخطر .. بتلاقي كل شغلة عجبة .. احاديث يمنة و يسرة .. شي ضعيف شي موضوع شي مكذوب ..

لك أحيانًا كنا نجيب الدليل مصححًا و موثقًا .. و يقلك أخي الأعمال بالنيات و أنا نيتي منيحة !!!!!!!

بتقلي يا أخي بصرف النظر عن نيتك ما بيصير تنشر هالحديث .. بيلف و بيدور قرن زمان و بيصير علامة عصره و ما بيتراجع و ما بيتراجع !!!

الأسوأ من هيك .. بيجي شخص .. بيجيب حديث صحيح .. و بيجيب المرجع و درجة الحديث .. و بيكون ما لو فهمان معنى الحديث .. بيقوم بيستخدم الحديث و بيطرقك موضوع بهالمنتدى للصبح .. بتجبلو ستين ألف منقول و تفسير .. و بيضلو متنح .. خلص بده يأثبت شغلة و لقا الدليل .. إنو يفهم هاد الدليل مكانو مو هون .. ما في مجال ..

بتجي بتسأله : انت شو دارس علوم شرعية .. بيقلك مالي دارس ..
طب ليش عم تعفس بالدين و الأحاديث ؟ بيقلك أنا جبت حديث صحيح !!!!!

طب هيك شخص ... شلون ممكن تفهمه ؟؟؟


حتى فترة قريبة كنت أضرب مثال للناس اللي مو متعلمة و لا مطلعة و رغم هالشي بتعفس بتفسير الآيات و الأحاديث و بتلعب فيها و بتستخدمها على كيفها و مراقها .. كنت أقولهم : شمعنا بالفيزياء ما حدا بيعفس ؟ شمعنا بالرياضيات بتحترمو الإختصاص و ما بتقربو عليه إلا إذا كنتو مختصين فيه؟  شمعنا بالطب ما جدا بيفتح تمو إلا ليجي الدكتور ؟

بس تبينلي إنه شبابنا الجامعي "المثقف" مثل الزبدية الصيني .. شلون ما رنيتو بيرن .. بيفهم بالإقتصاد و الفلسفة والإجتماع و الأدب و الفن و الرومنسية و العلوم و التنكلوجيا و الطب و الشعر و الدين و السياسة و العلوم العسكرية و و و و و

و لكنه في حقيقة الأمر .. للأسف .. سامحوني على هالملفظ .. عم يقدم للقارئ الواعي دليل إنه مجرد : حمار معبى ببنطلون ..

بالمختصر المفيد ..

يا حبايب .. يا أخوة .. يا شباب .. يا مثقفين .. يا واعيين .. يا مفتهمين .. يا رائعين ..

الثقافة لا تكون بالقص و اللصق .. العلم ليس كل ما يكتب في أي مكان ..

قبل ما تنزلو موضوع .. بستر حريماتكم .. ايدي بزناركم .. أبوس إيديكم .. تأكدو من المحتوى .. اقراوا الكلام مرة و 2  و 3 .. جيبو أدلة .. تأكدو من صحة الأدلة .. و بعدين كبيس على زر : "موضوع جديد"

و يا أخي .. لما بجيبلك كلام منافي لموضوعك .. ما قصدي قول : "انت حمار" .. الله وكيلكم مو هيك قصدي .. قصدي قلك .. يا أخي .. يا حبيبي .. هالكلام غلط .. سحبو قبل ما حدا يشوفنا .. عدلو قبل ما حدا يحس علينا .. خلص ما رح قول لحدا .. بس اسحبو و نزل الحكي المزبوط .. و انا ديبك ..


على حب النبي .. اللي حاسس بوجعي يفهم البشرية إنو الإجترار مو ثقافة .. إنو نسخ لصق المواضيع مو شطارة .. و إنه الإنتقاد مو مسبة !!!


سامحوني على اللهجة السوقية .. بس و الله تعبت .. قسمًا بالله عم شوف شوفات مو بالوعي .. عم اسمع و اقرأ كلام هون بهالمنتدى و غيرو من الأماكن .. شي بيخليك تشد شعرك !!





فيا شباب .. من أخوكم أبو عبيدة .. فكرو بكلامي .. و تقبلو من أخ مشفق متودد (رغم الأسلوب الشوارعجي)

و طبتم

أخوكم أبو عبيدة

هههههههههههههههههههههههههههههههههههه

بربي ضحكت من قلبي

ع قد مامحروق قلبك

طالع الحكي بحرقه

فعلا المضحك المبكي

معك حق

بس بدها رواق القصة

أخي أبوعبيدة

وبالمشرمحي
"كتر الشد بيرخي"

"ولي مابيمرق الصغيره مابتمرق معه الكبيره"
وقص على ذلك
دمت بحب

الله المستعان

شبعنا جهل و تخلف و الله ..

يا أبو رائد .. هرمنا .. هرمنااااااا

و الله هرمنا يا أبو رائد !

خيي أبوعبيدة من وين جايب هالحكي ,

يا سيدي عنجد مشكلة , هالموضوع لازم يتثبت , بس لانو لهجة عامية فما بظن .

انا ماعندي مشكلة بالمواضيع يلي بينتسخ , علمية او ادبية

لانو هي المواضيع بتنتقد بسرعة , وخصوصا هاد شفير انيشتاين . ^_*

بس المواضيع الشريعية
هاد حكيك لازم يطبق , لانو الله هالشي خطير , ممكن انسان ملحد , سامع معلومة صحيحة
و على وشك ياسلم ,, بيجي بيشوف معلومة مدسوسة مناقضة للمعلومة الصحيحة بعدين بيجي بيحكي دين ....... مالو ثابت , وبيشتم يعني بالمشرمحي

بس هادا يلي حابب اكد عليه
بس عنجد حكيك نظامي
أهنيك

إهداء إلى أبو رائد ..

هي رسالة وصلتني فريش !




أنا عم اشتغل حالياً بكتابة وإنشاء وإعداد حلقات البحث ومشاريع التخرج ورسائل الماجستير.

وللأسف انصدمت أول ما قالولي على الشغل, وما كنت بعرف أنو شبابنا الجامعي, ما عندو استعداد لا يبحث ولا يوثق ولا يكتب ولا يعزب حالو.

من أول الفصل الدراسي الثاني لحد الآن أنجزت حوالي 30 حلقة بحث ومشاريع تخرج, وفي مختلف المجالات.

و رسالتين ماجستير, والمؤسف أكثر من ذلك أن رسالة الماجستير, هي عبارة عن تحقيق مخطوط , وأنت أدرى ما معنى تحقيق مخطوط.

والحديث يطول عن الطلاب التي لا تفقه شيئاً في دراستها ولا تعلم ما معنى حلقة البحث حتى؟؟؟؟؟!!!!!!!!!!!!!

حتى إذا كنت مرتكباً خطأً مطبعياً بحرف لا يستطيعون تعديله بأنفسهم بل يعيدونه إلي لأصححه لهم.
والحديث طويل جداً.

ولكن بالنتيجة برأيي لا تعب حالك كثير, لأنو للأسف يمكن 90% من الأشخاص مو فهمانة شو عم تحكي للأسف.

شبابنا الجامعي سيء جداً جداً جداً.

ورجاءً خلي هادا الحكي بيني وبينك.




انتهى كلام المرسل بعد هذه الجملة الأخيرة بجملتين

بس أخي بما انو هي خاصة لابو رائد , بس من باب الاخوة يلي بيننا , بدي اسأل

هلأ من خلال خبرتك شو الحل ؟
ومن تحليلك للواقع المرير يلي عايشينو

وصل الإهداء


يا أخي  أبوعبيدة

ليس كل مايعرف يقال

فهناك ماهو أسوء

ولربما السب

أنه أعتى جوانب الثالوث

محبتي

لك أبو عبيدة ..تروح شهيد ان شاء الله على هالحكي ...

لك فعلا سهران  وخالص من كلشي وما عندي قرأت موضوعك

وخنت عليه شي سيكارتين

بس شو بدك بالحكي شعبنا كلو معارف وبعرف بكلشي

بس بدك الصراحة حرقت قلبك يلي عم تحكي فيها عجبتني

يعني اطمنا انو عنا بسوريا شباب بفكر متلك

أبو عبيدة والله انك بطل

( في مجال خبرك اني طول الموضوع فرطان ضحك )

الله يعينك شو بتشوف شوفات

انطبق عليك بيت الشعر

ذو العقل يشقى في النعيم بعقله وأخو الجهالة بالشقاوة ينعم

شو بدك تعمل شعب مثقف بيفهم بكلشي :)

سلام وان شاء الله ما بتشوف شر